#Title

மரங்களை வெட்டுதல் – மரப்பொருட்களை எடுத்துச் செல்வதற்கான விதிமுறைகளை தளர்த்திட மாநில – யூனியன் பிரதேசங்களுக்கு ஒன்றிய அரசு வழிகாட்டுதல் – அறிவுரைகள்! மக்களவையில் டாக்டர் எஸ்.ஜெகத்ரட்சகன் எழுப்பிய கேள்விக்கு அமைச்சர் பதில்! பொள்ளாச்சி நா.மகாலிங்கம் மகள் – பி.கே.கிருஷ்ணராஜ் வானவராயர் துணைவியார் திருமதி கருணாம்பாள் வானவராயர் மறைவு! கழகத் தலைவர் மு.க.ஸ்டாலின் இரங்கல் செய்தி!

புதுடெல்லி, ஜூலை. 28–

திராவிட முன்னேற்றக் கழக, அரக்கோணம் நாடாளுமன்ற உறுப்பினர், டாக்டர் எஸ். ஜெகத்ரட்சகன் மக்களவையில், வேளாண் வனவியல் மரங்களை வெட்டுதல், மரப் பொருட்களை எடுத்துச் செல்வதற்கான அனுமதி நடைமுறைகள், மாநிலங்களுக்கு இடையிலான விதிமுறை வேறுபாடுகள், வேளாண் வனவியல் வளர்ச்சி, விவசாயிகளின் பங்கேற்பு மற்றும் தமிழ்நாட்டுடன் மேற்கொள்ளப்படும் ஒருங்கிணைப்பு நடவடிக்கைகள் குறித்து கேள்வி எழுப்பினார்.

ஒன்றிய அரசின் சுற்றுச்சூழல், வனம் மற்றும் காலநிலை மாற்றத் துறை இணை அமைச்சர் கீர்த்தி வர்தன் சிங்அளித்த பதில் பின்வருமாறு:-

வேளாண் வனவியல் முறையில் வளர்க்கப்படும் மரங்களை வெட்டுதல் மற்றும் மரப் பொருட்களை எடுத்துச் செல்வதற்கான அனுமதிகள், இந்திய வனச் சட்டம், 1927, மாநிலங்களின் வனச் சட்டங்கள், மாநிலங்களுக்கேஉரிய மர மேலாண்மைச் சட்டங்கள், அவற்றின் கீழ் இயற்றப்பட்ட விதிகள் மற்றும் நீதிமன்றங்களின் உத்தரவுகளின்படி சம்பந்தப்பட்ட மாநில அரசுகளால் ஒழுங்குபடுத்தப்படுவதாக அமைச்சர் தெரிவித்தார். அனுமதி விலக்கு அளிக்கப்பட்டுள்ள மர இனங்கள், மரங்களை வெட்டுதல் மற்றும் எடுத்துச் செல்வதற்கான நடைமுறைகள், தேவையான ஆவணங்கள் ஆகியவை ஒவ்வொரு மாநிலத்திலும் நடைமுறையில் உள்ள சட்டங்கள், விதிகள் மற்றும் நீதிமன்ற உத்தரவுகளின் அடிப்படையில் மாறுபடுவதாகவும் கூறினார்.

வேளாண் வனவியலை ஊக்குவிக்கும் வகையில், மரங்களை வெட்டுதல் மற்றும் மரப் பொருட்களை எடுத்துச் செல்வதற்கான விதிமுறைகளை தளர்த்துமாறு மாநிலங்களுக்கும் யூனியன் பிரதேசங்களுக்கும் ஒன்றிய அரசு பல்வேறு வழிகாட்டுதல்கள் மற்றும் அறிவுரைகளை வழங்கியுள்ளதாகவும், 2022 ஆம் ஆண்டில் மர அடிப்படையிலான தொழிற்சாலைகள் அமைத்தல் மற்றும் ஒழுங்குமுறை தொடர்பான வழிகாட்டுதல்கள் திருத்தப்பட்டு, வேளாண் வனவியலில் வளர்க்கப்படும் மர இனங்களை பயன்படுத்தும் தொழிற்சாலை களுக்கான விதிமுறைகள் தளர்த்தப்பட்டுள்ளதாகவும் தெரிவித்தார்.

இந்திய வனவியல் ஆராய்ச்சி மற்றும் கல்விக் கழகம் வேளாண் வனவியலை ஊக்குவிக்கும் நோக்கில் மர மேம்பாட்டுத் திட்டங்களை தொடர்ந்து செயல்படுத்தி வருவதாகவும், இதுவரை 69 மேம்படுத்தப்பட்ட மர ரகங்கள் மற்றும் ஒரே மரபியல் பண்புகளைக் கொண்ட பெருக்குகள் வெளி யிடப்பட்டு, அவை விவசாயிகள், வனத்துறைகள், வன மேம்பாட்டுக் கழகங்கள் மற்றும் மர அடிப்படையிலான தொழிற்சாலைகளால் பரவலாக பயன்படுத்தப்பட்டு வருவதாகவும் தெரிவித்தார். மேலும், 2022 மே மாதத்தில் மூங்கிலில் தயாரிக்கப்படும் கரியின் ஏற்றுமதி தடையின்றி அனுமதிக்கப்பட்டு, அதன் மூலம் மூங்கில் தொழில்துறையில் மதிப்புக்கூட்டல் அதிகரிப்பதற்கும், இலாபம் மற்றும் வாழ்வாதார வாய்ப்புகளை மேம்படுத்துவதற்கும் நடவடிக்கை எடுக்கப்பட்டுள்ளதாகவும் கூறினார்.

