தூத்துக்குடி, ஜூலை 23 –
ஆறுமுகநேரி இரயில் நிலையம் தூத்துக்குடி யிலிருந்து சுமார் 27 கி.மீ. தொலைவில் உள்ளது. திருநெல்வேலியிலிருந்து திருச்செந்தூருக்கு ஆறுமுகநேரி வழியாக அகல இரயில் பாதையில் இரயில் போக்குவரத்து தொடர்ந்து நடைபெற்று வருகிறது.
திருச்செந்தூர் அருள்மிகு சுப்பிரமணிய சுவாமி திருக்கோயிலில் சுவாமி தரிசனம் செய்ய ஆயிரக்கணக்கான பக்தர்கள் தினமும் வருகின்றனர். தூத்துக்குடி திருச்செந்தூர் சாலை மார்க்கத்தில் தான் பெருவாரியான பயணங்கள் நடைபெறுகிறது. இது சாலைப் போக்குவரத்தில் அதிகமான நெருக்கடியை ஏற்படுத்துகிறது.
இந்நிலையில் தூத்துக்குடி முதல் திருச்செந்தூர் வரை இரயில் பயணத்திற்கு வழிவகை செய்வது மிக அவசியமாகிறது. இதற்கு ஏதுவாக தூத்துக்குடியிலிருந்து ஆறுமுகநேரி வரை 27 கி.மீ. தொலைவில் அகல இரயில் பாதை அமைக்க வேண்டுமென ஒன்றிய இரயில்வே துறை அமைச்சருக்கு கோரிக்கை மனு வழங்கப்பட்டுள்ளது.
இரயில் பாதை அமைப்பதற்கு கூடுதல் வாய்ப்பாக மீளவிட்டான் முதல் ஸ்பிக் தொழிற்சாலை வரை தற்போது தனி பயன்பாட்டிற்கான இரயில் பாதை உள்ளது. ஆகவே ஸ்பிக்நகர் பகுதியிலிருந்து ஆறுமுகநேரி வரை 15 கி.மீ. தொலைவிற்கு பாதை அமைத்தால் போதுமானது. கோரிக்கை மனுவில் இந்த விபரம் கோடிட்டு காட்டப்பட்டுள்ளது.
உடன்குடி அனல்மின் நிலையம் செயல்படத் துவங்கியுள்ளது. குலசேகரப்பட்டணம் இஸ்ரோ ராக்கெட் ஏவுதளம் அமைக்கும் பணி நடைபெற்று வருகிறது. தொழிற்சாலை பணியாளர்களுக்கும் பொது மக்களுக்கும் மற்றும் வட மாநிலங்களில் இருந்தும் தமிழ்நாட்டின் பிற பகுதிகளில் இருந்தும் திருச்செந்தூர் கோயிலுக்கு சுவாமி தரிசனம் செய்ய வரும் பக்தர்களுக்கும், தூத்துக்குடி திருச்செந்தூர் இரயில் பாதை மிக அவசியமாகிறது. ஆகவே தூத்துக்குடி ஆறுமுகநேரி இரயில் பாதை அமைப்பதற்கு உரிய நடவடிக்கை மேற்கொள்ள வேண்டுமென கோரிக்கை மனுவில் குறிப்பிடப்பட்டுள்ளது.