புதுடெல்லி, ஜூலை 28–
திராவிட முன்னேற்றக் கழக, மேலவை உறுப்பினர் எஸ்.ஆர். சிவலிங்கம் அவர்கள் 24.–07.–26 அன்று மாநிலங்களவையில் சிறு குறு விவசாயிகளின், விவசாய உற்பத்தி திறனை பெருக்கிடவும், விவசாயிகளின் ஆண்டு வருமானம் வளர்ச்சியடையவும், ஏதேனும் முயற்சிகளை ஒன்றிய அரசு மேற்கொண்டு உள்ளதா? என்றும், அவர்களுக்கு கடன் உதவி அதிக அளவில் கிடைக்கவும், விவசாயப் பொருட்களின் சந்தை வாய்ப்பை அதிகரிக்கவும், ஏதேனும் நடவடிக்கைகள் எடுக்கப்பட்டுள்ளதா? என்றும் ஒன்றிய அரசின் விவசாயத் துறை இணையமைச்சர் ராம்நாத் தாகூர் அவர்களிடம் விரிவான கேள்வியை எழுப்பினார்.
ஒன்றிய அரசின் விவசாயத் துறை இணையமைச்சர் அவர்கள் அளித்த பதில் பின்வரு மாறு:–
விவசாயம் மாநில அரசின் பட்டியலில் இருப்பதால், கொள்கை முடிவுகள் மூலமே ஒன்றிய அரசு மாநிலங்களுக்கு துணை செய்ய இயலும் என்றும், பல்வேறு ஒன்றிய அரசின் திட்டங்கள், அதிக பட்ச விலை நிர்ணயம், கடன் உதவி திட்டங்கள், சந்தை வாய்ப்புகளை அதிகப்படுத்துதல், போன்ற வற்றின் மூலம் ஒன்றிய அரசின் விவசாயத் துறை மாநிலங்களுக்கு உதவி வருகிறது என்றும், கடந்த 2025––26 ஆண்டில் உணவு பொருட்கள் உற்பத்தியின் அளவு 376 மில்லியன் டன்களாக உயர்ந்துள்ளது என்றும், தோட்டக்கலை பொருட்களின் உற்பத்தி 378 மில்லியன் டன்களாக உயர்ந்துள்ளது என்றும் இணையமைச்சர் மாநிலங்களவையில் தெரிவித்தார்.
மேலும் கிஷான் கடன் அட்டைகள் திட்டம் மூலமாக 28 இலட்சம் கோடிகள் அளவிற்கு கடன் உதவி அளிக்கப்பட்டுள்ளது என்றும், பயிர் பாதுகாப்பீடு திட்டம் இராம் என்றைழைக்கப்படும் தேசிய விவசாயத்திற்கான திட்டம், ராஷ்டிரிய கிரிஷி விகால்ப திட்டம், எண்ணெய் வித்துக்களுக்கான திட்டம், மண் வளத்தை பாதுகாக்கும் திட்டம் ஆகிய திட்டங்களை கிரிஷி விக்யான் கேந்திராக்களின் மூலம் மாநிலங்களில் ஒன்றிய அரசு செயல்படுத்தி வருகிறது என்றும், வானிலை மாற்றத்தால் பாதிக்கப்படும் 651 மாவட்டங்களுக்கான செயல் திட்டம் இந்திய விவசாய ஆராய்ச்சி குழுமத்தால் செயல்படுத்தப்படுகிறது என்றும் இதற்கான நிதியுதவி இதுவரை 151 மாவட்டங்களுக்கு வழங்கப்பட்டுள்ளது என்றும் 2900 அதிகமான புதிய பயிர் வகைகளை ஒன்றிய அரசு அளித்துள்ளது என்று ஒன்றிய அரசின் விவசாயத் துறை இணையமைச்சர் ராம்நாத் தாகூர் அவர்கள் மாநிலங்களவையில் தி.மு.க. மேலவை உறுப்பினர் எஸ்.ஆர். சிவலிங்கம் எழுப்பிய கேள்விக்கு விரிவான பதிலை அளித்துள்ளார்.