வேலூர், ஜூலை 29-–
சுப்ரீம் கோர்ட் ஆர்டர் உள்ளதால் காவிரி விவகாரத்தில் கர்நாடகாவிடம் நாம் கெஞ்ச தேவையில்லை என காட்பாடியில் தி.மு.கழகப் பொதுச் செயலாளர் துரைமுருகன் கூறினார்.
காட்பாடி காந்தி நகரில் தி.மு.க., பொதுச்செயலாளரும், முன்னாள் நீர்வளத்துறை அமைச்சருமான துரைமுருகன் நிருபர்களுக்கு பேட்டி அளித்தார். அப்போது அவரிடம் நிருபர்கள் கேட்ட கேள்விகளும், அதற்கு அவர் அளித்த பதிலும் வருமாறு;
கேள்வி:
காவிரி விவகாரம் தொடர்பாக தமிழ்நாடு முதலமைச்சர் விஜய் கர்நாடகா சென்று அந்த மாநில முதல்வரிடம் பேச்சுவார்த்தை நடத்த இருப்பது குறித்து?.
துரைமுருகன்:
காவிரியில்இரண்டு பிரச்சினை உள்ளது. ஒன்று மாதாந்திர வாரியாக நமக்கு கொடுக்க வேண்டிய தண்ணீரை கொடுக்கவில்லை. அதைக் கேட்கப் போகிறாரா அல்லது மேகதாது கட்ட வேணாம்னு பேச போறாரான்னு தெரியல. தண்ணீர் எங்களுக்கு பத்தவில்லை எனக்கேட்டால் சுப்ரீம் கோர்ட்டின் ஆர்டர் வீணாக போய்விடும்.
அதனால்தான் எங்க ஆட்சி காலத்தில கூட யாரும் போனதில்லை. ஏனென்றால் நமக்கு சுப்ரீம் கோர்ட் உரிமை கொடுத்து விட்டது. இவர்களிடம் போய் கெஞ்ச தேவை இல்லை. முதலமைச்சர் பெங்களூர் செல்வதற்கு முன்பு, எங்களை கூப்பிடா விட்டாலும் பரவாயில்லை. சட்டமன்றத்தில் உள்ள எதிர்கட்சிகளை யாவது கூட்டி ஒரு ஆலோசனை செய்திருக்கலாம். அல்லது அனைத்து கட்சிகளையும் கூட்டி ஆலோசனை செய்திருக்கலாம். அதையும் செய்யவில்லை.
மேகதாது கட்டினால் ஒரு சொட்டு
தண்ணீர் கூட கிடைக்காது!
மேகதாதுவை பொறுத்தவரை கபினி, கே.ஆர்.சாகர் தண்ணீரை 3 அணைகள் கட்டி நிறுத்தி விட்டார்கள்.
மேகதாதுவில் அணை கட்டினால் ஒரு சொட்டு தண்ணீர் கூட தமிழகத்திற்கு வராது. ஆகவே இது ஒரு நாள், அரை நாள் பிரச்சனை அல்ல 1992ம் ஆண்டில் இருந்து இருக்கின்ற பிரச்சினை.
முன்னாள் ஆட்சியில் இருந்தவர்கள் செய்த குளறுபடியால் தான் இப்படி ஆகிவிட்டதாக அமைச்சர் ஒருவர் சொல்கிறார். நான் சட்டசபையில் இருக்கும் போது கையெடுத்து கும்பிட்டு கேட்டேன். கர்நாடகாவில் யாராவது முன்னாள் அமைச்சர்கள் சரியாக செய்யவில்லை, முன்னாள் முதல்வர்கள் சரியாக செய்யவில்லை என சொல்கிறார்களா என்றால் கிடையாது. அவர்களுடைய ஒரே நோக்கம் மேகதாது தான். அதுபோல ஆயிரம் பிரச்சனை இருந்தாலும் நீங்களா? நானா? என பேசுவதை விட காரியம் ஆக வேண்டும். அமைச்சர்கள் அடக்கி வாசிக்க வேண்டும்.
முதலமைச்சர் போய் வந்த பிறகு தான் இது பற்றி என்ன பேசினார். என்ன ஆகும் என தெரியும்.
கேள்வி:
முதலமைச்சராக இருந்த போது எம்.ஜி.ஆர் போனது போல முதல்வர் விஜய்யும் கர்நாடக போய் பேசுகிறாரா?.
துரைமுருகன்:
எம்.ஜி.ஆர் போனது நாம் கோர்ட்டுக்கு போகாதபோது. அப்போது நம்மிடம் நீதிமன்ற உத்தரவு இல்லை. இப்போது நம்மிடம் கோர்ட் தீர்ப்பு உள்ளது. ஆகையால் அதோடு இது பொருந்தாது.
கேள்வி:
தற்போதைய அரசும் கடன் வாங்கி இருப்பது குறித்து?.
துரைமுருகன்:
எந்த ஆட்சியாக இருந்தாலும் கடன் வாங்காமல் ஆட்சி நடத்த முடியாது. ஆனால் வாங்கிய கடனை என்ன செய்கிறார்கள் என்பது தான் முக்கியம்.
கிளர்ச்சி எழுந்தால்
ஆட்சி மாற்றம் நடக்கும்!
கேள்வி:
மத்திய அரசுக்கு எதிராக டெல்லியில் மாணவர்கள், இளைஞர்கள் நடத்திய போராட்டம் வெற்றி பெற்றது குறித்து?.
துரைமுருகன்:
எங்கேயுமே மாணவர்கள் கிளர்ந்து எழுந்தால் ஆட்சி மாற்றம் தான் நடக்கும். வங்கதேசம் போன்ற நாடுகளிலும் அது நடந்துள்ளது. இதே போன்றுதான் 1965ல் இந்தி எதிர்ப்பு போராட்டத்தை நாங்கள் நடத்தினோம். ஒரு ஆட்சி மாற்றத்தையே ஏற்படுத்தவில்லையா?. மாணவர் சமுதாயம் என்பது லேசானது அல்ல. வெளியே இருக்கும் வரை தனியாக இருப்பான். ஆனால் ஒன்றாக சேர்ந்து விட்டால் அவனது சரித்திரம் பெரிதாகிவிடும்.
கேள்வி:
டெல்லியில் போராடிய இளைஞர்களின் தாக்கம் 2029 நாடாளுமன்ற தேர்தலில் எதிரொலிக்குமா?.
துரைமுருகன்:
நான் ஜோசியன் அல்ல.
கேள்வி:
பா.ஜ.க.வுடன் தி.மு.க., நெருங்குவதாக எதிர்க்கட்சிகள் குற்றம் சாட்டுவது குறித்து?.
துரைமுருகன்:
பாரதிய ஜனதா கட்சியிடம் நாங்கள் நெருங்கவில்லை. காங்கிரஸ் கூட்டணியில் இருந்து நாங்கள் வெளியே வந்து விட்டோம்.
கேள்வி:
காவிரி விவகாரம் தொடர்பாக எழுப்பப்படும் கேள்விகளுக்கு தற்போதைய நீர்வ ளத்துறை அமைச்சர் பதில் அளிப்பதில்லையே?.
துரைமுருகன்:
முதல்வரே வாயை திறப்பதில்லை. பின்னர் எப்படி அமைச்சர்கள் பேசுவார்கள்.
இவ்வாறு கழக பொதுச்செயலாளர் துரைமுருகன் அவர்கள் செய்தியாளர்களுக்கு பேட்டியளித்தார்.