அரியலூர், ஜூலை 28–
அரியலூரில் அறம் செய் நண்பர்கள்சங்கம் சார்பில் துவங்கப்பட்டுள்ளஅகரச் சுவடி பதிப்பகம் துவக்க விழாவில் மேனாள் அமைச்சர், அரியலூர் மாவட்ட செயலாளர், குன்னம் சட்டமன்ற உறுப்பினர், எஸ்.எஸ்.சிவசங்கர் பங்கேற்று அகர சுவடி இலச்சினையையும், ‘நிழல் தேடும் சூரியன்’ மற்றும் மடல் விடு தூது எனும் இருபது எழுத்தாளர்களின் கடித தொகுப்பையும் நூல்களாக வெளியிட்டார்.
இந்த நிகழ்வில் திரைப்பட பாடல் ஆசிரியரும், கவிஞருமான அறிவுமதி பங்கேற்றார். பின்னர் உரையாற்றிய எஸ்.எஸ்.சிவசங்கர்,
தற்போதுyoutube திறந்தாலே தமிழ்நாடு மாறி போச்சு எனும் விளம்பரம் ஒன்று ஓடிக் கொண்டிருக்கிறது. அது ஒரு நகைக்கடை விளம்பரம். தமிழ்நாடு மாத்திரமல்ல, உலகமே இது போன்ற புத்தக வெளியீட்டு நிகழ்வுகளுக்கு நேரமில்லாமல், தொடுதிரை அலைபேசியில் ஒரு முப்பது செகண்ட் ரிலீஸ் பார்ப்பதற்கு கூட நேரமில்லாமல், அதையும் அவசரமாகஅவசரமாக தள்ளி அதை பார்த்து பொழுது போக்கக்கூடிய ஒரு மனநிலை இன்று வந்திருக்கிறது.
அதிலேயே உலகை தெரிந்து கொள்வதற்கு முனைந்து, அதிலேயே கருத்துக்களை பகிர்ந்துகொள்வதற்கு முனைந்து, அதிலேயேமுடிவெடுத்து செயல்படுகின்ற ஒரு காலமாக இருக்கின்ற இந்த நேரத்தில், இந்த ஒரு இலக்கியம் சார்ந்த நிகழ்ச்சியை அதுவும் பதிப்பக துவக்க விழாவில் நூல் வெளியீட்டு விழாவாகவும் ஏற்பாடு செய்திருக்கின்ற தைரியம் வேண்டுமென்றால் அது அறம் செய்நண்பர்கள் சங்கத்தினரால்தான் முடியும்.
தமிழ்நாடு மாறவில்லை. தமிழ்நாடு மாத்திரமல்ல, உலகமே இன்னும் இலக்கிய ஆர்வத்தில் இருந்து மாறவில்லை என்பதற்கு உதாரணமாக நாங்கள் ஆர்வத்தோடு இருக்கிறோம் எனஇந்த நிகழ்வில் பெருந்திரளாக பங்கேற்றுள்ள பார்வையா ளர்களுக்கு நன்றியை தெரிவித்துக் கொள்கிறேன்.
நேற்று டெல்லியில் நடைபெற்ற நிகழ்ச்சி கூட இன்றைய இளைஞர்கள் நாங்கள் இன்னும் கருத்திலே ஆழமாக நிற்கிறோம். கொள்கையில் ஆழமாக நிற்கிறோம் என எல்லாவற்றையும் தாண்டி,ஒரு வெற்றியை பெற்றிருப்பது மிகச் சிறந்த எடுத்துக்காட்டாக விளங்குகிறது.
கடிதம் என்பது வெறுமனே கடிதம் மாத்திரமல்ல. அது கடித இலக்கியம். நம்முடைய இந்திய சுதந்திரத்திற்கு பாடுபட்ட முன்னாள் பிரதமர் ஜவஹர்லால் நேரு சிறையில் இருந்தபோது, தன்னுடைய மகள் இந்திரா காந்திக்கு கடிதம் எழுதுகிறார் அது ஒரு பெரிய கடித இலக்கியமாக வந்திருக்கிறது.
