சென்னை, ஜூலை 29–
‘‘பட வசூல் பாதிக்கும் என்ற பயத்தால் மேகதாது பிரச்சினையில் தமிழ்நாட்டின் உரிமையை முதல்வர் அடகு வைப்பதா?’’ என்று சட்டமன்ற எதிர்க்கட்சித் தலைவர் உதயநிதி ஸ்டாலின் அவர்கள் கண்டனம் தெரிவித்துள்ளார்.
ஒன்றிய நீர்வளத்துறை இணையமைச்சர் ராஜ் பூஷன்,‘‘காவிரி நதியின் குறுக்கே எந்தவிதமான கட்டுமானத்தையும் மேற்கொள்வதற்காக கர்நாடகா அரசு தமிழ்நாடு, கேரளா மற்றும் புதுச்சேரியின் ஒப்புதலை பெற வேண்டும் என்று 2018ஆம் ஆண்டு உச்ச நீதிமன்ற தீர்ப்பில் எங்கும் குறிப்பிடப்படவில்லை.
குறிப்பாக கடந்த 2018ஆம் ஆண்டு பிப்ரவரி 16ஆம் தேதி உச்ச நீதிமன்றம் வழங்கிய தீர்ப்பில், காவிரி தீர்ப்பாயத்தின் 2007
தீர்ப்பின் பிரிவு 18-ஐ உறுதிப்படுத்தி உள்ளது. தீர்ப்பாயத்தின் உத்தரவுக்கு முரணாக இல்லாத வகையில், மாநில எல்லைகளுக்குள் நீரைப் பயன்படுத்தவும், அதன் பயனை அனுபவிக்கவும் ஒவ்வொரு மாநிலத்துக்கும் அதிகாரம் உள்ளது என வலியுறுத்தியுள்ளது.
மேகதாது அணை மற்றும் குடிநீர் திட்டம் தொடர்பாக, கர்நாடகா 2019ம் ஆண்டு சமர்ப்பித்த விரிவான திட்ட அறிக்கையை, காவிரி தீர்ப்பாயத்தின் உத்தரவு மற்றும் மத்திய நீர்வள ஆணையத்தின் வழிகாட்டுதல்களுக்கு ஏற்ப திருத்தம் செய்து
மீண்டும் சமர்ப்பிக்குமாறு திட்ட
அதிகாரிகளுக்கு திருப்பி அனுப்பப்பட்டுள்ளது’’ என்று தெரிவித்துள்ளார்.
இந்நிலையில் இதுகுறித்து சட்டமன்ற எதிர்க்கட்சித் தலைவர்
உதயநிதி ஸ்டாலின் அவர்கள் தமது முகநூலில் பதிவிட்டிருப்பதாவது :–
மேகதாது அணை கட்ட தமிழ்நாட்டின் அனுமதி கர்நாடகாவிற்குத் தேவை இல்லை என்ற ஒன்றிய இணை அமைச்சரின் பதில் காவிரி விவகாரத்தில் தமிழ்நாட்டின் உரிமையை
கேள்விக்குறியாக்கி இருக்கிறது.
டெல்லி எஜமானர்களை பகைத்துக் கொள்ளாமலும் -ஆட்சிக்கட்டிலைக் காப்பாற்ற காங்கிரஸுக்கு எதிராக பேசாமலும், தமிழ்நாட்டின் உரிமையை அடகு வைத்துள்ளார் முதலமைச்சர்.
இந்தப் பிரச்சினையில், தமிழ்நாட்டு அரசியல் கட்சிகள் ஓரணியில் சென்று ஒன்றிய அரசிடம் மேகதாதுவுக்கு எதிராக குரல் கொடுக்க வேண்டுமென சட்டப்பேரவையில் பேசி இருந்தேன்.
கர்நாடகாவில் பட வசூல் பாதிக்கும் என்ற பயத்தில், இந்த #SofaModel முதலமைச்சர், எதிர்க்கட்சிகள் சொன்னதையும் கேட்கவில்லை, விவசாயி களின் கோரிக்கையையும் ஏற்கவில்லை.
இனியும் காலம் தாழ்த்தினால் தமிழ்நாட்டு விவசாயிகளின் வாழ்வாதாரம் முற்றிலும் பறிபோகும்.
எனவே, மேகதாதுவில் அணை
கட்டும் முயற்சியை முறியடிக்க முதலமைச்சர் உடனடி நடவடிக்கை எடுக்க வேண்டும்.
இவ்வாறு உதயநிதி ஸ்டாலின் அவர்கள் தமது முகநூலில் பதிவிட்டுள்ளார்.