தூத்துக்குடி, ஜூலை 28 –
நாட்டில் சட்டம் ஒழுங்கு, காவல்துறை இருக்கிறதா ? இல்லையென்றால் சிலருக்கு மட்டும் செயல்படுவதாக காவல்துறை மாறிவிட்டதா ? என கனிமொழி கருணாநிதி
எம்.பி. கேள்வி எழுப்பியுள்ளார்.
தூத்துக்குடி மாவட்டம் – மடத்தூர் பகுதியைச் சேர்ந்த ஜெயபாண்டியனின் மகன் லிங்ககுமாருக்குச் சொந்தமான 30 சென்ட் நிலத்தில் தற்போது கடைகள் கட்டும் பணி நடைபெற்று வருகிறது.
இந்த நிலையில், கோவில்பட்டியைச் சேர்ந்த துளசி அம்மாள், போலி ஆவணங்கள் மூலம் அந்த நிலத்தை பத்திரப்பதிவு செய்து அபகரிக்க முயன்றதாகக் கூறப்படுகிறது. இது தொடர்பான வழக்கில் தூத்துக்குடி சப் – கோர்ட், துளசி அம்மாளின் மனுவை தள்ளுபடி செய்து லிங்ககுமாருக்கு ஆதரவாகத் தீர்ப்பளித்தது.
ஆனால், அதே நிலத்தை துளசி அம்மாள் மீண்டும் தூத்துக்குடியைச் சேர்ந்த சங்கரலிங்கம் உள்ளிட்டோருக்கு பத்திரப்பதிவு செய்ததாகக் குற்றச்சாட்டு எழுந்துள்ளது.
இந்நிலையில், நேற்று முன்தினம் இரவு சங்கரலிங்கத்தின் ஆதரவாள ராகக் கூறப்படும் தமிழக வெற்றிக் கழக வழக்கறிஞர் அணி அமைப்பாளர் ஜேசுதாஸ், வழக்கறிஞர் சேசு உள்ளிட்டோர் ஜே.சி.பி. இயந்திரத்துடன் அத்துமீறி நுழைந்து, லிங்ககுமார் கட்டி வந்த கட்டடத்தை இடித்ததாக புகார் தெரிவிக்கப்பட்டுள்ளது.
இந்தச் சம்பவம் தொடர்பாக லிங்க குமார் சிப்காட் காவல் நிலையத்தில் புகார் அளித்துள்ளார். ஆனால் காவல்துறையினர், புகார் அளித்த தமிழக வெற்றிக் கழக வழக்கறிஞர் அணி அமைப்பாளர் ஜேசுதாஸ் மற்றும் சங்கரலிங்கம் மனோகர், வழக்கறிஞர் சேசு ஆகியோர் மீது வழக்குப் பதிவு செய்யாமல் காலம் தாழ்த்தி வருவ தாகக் கூறப்படுகிறது. மேலும் லிங்ககுமார், அரசு மருத்துவக் கல்லூரி மருத்துவமனையில் சிகிச்சை பெற்று வருகிறார்.
இந்நிலையில் தூத்துக்குடி அரசு மருத்துவக் கல்லூரி மருத்துவமனையில் சிகிச்சை பெற்று வரும் லிங்ககுமாரை, தி.மு.க. துணைப் பொதுச் செயலாளரும், நாடாளுமன்ற தி.மு.க. குழுத் தலைவருமான கனிமொழிகருணாநிதி அவர்கள் நேரில் சென்றுபார்த்து ஆறுதல் தெரிவித்தார்.
அப்போது செய்தியாளர்களைச் சந்தித்துப் பேசிய அவர் குறிப்பிட்ட
தாவது:–
லிங்ககுமார் அவர்களுடைய இடத்தில் கட்டியிருக்கக்கூடிய கடையை இடிக்க வேண்டும், அந்த இடம் வேண்டும் என்று வழக்கறிஞர் தாஸ் என்பவர் அந்தக் குடும்பத்திற்கு மிரட்டல் விடுத்துக்கொண்டு இருக்கிறார்.
அதுமட்டுமில்லாமல், காவல் நிலையத்தில் புகார் அளிக்க லிங்ககுமார் பலமுறை முயற்சி செய்து இருக்கிறார்.ஆனால், காவல்துறை புகாரை எடுக்கத் தயாராகவே இல்லை. குற்றம் நடந்த அன்று, லிங்ககுமார் கடை கட்டியிருக்கக்கூடிய இடத்திற்கு ஜேசிபி வண்டியைக் கொண்டு வந்த தாஸ், அவருடன் பல பேரை அழைத்துக்கொண்டு கடையை இடித்துள்ளார்.
மேலும் தடுக்கப்போன லிங்க குமார், அவருடைய மனைவி, 19 வயது மகள், 16 வயது அவருடைய மகன் – இவர்கள் எல்லாரும் தாக்கப்பட்டனர். ஆனால், முதல் தகவல் அறிக்கையில் யார் தாக்கினார்கள் என்பது இல்லை.
அதுமட்டுமின்றி , அவர்கள் துப்பாக்கியை வைத்து மிரட்டியதாக லிங்ககுமார் கூறியுள்ளார். ஆனால், முதல் தகவல் அறிக்கை பதியப்படவில்லை, காவல்துறை மறுத்துள்ளதாக குற்றம் கூறுகிறார்.
மேலும், தாக்கப்பட்ட சிறுவனுக்கு 18 வயது கூட ஆகவில்லை. சிறுவர்களுக்கு எதிரான குற்றம் என்பது பதியப்பட வேண்டும். எனவே தாஸ் மீது வழக்குப் பதியப்பட வேண்டும். ஆனால் அதையும் காவல்துறை
செய்யவில்லை.