அதேபோல தமிழ்நாட்டு அரசியலை பாமரர்களின் கைகளில் கொண்டுவந்து சேர்த்த பேரறிஞர் பெருந்தகை அண்ணா தன்னுடைய தோழர்களுக்கு எழுதிய கடிதத்தை ‘தம்பிக்கு கடிதமாக’ எழுதியவர்.
அதேபோல முத்தமிழறிஞர் கலைஞர் அவர்கள் தன்னுடைய வாழ்நாள் எல்லாம் ஒவ்வொரு நாளும் தன்னுடைய அனுபவத்தை, அரசியல் நிகழ்வை, பொது விஷயங்களை எல்லாவற்றையும் கடிதமாக வடித்தவர். ‘உடன்பிறப்பே வா’ என்ற அந்தக் கடிதத்தை படித்து தான், தமிழிலே அவர் விரல் பிடித்து நடந்த காரணத்தினால் தான் எழுதக்கூடிய எண்ணத்தையும், வாய்ப்பையும் நான் பெற்றேன்.
இப்படி கடித இலக்கியத்திற்கெனதமிழில் ஒரு சிறப்பான மரபு உண்டு. ஆனால் இன்றுஅது மறைந்து
விட்டது.
அரியலூரில் துவங்கப்பட்டுள்ள அகரச்சுவடி பதிப்பகத்தின் முதல் புத்தக வெளியீட்டில் மடல் விடு தூது எனும் தலைப்பில் சுமார் 20 எழுத்தாளர்களை கடிதம் எழுத செய்து, அதை தொகுத்து புத்தகமாக வெளியிட்டுள்ளனர். ஒவ்வொருவரின் அனுபவமும், உணர்வும் இந்தக் கடிதத்தின் வாயிலாக வெளிப்படுகிறது.
நம்முடைய மண்ணில் எவ்வளவு எழுத்தாளர்கள் நிரம்பி இருக்கிறார்கள் என்கின்ற அந்தச் செய்தி, இந்த நூல் மூலம் வெளிப்படுகிறது எல்லோருக்குமான வாசல் திறந்து விடப்பட்டால் எல்லோரும் பிரகாசிப்பார்கள்என்பதற்கு இந்த நூல் மிகச் சிறந்த எளிதாக வெளிக்கொண்டு வந்துள்ளது.
நிழல் தேடும் சூரியன் எனும் தலைப்பில் வெளியாகியுள்ள மற்றொரு நூலும் அவசியம் படிக்க வேண்டிய ஒன்று. இதை எழுதியிருக்க கூடிய தோழர்கள் இன்னும் தொடர்ந்து எழுத வேண்டும். அவரவர்கள் தனது தந்தை -தாய், தன்னை பற்றி எழுதினாலே அது ஒரு நூலாகிவிடும். ஒவ்வொன்றும் ஒரு அனுபவங்கள். ஒரு மனிதனின் வாழ்க்கைபோல், இன்னொரு மனிதனின் வாழ்க்கை அமைவதில்லை.
ஏதோ ஒரு விதத்தில் எல்லோருக்கும் சிறு வித்தியாசம் இருக்கும். அந்த வித்தியாசத்தை எழுத்து வடிவில் பதிவு செய்வது என்பதுதான் எழுத்து. அந்த எழுத்து வடிவம், தமிழை உயிர்ப்பிக்கும். இந்த அவசர உலகில் இந்த தமிழ் சார்ந்த இலக்கிய நூல்கள் இவைதான் நம்மை உயிரோடு வைத்திருக்கக் கூடியவை.
ஒரு கூட்டம் சென்னையில்இருந்து கொண்டு அவர்கள் எழுதுவது மாத்திரம் தான் இலக்கியம் என சொல்லிக் கொண்டிருப்பர். புளிச்ச மாவு வாங்கியதைக் கூட ஒரு இலக்கியமாக எழுதுவார்கள். அவர்களே பத்திரிகையில் வெளியிட்டு பெருமை சேர்த்துக் கொள்வார்கள். ஆனால்எட்டு கோடி மக்கள் இருக்கின்ற தமிழகத்தில் இந்த மண்ணில் ஒவ்வொரு பகுதியிலும் அந்த மண்ணின் இலக்கியம் பிழைந்து இருக்கிறது. ஆகவே வெளியே எடுத்து வரப்பட வேண்டும் என உரையாற்றினார்.