புதுடெல்லி, ஜூலை 23–
சேலம் உருக்காலையை நவீனமயமாக்கல் பற்றி கழக பொருளாளர், மக்களவை கழகக்குழுத் தலைவர் டி. ஆர். பாலு அவர்கள் எழுப்பிய கேள்விக்கு ஒன்றிய இணை அமைச்சர் பூபதி ராஜு சீனிவாச வர்மா அவர்கள் அளித்த பதில் வருமாறு:
சேலம் உருக்காலையின் உற்பத்தித் திறனைப் பெருக்குவதற்கும் நவீனமயமாக்குவதற்கும் அரசு மற்றும் இந்திய இரும்பு மற்றும் எஃகு ஆணையம் (SAIL) திட்டமிட்டுள்ளதா, ஆம் எனில், முன்மொழியப்பட்ட முதலீடு கள் உட்பட அதுகுறித்த விவரங்கள் என்ன; மற்றும் துருப்பிடிக்காத இரும்பு (Stainless Steel) ஏற்றுமதியை ஊக்குவிக்க எடுக்கப்பட்டு வரும் முயற்சிகளின் விவரங்கள் என்ன? என மக்களவையில் டி.ஆர்.பாலு எம்.பி. கேள்வி எழுப்பினார்.
பதில் : இந்திய இரும்பு மற்றும் எஃகு ஆணையத்தின் (SAIL) ஒரு அங்கமான சேலம் உருக்காலை (SSP), ஆண்டுக்கு 1.8 லட்சம் டன் எஃகு உருக்கும் திறனையும், 3.6 லட்சம் டன் எஃகு உருட்டும் (rolling) திறனையும் கொண்டுள்ளது. சேலம் உருக்காலையில் தற்போதுள்ள உற்பத்தித் திறன் முழுமையாகப் பயன்படுத்தப்படாமல் உள்ளது.
உற்பத்தித் திறன் பயன்பாட்டை மேம்படுத்துதல், செயல்பாட்டுத் திறனை அதிகரித்தல், மூலப்பொருள் மற்றும் மின்சார நுகர்வைக் குறைத்தல், மற்றும் மதிப்பு கூட்டப்பட்ட துருப்பிடிக்காத எஃகு பொருட்களுக்கு முக்கியத்துவம் அளித்து தயாரிப்பு கலவையை முறைப்படுத்து தல் உள்ளிட்ட செயல்பாட்டுத் திறன் மற்றும் நீண்டகால நிலைத்தன்மையை மேம்படுத்துவதை நோக்கமாகக் கொண்ட பல நடவடிக்கைகளை SAIL மேற்கொண்டுள்ளது. துருப்பிடிக்காத எஃகின் உள்நாட்டு மற்றும் சர்வதேச விற்பனையை ஊக்குவிப்பதற்காக SAIL தனது சந்தைப்படுத்தல் உத்தியை
சீரமைத்து வருகிறது.
இவ்வாறு ஒன்றிய அமைச் சர் பதிலளித்துள்ளார்.