#Title

தி.மு.க அரசின் சட்டமன்ற விவாதங்கள், நிர்வாக அனுபவங்களையும் மக்கள் நலத் திட்டங்களையும் ஆழமாகப் படித்து, உணர்ந்து ஆட்சி நடத்துக! மாநிலங்களவை உறுப்பினர் சு.கல்யாணசுந்தரம் அறிக்கை!

தஞ்சை, ஜூலை. 27–

அரசும், அரசுஅதிகாரிகளும் கடந்த கால தி.மு.க அரசின் ஆவணங்கள், சட்டமன்ற விவாதங்கள், நிர்வாக அனுபவங்களையும், மக்கள் நலத் திட்டங்களையும் ஆழமாகப் படித்து, உணர்ந்து ஆட்சி நடத்துக என்று மாநிலங்களவை உறுப்பினர் சு.கல்யாணசுந்தரம் அறிக்கையில் தெரிவித்துள்ளார்.

இதுகுறித்து அவரது அறிக்கை வருமாறு:–

இன்று தமிழ்நாடு உணவுப் பாதுகாப்பில் இந்தியாவுக்கே முன்னோடி மாநிலமாக திகழ்கிறது என்றால், அதன் பின்னால் பல தலைமுறைகளின் உழைப்பும், தொலைநோக்குப் பார்வையும், திராவிட இயக்க ஆட்சிகளின் விவசாயக் கொள்கைகளும் உள்ளன.

ஒரு காலத்தில் தமிழகம் கடுமையான உணவுப் பஞ்சத்தால் துடித்தது. அன்றைய காங்கிரஸ் முதலமைச்சர் கு.காமராஜரைதொடர்ந்து திரு.எம்.பக்தவத்சலம் தலைமையிலான ஆட்சிக் காலத்தில் அரிசி தட்டுப்பாடு கடுமையாக இருந்தது. வாரம் ஒரு முறை மட்டும் ரேஷன் கடைகளில்அரிசி வழங்கியதால் நீண்ட வரிசையில் மக்கள் காத்திருந்தனர். திருமண விழாக்களில் 25 பேருக்கு மேல் கலந்து கொள்ளக் கூடாது என்ற கட்டுப்பாடுகள், அத்தியாவசிய உணவுப் பொருட்களுக்கு விதிக்கப்பட்டகட்டுப்பாடுகள் ஆகியவை அந்தக் காலத்தின் நிதர்சனமாக இருந்தன. அந்தக் காலகட்டத்தில் மக்கள் கடும் பசியால் அவதிப்பட்டதாகவும், உயிர் வாழ்வதற்காக எலி போன்றவற்றையும் உணவாக பயன்படுத்தியதாகவும் பல அரசியல் உரைகளிலும் நினைவுக் குறிப்புகளிலும் குறிப்பிடப்பட்டுள்ளது. அந்த அளவிற்கு உணவுத் தட்டுப்பாடு தமிழகத்தை வாட்டியது. இதனால் பஞ்சம் பிழைக்க பல மாவட்டங்களில் இருந்து தஞ்சைக்கு குடிபெயர்ந்து வந்துள்ளனர்.

அந்த இருண்ட சூழ்நிலையில் தான் 1967-ஆம் ஆண்டு பேரறிஞர் அண்ணா தலைமையில் திராவிட முன்னேற்றக் கழகம் ஆட்சிக்கு வந்தது. “ரூபாய்க்கு மூன்று படி அரிசி; குறைந்தபட்சம் ஒரு படி நிச்சயம்” என்று அறிவித்த அண்ணா, மக்களின் பசியை அரசியலாக அல்ல, மனித உரிமையாகப் பார்த்தார்.

