புதுடெல்லி, ஜூலை 23–
நடைபெற்று வரும் நாடாளுமன்ற கூட்டத்தொடரில் ஊரக வளர்ச்சி மற்றும் பஞ்சாயத்து ராஜ் துறை அமைச்சர் ராஜிவ் ரஞ்சன் சிங்(லாலன் சிங்)கிடம் தமிழ்நாட்டில் கிராமப் பஞ்சாயத்துகளின் மேம்பாட்டிற்காக ஒன்றிய அரசு ஒதுக்கியுள்ள நிதியின் விவரங்கள்என்ன? குறிப்பாக தருமபுரி மாவட்டத்திற்காக ஒதுக்கப்பட்டுள்ள நிதியின் விவரங்கள் என்ன? என்று தருமபுரி நாடாளுமன்ற தொகுதி உறுப்பினர் ஆ.மணி கேள்வி எழுப்பினார்.
மேலும் இ-பஞ்சாயத்து மற்றும் “டிஜிட்டல் இந்தியா” திட்டங்களின் கீழ், தருமபுரி மாவட்டத்தில் கணினிமயமாக்கப்பட்டுள்ள கிராமப் பஞ்சாயத்துகளின் எண்ணிக்கை என்ன? அவற்றிற்கு வழங்கப்பட்டுள்ள டிஜிட்டல் உள்கட்டமைப்பு, பிராட்பேண்ட் இணைய இணைப்பு
மற்றும் மின்-ஆளுமை (e-Governance) வசதிகள் குறித்த விவரங்கள் என்ன?
தருமபுரி மாவட்டத்தில் உள்ள கிராமப் பஞ்சாயத்துகளின் மொத்த எண்ணிக்கை என்ன? அவற்றில் முழுமையாக கணினிமயமாக்கப்பட்டு,தற்போது இணையவழி பொதுச் சேவைகளை வழங்கும் கிராமப் பஞ்சாயத்துகளின் எண்ணிக்கை எவ்வளவு?
தருமபுரி மாவட்டத்தில் உள்ள அனைத்து கிராமப் பஞ்சாயத்துகளையும் 100 சதவீதம் டிஜிட்டல் மயமாக்கி, வெளிப்படையான, திறமையான மற்றும் தொழில்நுட்ப அடிப்படையிலான கிராம நிர்வாகத்தை உருவாக்க ஒன்றிய அரசு மேற்கொள்ள உள்ள நடவடிக்கைகள் என்ன? என்று தருமபுரி நாடாளுமன்ற உறுப்பினர் வழக்கறிஞர். ஆ.மணி கேள்வி எழுப்பி உள்ளார்.