கரூர், ஜூலை.28.
கரூர் மாவட்டத்தில் பொதுப்பணித்துறை கட்டுப்பாட்டில் உள்ள மானாவாரி நீர் நிலைகளை பாதுகாத்திட விவசாயிகள் கோரிக்கை விடுத்துள்ள னர். த.வெ.க. அரசின் அலட்சியத்திற்கு கண்டனம் தெரிவித்துள்ளனர்.
தமிழ்நாடு பொதுப்பணித்துறை நீர்நிலைகள் உள்கட்டமைப்புகளை வடிவமைத்தல், கட்டுதல் மற்றும் பராமரித்தல் போன்ற முக்கிய பணிகளை மேற்கொள்கிறது. த.வெ.க. அரசு அமைந்த பின்னர் ஏற்கனவே உள்ள திட்டங்களை தொடர்வதில் மெத்தனம் காட்டி வருகிறது. வெள்ளத் தடுப்பு மற்றும் நீர்வள ஆதாரங்களைப் பராமரிக்கும் பணிகளையும் செய்வதில்லை.
கரூர் மாவட்டத்தில் நீர்வள பாதுகாப்பு துறை அணைகள், குளங்கள், ஏரிகள் மற்றும் பாசனக் கால்வாய்களைப் பராமரித்தல் மற்றும் தூர்வாருதல், பணிகளை துரிதமாக மேற்கொள்ள வேண்டும் என விவசாயிகள் கோரிக்கை விடுத்துள்ளனர்.
கரூர் மாவட்டத்தில் உள்ள கரூர், தான்தோன்றிமலை, அரவக்குறிச்சி, குளித்தலை, கிருஷ்ண ராயபுரம், க. பரமத்தி, தோகைமலை, கடவூர் ஆகிய 8 ஒன்றியங்களில் 12 ஆயிரத்திற்கும் அதிகமான குளங்கள், குட்டைகள் நீர்வரத்து பாதைகள், நீர் சேமிப்பு ஓடைகள் நீர்நிலைகள், பண்ணை குட்டைகள் உள்ளன.
தற்போது கோடை காலம் என்பதால் அனைத்து பொதுப்பணித்துறை கட்டுப்பாட்டு நீர்நிலைகள், குளம், குட்டைகள் வறண்டு காணப்படுகிறது.
இதனை பயன்படுத்திகொண்டு பொதுப்பணித்துறை அதிகாரிகள் நீர்நிலைகளை பாதுகாத்திட கடந்த ஆட்சியின் போது நடவடிக்கை எடுத்து வந்தனர்.. குறிப்பாக கரூர் மாவட்டத்தில் பஞ்சப்பட்டி ஏரி, வெள்ளியணை குளம், ஜெகதாபி குளம், தாதம்பாளையம் ஆகிய பகுதிகளில் அமைந்துள்ள பொதுப்பணித்துறை குளங்கள் சுமார் 100 ஏக்கருக்கு மேல் 500 ஏக்கர் நிலப்பரப்பு வரை அமைந்துள்ளது.
இன்னும் ஒரு மாதத்தில் பருவமழை தொடங்கும் என்பதால் அதற்கு முன்பாக நீர்நிலைகளில் உள்ள ஆக்கிரமிப்புகள், முட்செடிகள் கழிவுகள் ஆகியவற்றை அகற்றி மழை நீர் முழுமையாக நீர்நிலை களுக்குள் செல்வதற்கு ஏற்பாடு செய்ய வேண்டும் என்று கோரிக்கை விடுக்கப்பட்டுள்ளது. கடந்த திமுக ஆட்சியில் கரூர் மாவட்டத்தில் பல்வேறு நீர்நிலைகள், நீர் ஓடைகள் குளம், குட்டைகள் தூர்வாரப்பட்டு மழைநீர் வருவதற்கு வசதி செய்யப்பட்டது. தற்போது புதிதாக பெற்றுள்ள தமிழக வெற்றி கழக அரசு விவசாய நிலத்தில் அக்கறை கொண்டு நீர் நிலைகளை பாதுகாத்திட நடவடிக்கை எடுக்கவில்லை.
இது குறித்து குறை தீர்க்கும் கூட்டங்களிலும், விவசாயிகள் குறைதீர்க்கும் நாள் கூட்டத்திலும், தொடர்ந்து வலியுறுத்தி மனுக்களை அளித்தும் பேசியும் வருகிறோம். திங்கள் தோறும் நடைபெறும் குறைதீர்க்கும் கூட்டம், மாவட்டம் முழுவதும் நடைபெற்ற ஜமாபந்தி கூட்டம், குடிகள் மாநாடு மாதம் தோறும் நடைபெறும் விவசாயிகள் குறைவிற்கும் நாள் கூட்டம் என தொடர்ந்து கோரிக்கைகளை கூறி வருகிறோம். எனினும் பார்க்கிறோம் கேட்கிறோம் என்று தான் நிர்வாகத்திடம் இருந்து பதில் பதில் வருகிறது. புதிதாக இந்த த.வெ.க அரசு நிர்வாகத்திடம் எதையும் கேட்கவில்லை. வழக்கமாக மேற்கொள்கின்ற நீர் நிலைகளை பராமரிப்பு பணிகளை செய்ய வேண்டும் என்று தான் கேட்கின்றோம்.
போர்க்கால அடிப்படையில் நடவடிக்கைகளை மேற்கொண்டு நீர்நிலைகளை பாதுகாக்கின்ற பணிகளை உடனடியாக தொடங்கிட வேண்டும் என கரூர் மாவட்ட விவசாயிகள் வலியுறுத்தியுள்ளனர்.