அண்ணா தலைமையிலான அரசு, உணவுப் பஞ்சத்தைப் போக்குவதற்கு தற்காலிகத் தீர்வுகளை மட்டுமல்ல, நிரந்தரமான விவசாய வளர்ச்சிக்கான அடித்தளத்தையும்அமைத்தது. பசுமைப் புரட்சிக்கு தமிழகத்தில் ஊக்கம் அளிக்கப்பட்டது. ஒரு போக நிலங்கள் இரு போகமாகவும், இருபோகநிலங்கள் முப்போக மாகவும் மாற்றப்பட்டன. கிணறுகள் அமைக்கப்பட்டன. பாசன வசதிகள் விரிவுபடுத்தப்பட்டன. நிலத்தடி நீர் பயன்பாடு அதிகரிக்கப் பட்டது. கலைஞர் ஆட்சி காலத் தில் தான் கூட்டுறவு துறை மூலம் நவீனஅரிசிஆலைகள் வந்தன. கிராமங்களில் கூட்டுறவு அங்காடிகள் துவங்கப்பட்டது. தனியார் நெல் கொள்முதல் மூலம் விவசாயிகளிடம் கொள்ளை லாபம் சம்பாதித்ததால் தமிழ்நாடுநுகர்பொருள் வாணிககழகம் தொடங்கப் பட்டு நேரடி நெல் கொள்முதல் நிலையங்கள் ஏற்படுத்தப்பட்டன.

விவசாயிகளுக்கு எளிதாக கடன் கிடைக்க நில வள வங்கிகள் மற்றும் கிராம கூட்டுறவு கடன் சங்கங்கள் போன்ற கூட்டுறவு நிதி அமைப்புகள் வலுப்படுத்தப்பட்டன. குறைந்த வட்டியில் கடன்கள் வழங்கப்பட்டன. விவசாயிகள் புதிய தொழில்நுட்பங்களைப் பயன்படுத்தவும், பாசன வசதிகளை மேம்படுத்தவும் ஊக்குவிக்கப்பட்டனர். உழைக்கும் விவசாயியின் கையைப் பிடித்து உயர்த்திய ஆட்சி திராவிட ஆட்சியாகும்.

இந்த நடவடிக்கைகளின் விளைவாக தமிழகத்தில் உணவு உற்பத்தி பல மடங்கு உயர்ந்தது. ஒருகாலத்தில் பிற மாநிலங்களை நம்பி உணவு பெற்ற தமிழ்நாடு, தனது தேவையை முழுமையாக பூர்த்தி செய்ததோடு, பிற மாநிலங்களுக்கும் தானியங்களை வழங்கும் அளவிற்கு வளர்ச்சி பெற்றது. விவசாய உற்பத்தி, கூட்டுறவு வளர்ச்சி, பாசன மேம்பாடு ஆகிய துறைகளில் தமிழ்நாடு இந்தியாவின் பல மாநிலங்களுக்கு முன்னோடி மாநிலமாக விளங்கியது.

அந்த அடித்தளத்தை மேலும் வலுப்படுத்தியவர் முத்தமிழறிஞர் கலைஞர்கருணாநிதி. விவசாயம் வளர வேண்டும் என்றால் நீர்வளம் பாதுகாக்கப்பட வேண்டும் என்பதை உணர்ந்து, வறட்சி காலங்களில் ஏரிகள், குளங்கள், கால்வாய்கள் தூர்வாரப்பட்டன; ஆழப்படுத்தப்பட்டன; அகலப்படுத்தப்பட்டன.

விவசாய இயந்திரமயமாக்கலுக்கு ஊக்கம் அளிக்கப்பட்டது. விவசாயிகளுக்குஆயில்இயந்திரம் , மின் மோட்டார்கள் வாங்க மாணியத்துடன் கடன் வழங்கப்பட்டது. பின்னர் அவர்களின் கடன் சுமையைக் குறைக்கும் வகையில் முழுகடனும் தள்ளுபடி செய்யப்பட்டது. அதுமட்டுமல்ல, விவசாயத்தின் உற்பத்திச் செலவைக் குறைக்கும் வரலாற்றுச் சிறப்பு மிக்க திட்டமாக விவசாயத்திற்கு இலவச மின்சாரம் வழங்கப்பட்டது. இன்று வரை தமிழ்நாட்டு விவசாயத்தின் முதுகெலும்பாக விளங்கும் இந்தத் திட்டம், இந்தியாவின் பல மாநிலங்களுக்கும் முன்னோடி திட்டமாக அமைந்தது.

