சென்னை, ஜூலை 26–
நீதிமன்றத்தில் வழக்கு நிலுவையில் இருக்கும் நிலையில், காரைக்குடியைச் சேர்ந்த தமிழக வெற்றிக் கழகத்தின் மூத்த நிர்வாகி ஒருவர், பஞ்சாயத்து முறையில் சமரசக் கூட்டம் நடத்தி, மருத்துவ அலட்சிய குற்றச்சாட்டை எதிர்கொள்ளும் இரண்டு மருத்துவர்களை நோயாளியின் குடும்பத்துக்கு ₹50 லட்சம் வழங்குமாறு கட்டாயப்படுத்தியதாக இந்திய மருத்துவ சங்கத்தின் (IMA) தமிழ்நாடு கிளை குற்றம் சாட்டியுள்ளது.
சில வாரங்களுக்கு முன்பு, பைமோசிஸ் (Phimosis) என்ற, ஆணுறுப்பின்பிரச்சினையால் பாதிக்கப்பட்ட 10 வயது சிறுவ னுக்கு, காரைக்குடியில்உள்ள ஒரு மருத்துவமனையில் அறுவைச் சிகிச்சை செய்யப்பட்டது.
அறுவைச் சிகிச்சைக்குப் பிறகு, இரத்த ஓட்டம் பாதிக்கப்பட்டதால் உறுப்பில் கருமை நிறமாக மாறிய சிக்கல் ஏற்பட்டது. பின்னர் அவர் மதுரையில் உள்ள ஒரு மருத்துவரிடம் அனுப்பப்பட்டு, அந்தப் பிரச்சினைக்காக மேலும் ஒரு அறுவைச் சிகிச்சை மேற்கொள்ளப்பட்டது.
“மருத்துவ அலட்சியத்தால்தான் இந்தச் சிக்கல் ஏற்பட்டது” என்று ஊடகங்களிடம் தெரிவித்த சிறுவனின் பெற்றோர், முதலமைச்சரின் தனிப்பிரிவுக்கு புகார் மனு அனுப்பினர்.
வியாழக்கிழமை வெளியிட்ட அறிக்கையில், இந்தச் சம்பவம் தொடர்பான மருத்துவ மற்றும் சட்ட ரீதியான உண்மைகளை ஏற்கனவே ஊடகங்களுக்கு விளக்கி யுள்ளதாக இந்தியமருத்துவ சங்க தமிழ்நாடு கிளை தெரிவித்தது.
மேலும், மருத்துவர்களுக்கு எதிராக பொய்யான மற்றும் தவறாக வழிநடத்தும் வகையிலான ஊடக மற்றும் சமூக ஊடக பிரசாரங்களில் இருந்து பாதுகாப்பு கோரி, சம்பந்தப்பட்ட மருத்துவர்கள் நீதிமன்றத்தை அணுகியுள்ளதாக, இந்திய மருத்துவ சங்க மாநிலத் தலைவர் டாக்டர் பி. ஸ்ரீதர் (காரைக்குடியில் மருத்துவம் செய்து வருபவர்) கூறி யுள்ளார்.
அந்த அறிக்கையில், காரைக்குடியைச் சேர்ந்த ஒரு “செல்வாக்கு மிக்க ஆளும் கட்சி நிர்வாகி” இரு தரப்பினரையும் அழைத்து கட்டப் பஞ்சாயத்து முறையில் சமரசக் கூட்டம் நடத்தியதாகவும், அதன் பின்னர் மருத்துவர்கள் பாதிக்கப்பட்ட குடும்பத்துக்கு குறிப்பிட்ட தொகையை வழங்கியதாகவும் கூறப்பட்டுள்ளது.
இந்திய மருத்துவ சங்க நடவடிக்கைக் குழுத் தலைவர் டாக்டர் கே. பிரகாசம், அந்த அறிக்கையின்இணை கையொப்பதாரராக இருந்து,மருத்துவர்கள் உடனடியாக குடும்பத்தினரின் கணக்குக்கு பணம் அனுப்ப வேண்டிய சூழ்நிலைக்கு தள்ளப்பட்டதாக தெரிவித்தார்.
அவர் மேலும் கூறுகையில், “வழக்கு நீதிமன்றத்தில் நிலுவையில் இருக்கும் நிலையில் இவ்வாறு நடப்பது மிகவும் ஆபத்தான முன்னுதாரணமாக அமைந்து விடும். மருத்துவர்களிடம் இருந்து இழப்பீடு பெறுவதற்கான வழிமுறையாக வெளிப்புற அழுத்தம் மாறினால், அது மருத்துவர்களிடையே அச்சத்தை ஏற்படுத்தும். இதனால் சிக்கலான மற்றும் அதிக ஆபத்துள்ள சிகிச்சைகளை மேற்கொள்ள மருத்துவர்கள் தயங்கக்கூடும். அதன் விளைவாக நோயாளிகளின் சிகிச்சை மற்றும் ஒட்டு மொத்த சமூக நலனும் பாதிக்கப்படும்,” என்றார்.