அதுமட்டுமின்றி, அவர்களுடைய மகள் மிக மோசமாகத் தாக்கப்பட்டிருக்கிறார். கத்தி, கம்பி போன்ற ஆயுதங்களைக் கொண்டு தாக்கியதால் கைகளில் காயம் ஏற்பட்டுள்ளது.
இதற்கு நடவடிக்கை எடுக்கவோ, நியாயமான முதல் தகவல் அறிக்கை பதிவோ இல்லை. ஏனென்றால், தாஸ், ஆளுங்கட்சியான தமிழக வெற்றிக் கழகம் கட்சியைச் சேர்ந்தவர். அதனால் காவல்துறை அவர் மீது எந்த நடவடிக்கையும் எடுப்பதற்குத் தயாராக இல்லை.
ஏற்கனவே நானும், முன்னாள் அமைச்சர் கீதா ஜீவன், தூத்துக்குடி மேயர் ஜெகன் மூவரும் சமீபத்தில் ‘லாக் அப்’ மரணம் அடைந்த அருணாசலம் வீட்டிற்குச் சென்றோம். அவருடைய குடும்பத்தைச் சேர்ந்தவர்களைச் சந்தித்தோம்.
அப்போது மர்மமான முறையில் உயிரிழந்து உள்ளதாகவும், எந்தவிதத் தெளிவும் இல்லாமல், என்ன நடந்தது என்று பெற்றோர்களுக்குத் தெரி யாமல், மூடுமந்திரமாகத்தான் கதைகள் ஜோடிக்கப்படுகிறது எனவும் கண்ணீருடன் தெரிவித்தனர்.
ஒவ்வொரு முறையும் யாராவது தாக்கப்படும் போது கன்னியாகுமரியில் நடந்த சம்பவம், இந்தச் சம்பவம், என இரண்டிலும் சம்பந்தப்பட்ட குடும்பத்தைச் சேர்ந்தவர்களை குற்றவாளிகளாக, தவறான நடவடிக்கைகளில் ஈடுபட்டிருந்தவர்களைப் போல பல கதைகளை ஜோடிக்க முற்படுகிறார்கள். இது மிகவும் தவறான நடவடிக்கையாகும்.
அருணாசலத்தின் குடும்பத்தினர், “எங்களை காவல்துறை தொடர்ந்து பயமுறுத்துகிறது” என்கிறார்கள். “உங்கள்மேல் வழக்கு போடுவோம், நீங்கள் நியாயம் கேட்டுப் போராடினால் கைது செய்வதற்கு நாங்கள் தயங்க மாட்டோம்” என்றெல்லாம் காவல்துறை கூறுகிறது. இதனால் அவர்கள் பயத்தில் வாழ்ந்து கொண்டிருக்கக்கூடிய சூழல் நிலவுகிறது.
மகனை இழந்த குடும்பம் பயத்தோடும், அச்சறுத்தலோடும் வாழ்ந்து கொண்டிருக்கக்கூடிய சூழலைப் பார்க்கிறோம். காவல்துறையை நேரடியாக வைத்துக் கொண்டிருக்கக்கூடிய முதலமைச்சர், இவை எதற்கும் பதிலளிக்கவில்லை.
அதிலும், லிங்ககுமாரின் குடும்பம் மிக மோசமாகப் பாதிக்கப்பட்டுள்ளர்கள். முதல் தகவல் அறிக்கைகூட பதிவு செய்யப்படவில்லை, ஆளுங்கட்சியைச் சேர்ந்த நபர் ஈடுபட்டுள்ளதால், தூத்துக்குடியில் இருக்கக்கூடிய காவல்துறை – இவர்களுக்கு எதிராக செயல்பட்டுக் கொண்டிருக்கக்கிறது.
மேலும் நாட்டில் சட்டம் – ஒழுங்கு, காவல்துறை இருக்கிறதா ? இல்லையென்றால் சிலருக்கு மட்டும் செயல்படுவதாக காவல்துறை மாறிவிட்டதா என்பது தெரியவில்லை.
ஒரு நாளில் எத்தனை பிரச்சினை நடக்கும் என்ற கணக்கே இல்லை என்ற சூழலில் தமிழ்நாடு போய்க்கொண்டிருக்கிறது. ஆனால் முதல்வர் இதற்கும், ‘அமைதிதான் தனது பதில்’ என்கிறார்.
இதற்கு மன்னிப்புச் சொன்னால் போதாது, மன்னிப்பு கேட்டால் போதுமா என்றெல்லாம் கேட்டவர். தற்போது பாதிக்கப்பட்டவர்களிடம் மன்னிப்பை கூட (முதலமைச்சர்) கேட்கத்தயாராக இல்லை. சென்ற ஆட்சிக் காலத்தில் நேரடியாக அமைச்சர் அனுப்பப்பட்டார். அந்தக் குடும்பத்திற்கு நியாயம் வழங்கப்பட்டது. அங்கே குற்றத்தில் ஈடுபட்டிருக்கக்கூடியவர்கள் மீது நடவடிக்கை எடுக்கப்பட்டது. ஆனால் இன்று இவர்களிடம் பேசவில்லை, ஆறுதல் கூறவில்லை. பத்திரிகையாளர்களின் கேள்விகளுக்கு பதில் சொல்வதற்கு த.வெ.க.வில் யாரும் தயாராக இல்லை.
இவ்வாறு கனிமொழி கருணாநிதி எம்.பி. குறிப்பிட்டார்.