புதுடெல்லி, ஜூலை 26–
சென்னை சர்வதேச விமான நிலையத்தை மேம்படுத்துவதற்காக நடைபெற்றுவரும் பணிகள் தாமதமாவதற்கான காரணங்கள் என்ன என்றும் நிறுத்தப் பட்ட சேவைகளை மீண்டும் தொடங்குவதற்காக எடுக்கப்பட்ட நடவடிக்கைகளின் விவரங்கள் என்ன என்றும் நாடாளுமன்றத்தில் விமானப் போக்கு
வரத்துத் துறைஅமைச்சர்
கிஞ்சராபு ராம்மோகன் அவர்களிடம் கழக நாடாளுமன்றக் குழுத் துணைத்தலைவரும் மத்திய சென்னை நாடாளுமன்ற உறுப்பினருமான தயாநிதி மாறன் பல கேள்விகளை எழுப்பியுள்ளார்.
அதன் விவரங்கள் வருமாறு:-
இந்தியாவின் மிகப் பழமையான மற்றும் அதிக பயணிகள் போக்குவரத்துகொண்ட விமான நிலையங் களில் ஒன்றாக விளங்கும் சென்னை சர்வதேச விமான நிலையத்தின்பயணிகள் எண்ணிக்கை மற்றும் தேசிய அளவிலான தரவரிசை கடந்த சில ஆண்டுகளில் குறைந்து வருவதற்கான காரணங்கள் என்ன? அதுகுறித்து ஒன்றிய அரசு ஆய்வு செய்துள்ளதின் விவரங்கள் என்ன?
கடந்த ஐந்து ஆண்டுகளில் சென்னை சர்வதேச விமானநிலையத்தின் பயணிகள் கையாளும் திறனை அதிகரித்தல், பயணிகள் வசதிகளை மேம்படுத்துதல், விமான நிலைய உள்கட்டமைப்பை நவீன மயமாக்குதல் மற்றும் ஓடுபாதை நெரிசலைக் குறைத்தல் ஆகிய நோக்கங்களுக்காக மேற்கொள்ளப்பட்ட திட்டங்கள் என்ன? அவற்றிற்காக செலவிடப்பட்ட நிதி மற்றும் திட்டங்களின் தற்போதைய நிலை விவரங்கள் என்ன?
விமான வழித்தடங்கள் ரத்து செய்யப்படுதல், விமான இயக்கத்திற்கான கால இடைவெளி (slot) கிடைப்பதில் உள்ள பற்றாக்குறை மற்றும் உள்கட்டமைப்புச் சிக்கல்கள் ஆகியவை சென்னையின் உள்நாட்டு மற்றும் சர்வதேசவிமான இணைப்பில் ஏற்படுத்தியுள்ள பாதிப்பை அரசு ஆய்வு செய்துள்ளதா? அவ்வாறாயின் நிறுத்தப் பட்ட சேவைகளை மீண்டும் தொடங்குவதற்காக எடுக்கப்பட்ட நடவடிக்கைகளின் விவரங்கள் என்ன?
சென்னை சர்வதேச விமான நிலையத்தில் தற்போது நடைபெற்று வரும் ஒருங்கிணைந்த முனைய (Integrated Terminal) விரிவாக்கத் திட்டம் மற்றும் ஓடுபாதைக்கு (Runway) இணையாகச் செல்லும் பிரத்யேகப் பாதையான டாக்ஸிவே (Parallel Taxiway) திட்டங்களை நிறைவு செய்வதில் ஏற்படும் கால தாமதத்திற்கான காரணங்கள் மற்றும் அவற்றை நிறைவு செய்வதற்காக நிர்ணயிக் கப்பட்டுள்ள காலக்கெடு என்ன?
தமிழ்நாட்டின் முக்கிய விமானப் போக்குவரத்து நுழைவாயிலாக விளங்கும் சென்னை சர்வதேச விமான நிலையம், போதுமான உள்கட்டமைப்பு மற்றும் திறன் மேம்பாட்டின் மூலம் பயணிகள், விமான சேவைகள் மற்றும் முதலீடுகளை பிற பெருநகர விமான நிலையங்களிடம் இழக்காமல், எதிர்காலத் தேவைகளைப் பூர்த்தி செய்யும் வகையிலும், உலகத் தரத்தில் போட்டித்தன்மையுடன் செயல்படும் வகையிலும் உருவாக்க ஒன்றிய அரசு வகுத்துள்ள நீண்டகால செயல் திட்டம் மற்றும் கொள்கை என்ன?
இவ்வாறு அவர் கேள்வி எழுப்பினார்.