திருச்சி, ஜூலை 26 –
பெரம்பலூர் மாவட்ட மக்கள் ரயில் போக்குவரத்து வசதியை அன்றாடம் பயன்படுத்த அரியலூர் அல்லது திருச்சிக்கு செல்ல வேண்டும் . மாவட்ட மக்களுக்கு ரயில் போக்குவரத்து வசதி என்பது கனவாகவே இதுவரை இருந்து வந்தது. பலமுறை பலர் முயற்சி செய்தும் பலன் இல்லை.
இந்நிலையில் பார்லிமெண்டில் பெரம்பலூர் எம்பி அருண் நேரு எழுப்பிய கேள்விக்கு பதிலளித்து பேசிய ரயில்வே அமைச்சர் அரியலூரில் இருந்து பெரம்பலூர் வழியாக நாமக்கல் வரை புதிய ரயில் பாதை அமைப்பது குறித்த விரிவான செயல் திட்ட அறிக்கையை தயாரிக்க ஒப்புதல் வழங்கப்பட்டுள்ளது.
இந்த செயல் திட்டம் குறித்து விரிவான ஆலோசனை மேற்கொள்ளப்பட்டு நிதி ஆயோ மத்திய நிதியமைச்சகம் மதிப்பீட்டு ஒப்புதலுக்குப் பிறகு முறையான அனுமதி வழங்கப் படும் என்று தெரிவித்தார்.
இது குறித்து பெரம்பலூர் எம்.பி. அருண் நேரு கூறும் போது, பெரம்பலூர் எம்.பி. ஆக பொறுப்பேற்றது முதல் பார்லிமென்டில் ரயில்வே பட்ஜெட் மீதான வெட்டு தீர்மானத்திலும் ரயில்வே அமைச்சர் உடன் தனிப்பட்ட சந்திப்புகளிலும் பெரம்பலூர் மாவட்டத்திற்கு நேரடி ரயில் இணைப்பு கோரி மக்களின் கோரிக்கைகளை தொடர்ந்து ரயில்வே அமைச்சகத்திடம் அழுத்தமான முறையில் வலியுறுத்தி வந்தேன். அதன் தொடர்ச்சியாக நேற்று முன்தினம் பார்லிமெண்டில் நான் எழுப்பிய கேள்விக்கு மத்திய ரயில்வே துறை தற்போது அதிகாரப்பூர்வமாக பதில் அளித்துள்ளது.
அரியலூர் ரயில் நிலையத்தில் இருந்து சுமார் 30 கிலோமீட்டர் தொலைவில் இருக்கும் பெரம்பலூருக்கு நேரடி தரைவழி போக்குவரத்து தேவையை மத்திய அரசு ஆவணப்பூர்வமாக ஏற்றுக் கொண்டுள்ளது.
அதோடு 116 கிலோ மீட்டர் நீள நாமக்கல் – பெரம்பலூர் – அரியலூர் புதிய ரயில் பாதை திட்டத்திற் கான விரிவான திட்ட அறிக்கையை தயாரிக்க முழு ஒப்புதலையும் வழங்கி உள்ளது.
இந்த ரயில் பாதை திட்டம் செயல்பாட்டுக்கு வரும்போது மக்களுக்கு எளிதான மற்றும் வேகமான பயணம், உள்ளூர் தொழில்கள் மற்றும் சரக்கு போக்குவரத்திற்கு ஊக்கமளிக்கும் உள்ளூர் பொருட்களுக்கான வலுவான விவசாய சந்தை அமையும். தொகுதியின் பொருளாதார மேம்பாடு மற்றும் வேலைவாய்ப்பு பெருகும். இந்த கனவு திட்டத்தை தொடர்ந்து முன்னெடுத்து செல்வேன் என்று கூறினார்.