சென்னை, ஜூலை 29–
சென்னை தலைமைச் செயலக வளாகத்தில் புனித ஜார்ஜ் கோட்டையின், பழைய கட்டடத்தின் முதல் தளத்தில், முதல்வர் அலுவலகம் அமைந்துள்ளது. இதுவரை முதலமைச்சராக பதவி வகித்த அனைவருமே அந்த அறையில் அமர்ந்து தான் அலுவல்களை கவனித்தனர்.
இந்நிலையில் விஜய் முதல்வராக பொறுப்பேற்றதும், அவரது ஜோதிடர் அளித்த ஆலோசனையின் பேரில் அலுவலகத்தை இடமாற்றம் செய்ய முடிவு செய்யப்பட்டது. வாஸ்து சாஸ்திர முறைப்படி தலைமைச் செயலத்தில் உள்ள நாமக்கல் கவிஞர் மாளிகையின் 10வது தளத்திற்கு முதலமைச்சர் அறையை மாற்று வதற்கு அரசாணை வெளியிடப்பட்டு அங்கு முதலமைச்சர் அலுவலகம் அமைக்கும் பணி தொடங்கியுள்ளது.
இதையடுத்து இதுவரை அங்கு செயல்பட்டு வந்த தமிழ் வளர்ச்சி, செய்தி மற்றும் விளம்பரத்துறை கலைவாணர் அரங்கத்திற்கு இடம் பெயர்கின்றன. த.வெ.க. அரசின் இந்த நடவடிக்கைக்கு தலைமைச் செயலகச் சங்கம் எதிர்ப்புத் தெரிவித்துள்ளது.
வணிகவரி, பதிவு மற்றும் அறநிலையத் துறையின் கூட்ட அரங்கங்களையும் உணவறைகளையும் இடமாற்றம் செய்வது என்பது ஏற்புடையதல்ல என்றும் பணியாளர்கள் பணியாற்றுவதற்கு தேவையான இடவசதி இருக்காது என்பதோடு கோப்புகளை வைப்பதற்கும் பராமரிப்பதற்கும் போதுமான இடமே இருக்காது என்றும் தெரிவிக்கப்பட்டுள்ளது.
செய்தி மற்றும் விளம்பரத்தின் நிர்வாகத் துறையானது தலைமைச் செயலகத்தில் செயல்பட வேண்டுமேயன்றி, இயக்கத்தின் கட்டுப்பாட்டில் செயல்படுவது என்பது ஏற்புடையதல்ல என தலைமைச் செயலகச் சங்கம் எதிர்ப்பு தெரிவித்துள்ளது.