குமரி, ஜூலை. 29 –
கன்னியாகுமரி மாவட்ட ஆட்சியர் மு.பிரதாப் அவர்களை கன்னியாகுமரி கிழக்கு மாவட்ட செயலாளர் வழக்கறிஞர் ரெ.மகேஷ் 27.07.2026 அன்று மாவட்ட ஆட்சியர் அலுவலகத்தில் வைத்து நேரில் சந்தித்து முக்கிய கோரிக்கைகளை முன்வைத்தார்.
கன்னியாகுமரி மாவட்டத்தில் ஆரல்வாய்மொழி, தோவாளை, ஈசாந்திமங்கலம், கடுக்கரை, கோழிக்கோட்டுபொத்தை, செண்பகராமன்புதூர், அச்சன்குளம் போன்ற ஊர்களில் சுமார் 500-க்கும் மேற்பட்ட செங்கல் சூளைகள் அமைந்து அப்பகுதி மக்களின் பிரதான தொழிலாக உள்ளது. இந்த பகுதிகளில் உற்பத்தி செய்யப்படும் செங்கல் கன்னியா
குமரி மாவட்டத்தில் நடைபெறும் வீடு மற்றும் வணிக கட்டட வேலைகளுக்கு முக்கிய மூலப்பொருளாக பயன்படுத்தப்பட்டு வருகிறது. மேலும் செங்கல் தயாரிப்பதற்கு தேவையான மூலப்பொருளான மண் கிடைக்காமல் பல்வேறு செங்கல் சூளைகள் இயங்காமலும் உள்ளது. இந்த செங்கல் சூழைகளானது சுமார் 60 ஆண்டுகளுக்கும் மேலாக குடிசைத் தொழிலாக இயங்கி வருகிறது.
இந்த நிலையில் தற்போது கனிமம் மற்றும் சுங்கத்துறை அதிகாரிகள் செங்கல் சூளை நடத்துவதற்கு உரிய அனுமதி பெற வேண்டும் என்று கூறி ஆய்வு மேற்கொண்டு உரிமம் இல்லாத செங்கல் சூளைகளை மூடி சீல் வைக்கும் நடவடிக்கையில் ஈடுபட்டு வருகின்றனர். அதிகாரிகள் எந்தவித முன் அறிவிப்பும், உரிமம் பெறுவதற்கான வழிகாட்டு நெறிமுறைகளுடன் போதிய அவகாசம் ஏதும் அளிக்காமல் இச்செயலில் ஈடுபட்டு வருவது இத்தொழிலில் ஈடுபட்டு வரும் பல்லாயிரக்கணக்கான ஏழை குடும்பங்க ளின் வாழ்வாதாரத்தை நசுக்கும் செயலாகும். மேலும் கட்டுமான தொழிலுக்கு தேவையான செங்கல் கிடைப்பதில் தட்டுப்பாடு ஏற்பட்டு கட்டட கட்டுமான பணிகள் பாதிக்கும் நிலையும் ஏற்பட்டுள்ளது.
எனவே, மாவட்ட ஆட்சியர் பல்லாயிரக்கணக்கான ஏழை குடும்பங்களின் வாழ்வாதாரத்தை கருத்தில் கொண்டு இந்த பிரச்சனைக்கு தீர்வு காணும் வகையில் செங்கல் சூளை உரிமையாளர்கள் உரிமம் பெறுவதற்கு வழிகாட்டி நெறிமுறைகளுடன் கூடிய போதிய அவகாசம் வழங்கிட வேண்டும் என்றும், செங்கல் தயாரிப்பின் மூலப்பொருளான மண் கிடைப்பதற்கும் மாவட்ட நிர்வாகத்தின் சார்பில் தேவையான நடவடிக்கை எடுத்திட வேண்டும் என கன்னியாகுமரி கிழக்கு மாவட்ட தி.மு.க சார்பில் அளிக்கப்பட்ட மனுவில் தெரிவிக்கப்பட்டுள்ளது.
மேலும், கன்னியாகுமரி மாவட்டத்தில் செயல்படுத்த வேண்டிய பல்வேறு முக்கிய கோரிக்கைகளை மாவட்டச் செயலாளர் வழக்கறிஞர் ரெ.மகேஷ் மாவட்ட ஆட்சியரிடம் முன்வைத்தார். அதில்
1. மயிலாடி பேரூராட்சிக்குட்பட்ட மயிலாடி பகுதியில் உலகப் புகழ்பெற்ற கல் சிற்ப தொழில் நடைபெற்று வருகிறது. இங்கு தயாரிக்கப்படும் கல் சிலைகளுக்கு புவிசார் குறியீடு கிடைக்கப்பெற்றுள்ளது. இத்தொழிலில் சுமார் 5000-திற்கும் மேற்பட்ட தொழிலாளர்கள் ஈடுபட்டு வருகின்றனர். கல், சிற்ப வேலைகளுக்கு தேவையான கற்கள் தற்போது வெளி மாவட்டங்களில் இருந்து பெறப்படுவதால், அதிக செலவினம் மற்றும் காலதாமதம் ஏற்படுகிறது. எனவே, இதனை தவிர்க்கும் வகையில் அதை கன்னியாகுமரி மாவட்டத்திலேயே சிற்ப தொழிலுக்கு தேவையான கற்கள் “மயிலாடி கல்சிற்பம் மற்றும் கோவில் கட்டுமான தொழிலாளர் நலச்சங்கம்” மூலமாக பெறுவதற்கு நடவடிக்கை எடுக்க வேண்டும். மேலும், இப்பகுதியில் அடிக்கடி ஊருக்குள் புகும் வனவிலங்குகளை தடுக்க வனத்துறை சார்பில் தடுப்பு வேலி அமைக்க வேண்டும்.
