புதுடெல்லி, ஜூலை 25–
நீட் தேர்விற்கு எதிராகப்போராடியதால் ஒன்றிய பா.ஜ.க. அரசின் அடக்குமுறைக்குள்ளாகி காயம்பட்ட மாணவர்களின் உறவினர்களை மருத்துவமனையில் சந்தித்த பின் திமுக துணை பொதுச்செயலாளர் மக்களவை உறுப்பினர் ஆ.ராசா அவர்களின்செய்தியாளர் சந்திப்பில் வருமாறு:–
காயம்பட்ட மாணவர்களைச் சந்திக்கக் கூட அனுமதி மறுக்கும் கொடுங்கோல் ஆட்சி.
நீட் தேர்விற்கு எதிராக தலைநகரில் வீறுகொண்டு போராடிய மாணவர்களுக்கு எதிராகநடத்தப்பட்ட வன்முறை மற்றும் ஒடுக்குமுறையில் காயமடைந்த மாணவர்கள் ராம் மனோகர் லோகியா மருத்துவமனையில் அனுமதிக்கப்பட்டிருக்கிறார்கள் என்பதை அறிந்து திராவிட முன்னேற்றக் கழகத்தினுடைய தலைவர் முன்னாள் தமிழ்நாடு முதலமைச்சர மு.க.ஸ்டாலின் அவர்கள் உத்தரவின் பேரில் நாடாளுமன்ற உறுப்பினர்களாகிய நாங்கள் மருத்துவ மனைக்கு வந்து, மருத்துவமனையினுடைய கண்காணிப்பாளரைச் சந்தித்த நேரத்தில், மாண வர்கள் அவசர சிகிச்சைப் பிரிவிலே சிகிச்சை பெற்று வருவதால் அவர்களைப் பார்க்க அனுமதிக்க இயலாது என்பதாகச் சொன்னார்கள்.
அவர்களுக்கு அளிக்கப்படுகின்ற மருத்துவ சிகிச்சையைக் கண்காணிப்பாளரிடம் கேட்டறிந்தோம். அவர்களுடைய உறவினர்களைச் சந்தித்து ஆறுதல் கூறினோம். அவர்களைச் சந்திப்பதற்கே சுகாதாரத் துறை அமைச்சரிடமிருந்து அனுமதி தந்தால்தான் சந்திக்க அனுமதிக்க வேண்டும் என்று இந்த மருத்துவமனையினுடைய கண்காணிப்பாளரை ஒன்றிய அரசு மிரட்டி உள்ளது.
ஒரு நோயாளியைச் சந்திப்பதற்குக்கூட ஒன்றிய அரசின் அனுமதியைப் பெற்றுத்தான் சந்திக்க வேண்டும் என்று ஒரு கண்காணிப்பாளர் சொல்கின்ற அளவிற்கு, ஒரு கொடுங்கோன்மையான ஆட்சி இங்கே நடைபெற்றுக் கொண்டிருக்கிறது.
இவ்வாறு ஆ.ராசா எம்.பி. அவர்கள் தெரிவித்தார்.