அதே வளர்ச்சிப் பாதையில் திராவிட மாடல் ஆட்சின் நாயகர் மாண்புமிகு முதலமைச்சர் மு.க. ஸ்டாலின் தலைமையிலான அரசும் பயணித்து வந்ததுடன். நீர்நிலைகளைப் புதுப்பித்தல், காவிரி டெல்டா பகுதிகளில் பாசன வசதிகளை மேம்படுத்துதல், விவசாயி களுக்கான பல்வேறு நலத்திட்டங்களை விரிவு படுத்துதல், கூட்டுறவுத் துறையை வலுப்படுத்துதல், இயற்கை வளங்களை பாதுகாத்து எதிர்கால உணவுப் பாதுகாப்பை உறுதி செய்யும் நடவடிக்கைகளை மேற்கொள்வது போன்ற பணிகள் தொடர்ச்சியாக முன்னெடுக் கப்பட்டு வந்தது

இந்த வரலாறு நமக்கு ஒரு மிகப்பெரிய பாடத்தை கற்றுத் தருகிறது. நல்ல ஆட்சி என்பது தேர்தல் வெற்றியால் மட்டும் உருவாகாது; தொலைநோக்குப் பார்வை, திட்டமிடல், விவசாயிக்கு துணை நிற்கும் மனப்பான்மை, நீர்வளத்தை பாதுகாக்கும் நிர்வாகத் திறன் ஆகியவற்றின் மூலம் உருவாகிறது.

எனவே, தற்போதைய அரசும், அரசின் அதிகாரிகளும் கடந்த கால ஆவணங்கள், சட்டமன்ற விவாதங்கள், நிர்வாக அனுபவங்கள் மற்றும் முன்னோடிகளின் மக்கள் நலத் திட்டங்களை ஆழமாகப் படித்து, அதிலிருந்து பாடம் கற்றுக்கொண்டு, காலத்திற்கேற்ப புதிய திட்டங்களை உருவாக்க வேண்டும். வரலாற்றில் வெற்றி பெற்ற திட்டங்களை மக்களின் நலனுக்காக தொடர்ந்து செயல்படுத்த வேண்டும்.வெறும் சமூக வலைதளங்களில் அரசியல் செய்வதாலும், விளம்பரங்களில் சாதனைகளைச் சொல்வதாலும் மட்டும் ஒரு மாநிலமோ, ஒரு நாடோ முன்னேறாது. மக்களின் வாழ்க்கையை மாற்றும் திட்டங்கள், விவசாயத்தை காக்கும் கொள்கைகள், நீர்வளத்தை பாதுகாக்கும் நடவடிக்கைகள், உற்பத்தியைப் பெருக்கும் நிர்வாகம் ஆகியவையே உண்மையான வளர்ச்சியை உருவாக்கும். உணவுப் பஞ்சத்தில் தவித்த தமிழ்நாட்டை, உணவு வளம் மிக்க தமிழ்நாடாக மாற்றியது திராவிட ஆட்சிகள். பிறரை நம்பிய தமிழ்நாட்டை, பிற மாநிலங்களுக்கு தானியங்கள் வழங்கும் தமிழ்நாடாக உயர்த்தியது திராவிட ஆட்சிகள்.

அண்ணா அமைத்த அடித்தளத்தை கலைஞர் வலுப்படுத்தினார்; கலைஞர் உருவாக்கிய மக்கள் நலப் பாதையை மாண்புமிகு முதலமைச்சர் மு.க.ஸ்டாலின் தலைமையிலான அரசு தொடர்ந்து முன்னெடுத்து, விவசாயம், நீர்வளம், கூட்டுறவு மற்றும் மக்கள் நலத் திட்டங்களில் தமிழ்நாட்டை முன்னேற்றப் பாதையில் வழிநடத்தி வந்தது தற்போதைய சோபா மாடல் அரசின் முதல்வர் அமைச்சர்கள் மற்றும் அரசு அதிகாரிகள் மக்களை காக்க திட்டங்களை தீட்ட வேண்டுமே ஒழிய தங்களை விமர்ச்சிப்பவர்களை கைது செய்ய துடிக்ககூடாது என்று மாநிலங்களவை உறுப்பினர் சு.கல்யாணசுந்தரம் தனது அறிக்கையில் தெரிவித்துள்ளார்.