2.கோவளம் சன்செட் பாயிண்ட் கடற்கரைப் பகுதியில் தோட்டக்கலைத் துறை சார்பில் பூங்கா அமைக்க முயற்சி மேற்கொள்ளப்பட்டு வருகிறது. இப்பகுதியை மீனவர்கள் வலைகளை உலர்த்தவும், மீன்பிடி சார்ந்த பணிகளுக்கும் பயன்படுத்தி வருகின்றனர். மேலும் இந்த இடத்தில் தான் மீனவ மக்கள் வழிபடும் சிலுவை பாதை புனித ஸ்தலம் மற்றும் புனித தெரேசா குடிசடியும் அமைந்துள்ளது. எனவே, மீனவ மக்களின் நலனையும் வாழ்வாதாரத்தையும் கருத்தில் கொண்டு அங்கு பூங்கா அமைக்கும் திட்டத்தை கைவிட வேண்டும்.
3. கோவளம் ஊராட்சி டி.சி நகரில் புதிய நியாயவிலைக் கடை அமைக்கவும், ரேன்சம் டவுன் பகுதியில்உள்ள பகுதி நேர நியாயவிலைக் கடையினை முழுநேர நியாய விலைக் கடையாக மாற்ற நடவடிக்கை எடுக்க வேண்டும்.
4.மகாராஜபுரம் ஊராட்சியில் புதிதாக கட்டப்பட்டுள்ள ஊராட்சி மன்ற அலுவலகத்தை உடனே திறந்து செயல்பாட்டிற்கு கொண்டு வர வேண்டி.
5.ஞாலம் மற்றும் சகாய நகர் ஊராட்சி நைனார் பொத்தை பகுதியில் ஆற்று பாலம் அமைக்கவும், கல்லறை தோட்டம் செல்வதற்கான சாலை வசதி ஏற்படுத்தவும், விவசாயிகளின் கோரிக்கையான பள்ளி கொண்டான் கால்வாயினை உடனே தூர்வார வேண்டும்.
6.செண்பகராமன்புதூர் ஊராட்சி ஆதிச்சன்புதூர் பகுதியில் இயங்கி வரும் சதீஷ் நவீன அரிசி ஆலையிலிருந்து வெளியேரும் தூசியால் அப்பகுதி மக்கள் குறிப்பாக குழந்தைகள் மற்றும் வயதான முதியோர்களுக்கு ஆஸ்துமா உள்ளிட்ட உடல் நலப்பிரச்சனைகள் ஏற்படுவதாக பொதுமக்கள் புகார் அளித்தனர். இதற்கு தேவையான நடவடிக்கை எடுக்க வேண்டும்.
7. பறக்கை ஊராட்சி பகுதியில் வீடுகளிலும் பொது இடங்களிலும் முறையாக குப்பை சேகரிக்கப்படுவதில்லை இதனால் சுகாதார சீர்கேடு ஏற்படும் அவல நிலை உள்ளது. எனவே, இதற்கு தேவையான நடவடிக்கை மேற்கொள்ள வேண்டும்.
8. நாகர்கோவில் மாநகராட்சி, 45 மற்றும் 33 வது வார்டுக்குட்பட்ட மேலசூரங்குடி பகுதியில் சுமார் 500 குடும்ப அட்டைதாரர்கள் மாதத்தில் ஒரு நாள் மட்டுமே இயங்கும் நடமாடும் நியாயவிலைக் கடை மூலமாகவும், 1 கி.மீ. தொலைவில் உள்ள குருசடி மற்றும் கார்த்திகைவடலிபகுதியில் அமைந்துள்ள நியாயவிலைக் கடைக்கு சென்று பொருட்களை வாங்குகின்றனர். எனவே, இப்பகுதியில் உள்ள பொதுமக்களின் சிரமங்களை தவிர்க்கும் பொருட்டு மேல சூரங்குடி பகுதியில் ஒரு பகுதி நேர நியாயவிலைக் கடை அமைத்திட கேட்டுக் கொள்கிறேன். இந்த நியாயவிலைக் கடைக்கு தேவையான மின்சாரம் மற்றும் கழிவறை வசதிகளுடன் கூடிய கட்டிடமும் ஊர் சார்பில் அமைத்து தருவதற்கு தயாராக உள்ளனர்.
நிகழ்வில் கன்னியாகுமரி கிழக்கு மாவட்ட தி.மு.க பொருளாளர் ஐ.கேட்சன், அகஸ்தீஸ்வரம் வடக்கு ஒன்றிய செயலாளர் எம்.மதியழகன், நாகர்கோவில் மாநகர வடக்கு மண்டல தலைவர் இ.ஜவகர், தெற்கு பகுதி செயலாளர் த.ஜீவா, மயிலாடி பேரூர் செயலாளர் சுதாகர், முன்னாள் ஊராட்சி மன்ற தலைவர்கள் கல்யாணசுந்தரம், சதிஷ்
மற்றும் செங்கல் சூளை தொழிலாளர்கள் உட்பட பலர் இருந்தனர்.