புதுடெல்லி, ஜூலை 28–
தென் சென்னை மக்களவை உறுப்பினர் தமிழச்சி தங்கபாண்டியன், ஒன்றிய ரயில்வே அமைச்சர் அஸ்வினி வைஷ்ணவ் அவர்களை நேரில் சந்தித்து, தென் சென்னை மக்களின் நீண்டகால கோரிக்கையாக உள்ள சென்னை கடற்கரை – செயின்ட் தாமஸ் மவுண்ட் எம்.ஆர்.டி.எஸ். நீட்டிப்புத் திட்டத்தின் நிலுவைப் பணிகளை விரைந்து நிறைவேற்ற வலியுறுத்தி மனு அளித்தார்.
குறிப்பாக, தென் சென்னை மக்களவைத் தொகுதிக்குட்பட்ட ஆதம்பாக்கம் எம்.ஆர்.டி.எஸ். நிலையத்தில் நடைமேடை சீரமைப்புப் பணிகளை விரைந்து முடித்து, ரயில்கள் அதிகாரப்பூர்வமாக நிற்கும் வசதியை உடனடியாக ஏற்படுத்த வேண்டும் என்றும், பாதுகாப்பு நடைமுறைகள் நிறைவடைந்த பிறகு வேகக் கட்டுப்பாடுகளை மறுபரிசீலனை செய்ய வேண்டும் என்றும் வலியுறுத்தினார்.
மேலும், புழுதிவாக்கம் எம்.ஆர்.டி.எஸ். நிலைய த்தில் எஸ்கலேட்டர்கள் உள்ளிட்ட பயணிகள் வசதிகளை விரைந்து முடித்து பொதுமக்களின் பயன்பாட்டிற்கு கொண்டுவர வேண்டும் என்றும் கேட்டுக்கொண்டார்.
தென் சென்னை பகுதியைச் சேர்ந்த ஆயிரக்கணக்கான மக்கள் தினமும் பயன்படுத்தி வரும் இந்த முக்கிய புறநகர் ரயில் வழித்தடத்தின் முழுமையான பயன் பொதுமக்களுக்கு விரைவில் கிடைக்க, எஞ்சியுள்ள அனைத்து பணிகளையும் துரிதப்படுத்துமாறு ஒன்றிய ரயில்வே அமைச்சரிடம் வலியுறுத்தினார்.
அதே சந்திப்பில், இந்திய ரயில்வேயின் பாதுகாப்பு அமைப்பில் முக்கியப் பங்காற்றி வரும் ரயில்வே சிக்னல் மற்றும் தொலைத்தொடர்பு (Signal & Telecommunication – S&T) பணியாளர்களின் நீண்டகால கோரிக்கைகள் குறித்தும் தனி மனு அளித்தார்.
அந்த மனுவில், 8 மணி நேர பணி நேர முறையை அமல்படுத்துதல், S&T தொழில்நுட்பப் பணியாளர்களுக்கு ஊதிய சமத்துவத்தை மீட்டெடுத்தல், பாதுகாப்பு பிரிவு பணிகளில் அவுட்சோர்சிங் முறையைத் தடை செய்தல், மற்றும் காலியாக உள்ள பணியிடங்களை உடனடியாக நிரப்ப ஆட்சேர்ப்பை விரைவு
படுத்துதல் உள்ளிட்ட கோரிக்கைகளை முன்வைத்தார்.
நாட்டின் ரயில்வே பாதுகாப்பை உறுதி செய்யும் இப்பணியாளர்களின் நலனையும், பயணிகளின் பாதுகாப்பையும் கருத்தில் கொண்டு, அவர்களின் நீண்டகால கோரிக்கைகளுக்கு விரைந்து தீர்வு காணுமாறு ஒன்றிய ரயில்வே அமைச்சரிடம் டாக்டர் தமிழச்சி தங்கபாண்டியன் கேட்டுக்கொண்டார்.