#Title

பல்லாயிரக்கணக்கில் மாணவர்கள் திரண்டனர்! தமிழ்நாட்டில் ‘நீட்’ தேர்வுக்கு எதிரான போராட்டம் தீவிரம்! புதுடெல்லியில் இணையதள சேவை முடக்கம் – மோடி அரசுக்கு எதிராக கண்டன முழக்கம்!

புதுடெல்லி, ஜூலை 26–

இந்தியா முழுவதும் பல்லாயிரக்கணக்கில் மாணவர்கள் திரண்டனர். தமிழ்நாட்டிலும் நீட் தேர்வுக்கு எதிராக மாணவர்கள் களத்தில் இறங்கி தொடர் போராட்டத்தில் ஈடுபட்டு வருகின்றனர்.

புதுடெல்லியில் நீட் தேர்வுக்கு எதிரான போராட்டம் வலுத்து வருவதால் அடுத்த இரண்டு தினங்களுக்கு, நகர் முழுவதும் இணையதள சேவையை முடக்க ஒன்றிய அரசு திட்டமிட்டுள்ளது.

நீட் உள்ளிட்ட நுழைவுத் தேர்வுகளில் நடைபெற்ற வினாத்தாள் கசிவு மற்றும் முறைகேடு களுக்கு பொறுப்பேற்று, ஒன்றிய கல்வி அமைச்சர் தர்மேந்திர பிரதான் பதவி விலகக் கோரி கரப்பான் பூச்சி ஜனதா கட்சியினர் கடந்த ஜூன் 21ஆம் தேதி முதல் டெல்லி ஜந்தர் மந்தரில் தொடர் போராட்டத்தை நடத்தி வருகின்றனர். ஏராளமான இளைஞர்கள் மோடி அரசுக்கு எதிராக கண்டன முழக்கங்களை எழுப்பி வருகின்றனர்.

நேற்று 35வது நாளாக நீடிக்கும் இந்தப் போராட்டத்திற்கு ஆதரவு தெரிவித்து, நாட்டின் பல்வேறு பகுதிகளில் இருந்து ஜந்தர் மந்தரில், பல்லாயிரக்கணக்கான இளைஞர்கள் குவிந்து வருகின்றனர். இன்றும் நாளையும் விடுமுறை தினம் என்பதால் போராட்டத்தில் ஏராளமானோர் பங்கேற்பார்கள் என்பதால் டெல்லிநகரம் முழுவதும் இணையதளச் சேவை முடக்கப்பட்டுள்ளது. போராட்டம் நடைபெறும் பகுதிகளில் ஏராளமான அதிரடிப்படையினர் குவிக்கப்பட்டுள்ளதால் தொடர்ந்து பதற்றம் நிலவுகிறது.

மாணவர் போராட்டத்தை

தடுக்கும் த.வெ.க. அரசு!

இதனிடையே, மாணவர்களின் போராட்டத்திற்கு அஞ்சி, மெரினாவை 2வது நாளாக த.வெ.க. அரசு மூடிவைத்துள்ளது. மெரினாவில் மாணவர்கள் போராட்டம் நடத்த வாய்ப்புள்ளதால், அதனை தடுக்கும் நோக்கில், த.வெ.க. அரசு காவல்துறையை குவித்து வைத்துள்ளது. கடற்கரைக்கு வருபவர்கள் தீவிர சோதனைக்கு பிறகே காவல்துறையினர் அனுமதித்து வருகின்றனர்.

மேலும், சென்னை, மதுரை உள்ளிட்ட பல்வேறு பகுதிகளில் நீட்டுக்கு எதிராக மாணவர்கள் போராட்டம் நடத்தினர். மாணவர்களின் போராட்டத்தை த.வெ.க. அரசின் காவல்துறை தடுத்து வருகிறது.

உளுந்தூர் பேட்டையில்

மாணவரணி – இளைஞர் அணியினர்

ஆர்ப்பாட்டம்!

நீட் தேர்வை ரத்து செய்யக்கோரி உளுந்தூர்பேட்டையில் நேற்று சாலை மறியலில் ஈடுபட்ட திமுக மாணவரணி மற்றும் இளைஞரணி யினர் 50க்கும் மேற்பட்டோரை போலீசார் குண்டுக்கட்டாக தூக்கி கைது செய்ததால் பரபரப்பு ஏற்பட்டது. நீட் தேர்வை ரத்து செய்ய வேண்டும், டெல்லியில் போராட்டத்தில் கைது செய்யப்பட்ட அனைவரையும் விடுதலை செய்ய வேண்டும், ஒன்றிய கல்வி அமைச்சர் தர்மேந்தர் பிரதான் உடனே பதவி விலக வேண்டும் உள்ளிட்ட பல்வேறு கோரிக்கைகளை வலியுறுத்தி உளுந்தூர்பேட்டை பேருந்து நிலையம் அருகில் நேற்று முன்தினம் தி.மு.க. மாணவரணி மற்றும் இளைஞரணி சார்பில் சாலை மறியல் போராட்டம் நடைபெற்றது.

