சென்னை, ஜூலை 23 –
நீட் நுழைவுத்தேர்வுக்கு எதிராக சென்னையில் மாணவர் அமைப்புகள் இரண்டாவது நாளாக நேற்றும் போராட்டம் மேற்கொண்டனர். போராட்டத்தில் ஈடுபட்டவர்கள் மீது போலீசார் கண்மூடித்தனமாக தாக்கியதில் பெண்களுக்கு எலும்பு முறிவு ஏற்பட்ட நிகழ்வு அதிர்ச்சியை ஏற்படுத்தியது.
சென்னை எழும்பூர் ராஜரத்தினம் மைதானத்தில், நீட் தேர்வை ரத்து செய்ய வேண்டும், ஒன்றிய அமைச்சர் தர்மேந்திர பிரதான் பதவி விலக வேண்டும், டெல்லியில் போராடிய மாணவர்களை தாக்கிய ஒன்றிய அரசை கண்டித்து SFI-DYFI அமைப்பினர் 48 மணி நேர தொடர் போராட்டம் நடத்தி வருகின்றனர்.
போராட்டத்தில் ஈடுபட்ட மாணவர்களை போலீசார் குண்டுகட்டாக தூக்கிச்சென்று கைது செய்தனர். மாணவர்கள் மீது அடக்குமுறையை ஏவி, நீட் தேர்வுக்கு எதிரான போராட்டத்தை ஒடுக்கும் தவெக அரசுக்கு எதிராக கண்டனம் தெரிவித்த மாணவர்கள், தமிழ்நாட்டில் அவசரநிலை பிரகடனப்படுத்தப்பட்டுள் ளதா? என்று கேள்வி எழுப்பினர். ‘நீட்’டுக்கு எதிராக போராடுகின்ற மாணவர்களை கைது செய்வது, போராட்டம் நடத்தக்கூடாது என கூறுவது என்பது எந்த வகையில் நியாயம் என்றும் போலீசாரிடம் மாணவ அமைப்பினர் வாக்குவாதத்தில் ஈடுபட்டனர்.
நேற்றைய தினமும் சென்னையில் போராட்டம் நடத்திய மாணவர்களை வலுக்கட்டாயமாக கைது செய்தனர். போலீஸாரின் கண்மூடித்தனமான
தாக்குதலில் 4 மாணவ, மாணவிகளுக்கு எலும்பு முறிவு ஏற்பட்டது. அத்துமீறும் போலீசாரின் நடவடிக்கைக்கு மாணவ அமைப்புகள் கடும் கண்டனம் தெரிவித்துள்ளனர்.
மதுரையில் போராட்டம்!
இதேபோல, மதுரையில் இந்திய ஜனநாயக வாலிபர் சங்கம் (DYFI) மற்றும் இந்திய மாணவர் சங்கம் (SFI) சார்பில் தமுக்கம் மைதானத்தில் உள்ள தமிழன்னை சிலை அருகே காத்திருப்புப் போராட்டம் நடைபெற்றது.
இப்போராட்டத்திற்கு அனுமதி மறுத்த காவல்துறையினர், பங்கேற்றவர்களை விரட்டி விரட்டி வலுக்கட்டாயமாகக் கைது செய்திருக்கின்றனர்.
இது தொடர்பாக மத்திய சென்னை SFI மாவட்டச் செயலாளர் தமிழைத் தொடர்புகொண்டு போராட்டக்களத்தில் என்ன நடந்தது என்பது குறித்துப் பேசினோம்.
அவர், ``நீட் தேர்வு விவகாரத்திற்கு எதிராக DYFI, SFI சார்பில் தமிழ்நாடு முழுவதும் காத்திருப்புப் போராட்டத்திற்கு அனுமதி கேட்கப்பட்டது. ஆனால் காவல்துறை அனுமதி வழங்கவில்லை. பிற மாநிலங்களின் நகரங்களில் காத்திருப்புப் போராட்டத்திற்கு அனுமதி வழங்கப்படும் நிலையில், தமிழ் நாட்டில் மட்டும் அதற்கு அனுமதி மறுக்கப்பட்டது. அதைத் தொடர்ந்து போராட்டத்தை மட்டும் தொடங்கினோம்.
மாலை 5:45 மணியளவில் தொடங்கிய இப்போராட்டத்தில், இரவு 8 மணிக்கு முன்பாக காவல்துறையினர் மாணவர்களைக் கைது செய்ய முயன்றனர். அப்போது காவல்துறையினர் மிகவும் முரட்டுத்தனமான முறையில் நடந்து கொண்டனர். பெண் தோழர்களின் ஆடைகளை இழுத்துத் தாக்கியும், ஒரு சிலர் அடிக்கப்பட்டிருக்கின்றனர்.
இந்தத் தள்ளுமுள்ளுவில் இரண்டு பெண் தோழர்களின் தோள்பட்டையில் பலத்த காயம் ஏற்பட்டுள்ளதுடன், ஒரு தோழர் மயக்கமடைந்தார். கைது செய்யப்பட்ட மாணவர்கள் எழும்பூரில் உள்ள சிந்து சதா மண்டபத்தில்
வைக்கப்பட்டு, இரவு 10 மணிக்கு மேல்தான் விடுவிக்கப்பட்டனர்.
மகளிர் மசோதா
ஆளுநர் மாளிகை முற்றுகை!
மகளிர் இட ஒதுக்கீட்டை உடனடியாக அமல்படுத்தக்கோரி சென்னை ஆளுநர் மாளிகையை தேசிய பெண்கள் கூட்டமைப்பினர் முற்றுகை யிட்டனர். சாலையில் அமர்ந்து தர்ணா போராட்டத்தில் ஈடுபட்ட பெண்களை போலீசார் தரதரவென்று இழுத்துச் சென்று கைது செய்ததால் பரபரப்பு நிலவியது.
நாடாளுமன்றம், சட்டமன்றங்களில் பெண்களுக்கான 33 சதவீத இட ஒதுக்கீட்டை உடனடியாக அமல்படுத்த வேண்டும் என்பதை வலியுறுத்தி அனைத்து பெண்கள் கூட்டமைப்பின் சார்பில் ஆர்ப்பாட்டம் நடைபெற்றது.
சென்னை சைதாப்பேட்டை ராஜீவ் காந்தி சிலை அருகில் நடைபெற்ற இந்த ஆர்ப்பாட்டத்தின் போது , மக்கள் தொகை கணக்கெடுப்பு, தொகுதி மறுசீரமைப்பு மசோதாக்களை நிறுத்திவிட்டு, 33 சதவீத இடஒதுக்கீடு மசோதாவை உடனடியாக மழைக்கால கூட்டத்
தொடரில் நிறைவேற்றவேண்டும்
என்பதை வலியுறுத்தி அவர்கள்
முழக்கமிட்டனர்.
தொடர்ந்து ஆளுநர் மாளிகை நோக்கி செல்ல முயன்ற பெண்கள்
கூட்டமைப்பினரை போலீசார் தடுத்து நிறுத்தி கைது செய்தனர். சாலையில் அமர்ந்து போராட்டத்தில் ஈடுபட்ட பெண்களை போலீசார் தரதரவென இழுத்துச் சென்று வேனில் ஏற்றியதால், அங்கு பரபரப்பு ஏற்பட்டது.