திருவள்ளூர், ஜூலை 29;–
திருவள்ளூர் மாவட்டம், கடம்பத்தூர் ஊராட்சி ஒன்றியத்திற்குட்பட்ட பேரம்பாக்கம் அரசு ஆரம்ப சுகாதார நிலையத்தில், அவசர சிகிச்சைக்காக கொண்டு வரப்பட்ட நோயாளியை ஸ்ட்ரச்சர் இல்லாததால் மரப்பலகையில் படுக்க வைத்து சிகிச்சைப் பிரிவுக்கு எடுத்துச் சென்றதாக கூறப்படும் சம்பவம் பொதுமக்கள் மத்தியில் கடும் அதிர்ச்சியையும் அதிருப்தியையும் ஏற்படுத்தியுள்ளது.
தகவலின்படி, விபத்தில் காயமடைந்த ஒருவரை சிகிச்சைக்காக பேரம்பாக்கம் அரசு ஆரம்ப சுகாதார நிலையத்திற்கு உறவினர்கள் மற்றும் பொதுமக்கள் கொண்டு வந்துள்ளனர். அப்போது, நோயாளியை அவசர சிகிச்சைப் பிரிவுக்கு அழைத்துச் செல்ல வேண்டிய ஸ்ட்ரச்சர் மருத்துவமனையில் இல்லாததால், மரப்பலகையை பயன்படுத்தி மருத்துவப் பணியாளர்கள் நோயாளியை எடுத்துச் சென்றதாக கூறப்படுகிறது. இந்த சம்பவம் தொடர்பான தகவல்கள் சமூக வலைதளங்களில் பரவி, அரசு மருத்துவமனைகளின் அடிப்படை வசதிகள் குறித்து பல்வேறு கேள்விகளை எழுப்பியுள்ளது.
சுமார் ரூ.2 கோடி மதிப்பில் கட்டப்பட்டதாக கூறப்படும் இந்த அரசு ஆரம்ப சுகாதார நிலையத்தில், போதுமான மருத்துவ உபகரணங்கள், அவசர சிகிச்சை வசதிகள் மற்றும் அடிப்படை கட்டமைப்புகள் இல்லாதது வேதனையளிப்பதாக அப்பகுதி மக்கள் தெரிவித்துள்ளனர். குறிப்பாக, உயிர் காக்கும் சிகிச்சை வழங்கப்படும் மருத்துவமனையில் ஸ்ட்ரச்சர் போன்ற அத்தியாவசிய மருத்துவ உபகரணம்கூட இல்லாத நிலை மிகவும் கவலைக்குரியது என்றும் அவர்கள் கூறியுள்ளனர்.
இந்தச் சம்பவத்தைத் தொடர்ந்து பொதுமக்கள் மற்றும் சமூக ஆர்வலர்கள் தமிழக அரசை கடுமையாக விமர்சித்துள்ளனர். , “தி.மு.க. ஆட்சிக் காலத்தில் மருத்துவத் துறையில் இந்திய அளவில் முன்னோடி மாநிலமாகப் பாராட்டப்பட்ட தமிழ்நாடு, தற்போது த.வெ.க. ஆட்சியில் அடிப்படை மருத்துவ வசதிகள்கூட பாதிக்கப்படும் நிலைக்கு தள்ளப்பட்டுள்ளதாக இந்தச் சம்பவம் எடுத்துக்காட்டுகிறது” என்று குற்றம்சாட்டியுள்ளனர்.
மேலும், “மருத்துவமனைகளின் தரத்தை உயர்த்துவதாக அறிவிப்புகள் வெளியிடப்படுகின்றன. ஆனால், கிராமப்புற அரசு மருத்துவமனைகளில் ஸ்டெச்சர் போன்ற அத்தியாவசிய உபகரணங்கள்கூட இல்லாத நிலை, அரசின் நிர்வாகத் தோல்வியை வெளிப்படுத்துகிறது. மக்களின் உயிர் பாதுகாப்பை உறுதி செய்ய வேண்டிய மருத்துவத் துறை, இன்று அலட்சியத்தின் பிடியில் சிக்கியுள்ளது” என்றும் எதிர்க்கட்சியினர் தெரிவித்துள்ளனர்.
அத்துடன், “மருத்துவத் துறையில் தமிழ்நாடு பெற்றிருந்த நற்பெயரை மீட்டெடுக்க அரசு உடனடி நடவடிக்கை எடுக்க வேண்டும். அரசு மருத்துவமனைகளில் அடிப்படை வசதிகள், மருத்துவ உபகரணங்கள் மற்றும் போதுமான மருத்துவப் பணியாளர்கள் உள்ளனவா என்பதை ஆய்வு செய்து, குறைபாடுகளை உடனடியாக சரிசெய்ய வேண்டும்” என்றும் அவர்கள் வலியுறுத்தியுள்ளனர்.
பேரம்பாக்கம் அரசு ஆரம்ப சுகாதார நிலையத்தில் ஏற்பட்டுள்ளதாக கூறப்படும் இந்தச் சம்பவம்குறித்து அதிகாரப்பூர்வ விசாரணை நடத்தி, உண்மை நிலையை வெளிப்படுத்தவேண்டும் என்றும், மருத்துவமனையில் தேவையான அனைத்து அடிப்படை வசதிகளையும் உடனடியாக ஏற்படுத்த வேண்டும் என்றும் பொதுமக்கள் கோரிக்கை விடுத்துள்ளனர்.