#Title

வேலூர் மாவட்டத்தில் பெரும்பாலானோருக்கு வாழ்வாதாரமாக விளங்கும் தோல் தொழிற்சாலைகளின் வளர்ச்சிக்கான நடவடிக்கைகள் என்ன? மக்களவையில்– டி.எம். கதிர் ஆனந்த் கேள்வி !

புதுடெல்லி, ஜூலை 25–

வேலூர் மாவட்டம் தோல் தொழில், தொழிற்சாலை உபகரணங்கள், மற்றும் அதனுடன் சார்ந்த உற்பத்தி தொழில்களின் (MSME) முக்கிய மையமாக விளங்கி வருகிறது. ஆயிரக்கணக்கான தொழிலாளர்களின் வாழ்வாதாரமாக இருக்கும் இந்தத் தொழில்கள் மேலும் வளர்ச்சி பெறவும், புதிய வேலைவாய்ப்புகள் உருவாகவும், தொழில்களுக்கு தேவையான நவீன உள்கட்டமைப்பு, தொழில்நுட்ப வசதிகள், சந்தை வாய்ப்புகள் மற்றும் ஒன்றிய அரசின் ஆதரவுத் திட்டங்கள் முழுமையாக கிடைக்க வேண்டும் என்ற நோக்கில், வேலூர் மக்களவை உறுப்பினர் டி.எம். கதிர் ஆனந்த் மக்களவையில் கேள்வி எழுப்பினார்.

வேலூர் மாவட்டத்தில் செயல்பட்டு வரும் MSME தொழில் குழுமங்களின் தற்போதைய நிலை, அவற்றின் வளர்ச்சி வாய்ப்புகள், தொழில்கள் எதிர்கொள்ளும் சவால்கள், உள்கட்டமைப்பு வசதிகளில் உள்ள குறைபாடுகள், தொழில்நுட்ப மேம்பாடு, வங்கிக் கடன் வசதி, திறன் மேம்பாட்டுப் பயிற்சி, சந்தை வாய்ப்புகள் மற்றும் மத்திய அரசு செயல்படுத்தியுள்ள திட்டங்களின் பயன்கள் குறித்து விரிவான விளக்கம் அளிக்கவும்?

இதற்கு பதிலளித்த குறு, சிறு மற்றும் நடுத்தர தொழில்துறை இணை அமைச்சர் திருமதி.ஷோபா கரந்த்லாஜே எழுத்து பூர்வமாக அளித்த பதில் வருமாறு :

குறு மற்றும் சிறு தொழில் குழும மேம்பாட்டுத் திட்டம் Micro and Small Enterprises – Cluster Development Programme (MSE-CDP) திட்டத்தின் கீழ், வேலூர் மாவட்டத்திற்கு தொழில் குழுமத்திற்கான ஒரு பொது வசதி மையம் (Common Facility Centre) அமைக்கப்பட்டுள்ளதாகவும், மேலும் 4 உள்கட்டமைப்பு மேம்பாட்டுத் திட்டங்கள் வெற்றிகரமாக நிறைவேற்றப்பட்டுள்ளதாகவும் தெரிவிக்கப்பட்டுள்ளது.

மேலும், மாநில அரசுகளின் பரிந்துரைகளின் அடிப்படையில் தொழில்கள் எதிர்கொள்ளும் சவால்கள், உள்கட்டமைப்புத் தேவைகள், தொழில்நுட்ப மேம்பாடு,உற்பத்தித் திறன் உயர்வு, தர மேம்பாடு மற்றும் பொதுவசதிகள் உள்ளிட்ட பல்வேறு அம்சங்கள் ஆய்வு செய்யப்பட்ட பின்னரே மத்திய அரசின் ஒப்புதல் வழங்கப்படுவதாகவும் பதிலில் குறிப்பிடப்பட் டுள்ளது.

தேசிய உற்பத்தித்திறன் கவுன்சில் (NPC) மேற்கொண்ட மதிப்பீட்டின் அடிப்படையில், MSE-CDP திட்டம் தொழில்களின் உற்பத்தித் திறனை உயர்த்தவும், புதிய தொழில்நுட்பங்களை அறிமுகப்படுத்தவும், தரத்தை மேம்படுத்தவும், சந்தை வாய்ப்புகளை விரிவுபடுத்தவும், வேலைவாய்ப்புகளை அதிகரிக்கவும் குறிப்பிடத்தக்க பங்களிப்பை வழங்கியுள்ளதாகவும் தனது பதிலில் தெரிவித்துள்ளார்.