தகவல் அறிந்து சம்பவ இடத்துக்கு வந்த உளுந்தூர்பேட்டை போலீசார் மறியல் போராட்டத்தில் ஈடுபட்ட திமுகவினரை கலைந்து செல்லுமாறு கூறினர். ஆனால் அதை ஏற்க மறுத்த தி.மு.க.வினர் போராட்டத்தை தொடர்ந்த நிலையில் மாவட்ட மாணவரணி துணை அமைப்பாளர் குருராஜ், இளைஞரணி அமைப்பாளர்கள் முருகவேல், மனோபாலன் உள்ளிட்ட 50க்கும் மேற்பட்டோரை போலீசார் குண்டுக்கட்டாக கைது செய்து வேன்களில் ஏற்றி தனியார் மண்டபத்தில் அடைத்தனர். இதே போன்று தமிழகம் முழுவதும் நீட் தேர்வு ரத்து செய்யக்கோரி கரப்பான் பூச்சி இயக்கத்தினர் பல்வேறு மாணவர் அணி அமைப்புகள் பேராட்டங்களை தீவிரப்படுத்தி வருகின்றனர்.

அதன் தொடர்ச்சியாக, தமிழ்நாடு முழுவதும் பல்வேறு கல்லூரிகளைச் சேர்ந்த மாணவ, மாணவியர் வகுப்புகளைப் புறக்கணித்து உண்ணாவிரதம், உள்ளிருப்புப் போராட்டம், ஆர்ப்பாட்டம் உள்ளிட்ட போராட்டங்களை நடத்தி, கல்வி உரிமையைப் பாதுகாக்க வலியுறுத்தினர்.

லயோலா கல்லூரியில்

ஆர்ப்பாட்டம்!

இந்த நிலையில், சென்னை நுங்கம்பாக்கத் தில் உள்ள லயோலா கல்லூரியின் இதழியல் மற்றும் தமிழ்த்துறை மாணவர்கள் கல்லூரி வளாகத்தில்தெருக்கூத்து நிகழ்ச்சியை நடத்தி தங்களது எதிர்ப்பை வலுவாகப் பதிவு செய்தனர். தெருக்கூத்து மற்றும் நாடக வடிவில் நடைபெற்ற இந்தப் போராட்டத்தில், நீட் தேர்வு மாணவர்களின் எதிர்காலத்தைப் பாதிக்கும் கொள்கை என்றும், அதற்கு எதிராக போராடிய மாணவர்கள் மீது ஒன்றிய பாஜக அரசு மேற்கொண்ட அடக்குமுறை ஜனநாயக விரோதமானது என்றும் மாணவர்கள் சாடினர்.

மேலும், தமிழ்நாட்டில் மாணவர்களின் கோரிக்கைகளுக்கு உரிய முக்கியத்துவம் அளிக்காமல், கல்வி உரிமை, சமூகநீதி, மாநில உரிமைகள் போன்ற விவகாரங்களில் மவுனம் காக்கும் த.வெ.க. அரசின் செயல்பாடுகளுக்கும் மாணவர்கள் கடும் எதிர்ப்பை வெளிப்படுத்தினர். சமூகநீதி மற்றும் கல்வி உரிமையைப் பாதுகாக்க வேண்டும் என்ற கோரிக்கையை முன்வைத்து, ஒன்றிய பாஜக அரசையும் த.வெ.க. அரசையும் கண்டித்து முழக்கங்களை எழுப்பினர்.மாணவர்களின் இந்தப் போராட்டம் கல்லூரி வளாகத்தில் பரபரப்பை ஏற்படுத்தியதுடன், நீட் எதிர்ப்பு குரல் தமிழகம் முழுவதும் மேலும் தீவிரமடைந்து வருவதை வெளிப்படுத்துவதாக அமைந்தது.

சென்னை மாநிலக் கல்லூரி

மாணவர்கள் ஆர்ப்பாட்டம்!

இதேபோல் சென்னை, மாநில கல்லூரியின் இந்திய மாணவர் சங்கத்தைச் சேர்ந்த (SFI) மாணவர்கள் வகுப்பு புறக்கணிப்பு போராட்டத்தில் ஈடுபட்டனர்.

போராட்டத்தைத் தொடர்ந்து செய்தியாளர்களைச் சந்தித்த இந்திய மாணவர் சங்கத்தின் மாநிலச் செயலாளர் சம்சீர் அஹமத், “30 நாட்களுக்கும் மேலாக டெல்லியில் உள்ள ஜந்தர் மந்தரில் மாணவர்களின் நீட்டுக்கு எதிரான போராட்டம் நடைபெற்று வருகிறது. இந்த போராட்டத்தின் விளைவாக நேற்று நள்ளிரவில் பிரதமர் மோடி ஒரு அறிவிப்பை வெளியிட்டுள்ளார்.

அவருடைய இந்த அறிவிப்பில் எங்களுக்கு எந்தவித நம்பிக்கையும் இல்லை. அமைச்சர் தர்மேந்திர பிரதான் பதவி விலகும் வரை போராட்டம் தொடரும். இன்று முதல் மாநில கல்லூரியில் வகுப்பு புறக்கணிப்பு போராட்டம் தொடங்கியுள்ளது” என தெரிவித்தார்.

மேலும், சென்னை எழும்பூர் ராஜரத்தினம் மைதானம் அருகேயும் இந்திய மாணவர் சங்கம் மற்றும் இந்திய ஜனநாயக வாலிபர் சங்கம் சார்பில் காலவரையற்ற தொடர் போராட்டம் தொடங்கி உள்ளது. இந்த போராட்டத்தில் நூற்றுக்கும் அதிகமான மாணவர்கள் கலந்துக் கொண்டு நீட் தேர்வுக்கு எதிரான கோஷங்களையும், ஒன்றிய கல்வி அமைச்சர் தர்மேந்திர பிரதானுக்கும் எதிரான கோஷங்களையும் எழுப்பினர்.