2023 மார்ச் மாதத்தில் வேளாண் வனவியல் தொடர்பான அடிக்கடி கேட்கப்படும் கேள்விகளுக்கான கையேடு வெளியிடப்பட்டு, வேளாண் வனவியல் முறைகள் மற்றும் வீட்டுத் தோட்டங்களுக்கு ஏற்ற 36 தேர்ந்தெடுக்கப்பட்ட மர இனங்களின் சாகுபடி முறைகள் விவசாயிகள் மற்றும் களப் பணியாளர்களுக்காக விளக்கப்பட்டு ள்ளதாகவும், மேலும் அகில், சந்தனம், செஞ்சந்தனம் மற்றும் கருங்காலி ஆகிய வணிக முக்கியத்து வம் வாய்ந்த நான்கு மர இனங்களின் சாகுபடி முறைகள் தொடர்பான தனித்தனி கையேடுகளும் வெளியிடப்பட்டுள்ளதாகவும் தெரிவித்தார்.

2023 டிசம்பர் மாதத்தில் தேசிய போக்குவரத்து அனுமதிச் சீட்டு முறை அறிமுகப்படுத்தப்பட்டு, மரம், மூங்கில் மற்றும் பிற வனப் பொருட்களை எடுத்துச் செல்வதற்கான அனுமதிச் சீட்டுகள் மற்றும் தடையில்லாச் சான்றிதழ்கள் இணையவழியில் வழங்கப்பட்டு வருவதாகவும், இதன் மூலம் மாநிலங்கள் மற்றும் ஒன்றியப் பிரதேசங்க ளுக்கு இடையே வனப் பொருட்களை ஒரே மின்னணு தளத்தின் மூலம் எளிதாக எடுத்துச் செல்லும் வசதி ஏற்படுத்தப்பட்டுள்ளதாகவும், நடைமுறை தாமதங்கள் குறைக்கப்பட்டு, தொழில் செய்வதற்கான எளிமை, வெளிப்படைத்தன்மை, செயல்திறன் மற்றும் கண்காணிப்புத் திறன் மேம்படுத்தப்பட்டுள்ளதாகவும் அமைச்சர் தெரிவித்தார். இதுவரை தமிழ்நாடு உட்பட நாடு முழுவதும் 4,36,258 போக்குவரத்து அனுமதிச் சீட்டுகள் வழங்கப்பட்டுள்ளன என்றும் கூறினார்.

2025 ஜூன் மாதத்தில் “வேளாண் நிலங்களில் மரங்களை வெட்டுதல்” தொடர்பான மாதிரி விதிமுறைகள் மாநிலங்கள் பரிசீலித்து ஏற்றுக்கொள்வதற்காக வெளியிடப்பட்டுள்ளதாகவும்,

இவை விவசாயிகளிடையே வேளாண் வனவியலை ஊக்குவிக்கும் நோக்கத்துடன் தனியார் வேளாண் நிலங்களில் வளர்க்கப்படும் மரங்களை வெட்டுதல் மற்றும் எடுத்துச் செல்வதற்கான நடைமுறைகளை எளிமைப்படுத்தி, சீரான ஒழுங்குமுறை, வெளிப்படைத்தன்மை மற்றும் தொழில் செய்வதற்கான எளிமையை மேம்படுத்துவதற்கான வழிகாட்டும் கட்டமைப்பை வழங்குவதாகவும் தெரிவித்தார். மேலும், தமிழ்நாடு உட்பட அனைத்து மாநிலங்கள் மற்றும் ஒன்றியப் பிரதேசங்களுடன் தொடர்ந்து ஆலோசனைக் கூட்டங்கள், பயிலரங்குகள் மற்றும் திறன் மேம்பாட்டு நிகழ்ச்சிகள் மூலம் ஒருங்கிணைந்து வேளாண் வனவியலை ஊக்குவித்து வருவதாக ஒன்றிய இணை அமைச்சர் கீர்த்தி வர்தன் சிங் எழுத்துப்பூர்வமாக அளித்த பதிலில் தெரிவித்துள்ளார்.

சென்னை, ஜூலை 28–

அருட்செல்வர் டாக்டர் பொள்ளாச்சி நா.மகாலிங்கம் அவர்களின் மகள் மறைவுக்கு கழகத் தலைவர் மு.க.ஸ்டாலின் அவர்கள் விடுத்துள்ள இரங்கல் செய்தி வருமாறு:–

புகழ்பெற்ற தொழிலதிபர், கல்வியாளர் மற்றும் காந்தியவாதியுமான அருட்செல்வர் டாக்டர் பொள்ளாச்சி நா. மகாலிங்கம் அவர்களின் மகளும் – சன்மார்க்க சபையின் தலைவரும் - கல்வித் தந்தையுமான டாக்டர் பி.கே.கிருஷ்ணராஜ் வானவ ராயர் அவர்களின் துணைவியாருமான திருமதி கருணாம்பாள் வானவராயர் அவர்கள் மறைவெய்திய செய்தியறிந்து மிகவும் வருந்தினேன்.

அவரை இழந்து வாடும் கல்வித் தந்தை டாக்டர் பி.கே.கிருஷ்ணராஜ் வானவராயர் அவர்களுக்கும் - அவரது குடும்பத்தார்க்கும், உற்றார் உறவினர்களுக்கும், நண்பர்களுக்கு எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்.

கழகத் தலைவர் அவர்கள் மேற்கண்ட இரங்கல் செய்தி வெளியிட்டதோடு, கல்வித் தந்தை டாக்டர் பி.கே.கிருஷ்ணராஜ் வானவராயர் அவர்களை அலைபேசியில் தொடர்பு கொண்டு ஆறுதல் தெரிவித்தார்.