புதுடெல்லி, ஜூலை 24 –
நாட்டின் எரிசக்தி பாதுகாப்பை வலுப்படுத்தவும், வெளிநாடுகளில் இருந்து இறக்குமதி செய்யப்படும் எரிபொருட்களின் மீதான சார்பைக் குறைக்கவும் செயல்படுத்தப்பட்டு வரும் நிலக்கரி வாயுவாக்க (Coal Gasification) தி ட்டங்கள் குறித்து வேலூர் நாடாளுமன்ற உறுப்பினர் டி.எம். கதிர் ஆனந்த் மக்களவையில் கேள்வி எழுப்பினார்.
இதற்கு ஒன்றிய அரசின் நிலக்கரி மற்றும் சுர ங்கத்துறை இணை அமைச்சர் சதீஷ் சந்திர துபே அவர்கள் எழுத்து பூர்வமாக அளித்த பதில்
மத்திய அரசின் ₹8,500 கோடி நிதி ஊக்கத் திட்டத்தின் கீழ் தற்போது 8 நிலக்கரி வாயுவாக்கத் திட்டங்கள் ஒப்புதல் பெற்று பல்வேறு கட்டங்களில் செயல்படுத்தப்பட்டு வருவதாக தெரிவித்தார்.
இந்தத் திட்டங்கள் செயல்பாட்டுக்கு வந்தவுடன், இறக்குமதி செய்யப்படும் இயற்கை எரிவாயு, எத்தனால் உள்ளிட்ட பல்வேறு தொழில்துறை மூலப்பொருட்களின் தேவை குறைவதுடன், ஆண்டுக்கு சுமார் ₹16,500 கோடி அந்நியச் செலாவணி சேமிக்கப்படும் என்றும் அமைச்சர் கூறினார்.
மேலும், இந்தத் திட்டங்கள் நாட்டின் எரிசக்தி பாதுகாப்பை வலுப்படுத்துவதோடு, உள்நாட்டு நிலக்கரிக்கு கூடுதல் மதிப்பை உருவாக்கும் என்றும், ரசாயனம், பெட்ரோ கெமிக்கல், உரம், ஹைட்ரஜன் மற்றும் சுத்தமான எரிபொருள் உற்பத்தி போன்ற தொழில்துறைகளின் வளர்ச்சிக்கும் பெரும் பங்களிப்பாக இருக்கும் என்றும் அவர் தெரிவித்தார்.
நிலக்கரி வாயுவாக்கத் திட்டங்களை விரைவாக செயல்படுத்தும் நோக்கில் முதலீட்டாளர்களுக்கு நிதி ஊக்கங்கள், தொழில்நுட்ப ஆதரவு மற்றும் பல்வேறு கொள்கைச் சலுகைகள் வழங்கப்பட்டு வருவதாகவும், இந்தத் துறையில் முதலீடுகளை அதிகரிக்க மத்திய அரசு தொடர்ந்து நடவடிக்கைகள் மேற்கொண்டு வருவதாகவும் அமைச்சர் விளக்க மளித்தார்.
மேலும், 2026-ஆம் ஆண்டு அறிவிக்கப்பட்ட புதிய ஊக்கத் திட்டத்தின் மூலம் சுமார் 25 புதிய நிலக்கரி வாயுவாக்கத் திட்டங்கள் உருவாகும் என்றும், ரூ.2.5 லட்சம் முதல் ரூ.3 லட்சம் கோடி வரை முதலீடுகள் ஈர்க்கப்படும் என்றும், 50 ஆயிரத்திற்கும் மேற்பட்ட நேரடி மற்றும் மறைமுக வேலைவாய்ப்புகள் உருவாகும் என்றும் ஒன்றிய அமைச்சர் தனது பதிலில் தெரிவித்தார். இத்திட்டங்கள் முழுமையாக செயல்பாட்டுக்கு வந்தால் ஆண்டுதோறும் ரூ.1.5 லட்சம் கோடி அளவுக்கு அந்நியச் செலாவணி சேமிக்கப்படும் என்றும் அவர் குறிப்பிட்டார்.