புதுடெல்லி, ஜூலை 30–
நாட்டில் மாணவர்கள் போராடுவதற்கு அனைத்து அரசியல் சாசன உரிமையும் உள்ளது என்று உச்சநீதிமன்றம் தெரிவித்துள்ளது. மாணவர்கள் மீதான தாக்குதல் குறித்து விசாரிக்க உச்சநீதிமன்ற நீதிபதி தலைமையில் சிறப்பு புலனாய்வுக் குழு அமைக்கப்படும் என்றும் அறிவித்துள்ளது.
டெல்லி மாணவர் போராட்டத்தில் நடைபெற்ற தாக்குதலை கண்டித்து தொடரப்பட்ட வழக்கு உச்சநீதிமன்றத்தில் நேற்று விசாரணைக்கு வந்தது. அப்போது, மாணவர்கள் போராடுவதற்கு அனைத்து அரசியல் சாசன உரிமையும் உள்ளது என்று உச்சநீதிமன்றம் தெரிவித்துள்ளது. போராட்டம் நடத்திய மாணவர்கள் மீது கடும் தாக்குதல் நடைபெற்றுள்ளது என்றும், தாக்குதலில் ஒரு மாணவி படுகாயமடைந்து ஐ.சி.யுவில் உள்ளார் என்றும் உச்சநீதிமன்றம் தெரிவித்துள்ளது. மாணவர்கள் மீது பெல்லட் குண்டுகள், மின்சார கருவிகள் மூலம் தாக்குதல் நடத்தப்பட்டதாக புகார் உள்ளதாகவும் நீதிபதிகள் கூறினர்.
பெண்கள், வழக்கறிஞர்கள், பத்திரிகையாளர்கள் உள்ளிட்டோர் மீதும் தாக்குதல் நடத்தப்பட்டுள்ளதாக உச்சநீதிமன்றம் கவலை தெரிவித்துள்ளது. மாணவர்கள் போராட்டத்தை தடுக்க ஆயுதங்கள் எப்படி பயன்படுத்தப்பட்டது என்பது குறித்து ஆய்வு செய்யப்பட வேண்டும் என்று நீதிபதிகள் தெரிவித்தனர். போராட்டங்களை கையாள்வது குறித்து உரிய சட்ட வழிமுறைகளை வகுக்க வேண்டிய தருணம் இது என்றும் உச்சநீதிமன்றம் தெரிவித்துள்ளது.
நீட் எதிர்ப்பு போராட்டத்தில் கைது செய்யப்பட்டுள்ள மாணவர்களை உடனடியாக விடுவிக்க வேண்டும் என்று உச்சநீதிமன்றம் உத்தரவிட்டுள்ளது. மாணவர்கள் தாக்கப்பட்ட விவகாரத்தில் டெல்லி, பீகார், உத்தரப்பிரதேசம், மகாராஷ்டிரா, அசாம் ஆகிய மாநிலங்களுக்கு உச்சநீதிமன்றம் நோட்டீஸ் அனுப்பியுள்ளது. சிசிடிவி உள்ளிட்ட அனைத்து ஆவணங்களையும் பாதுகாத்து வைக்க வேண்டும் என்று உச்சநீதிமன்றம் ஆணையிட்டுள்ளது.
வழக்குப்பதிவு செய்யப்பட்டுள்ள மாணவர்கள் மீது எந்த நடவடிக்கையும் எடுக்கக்கூடாது என்றும், மாணவர்கள் மீதான தாக்குதல் குறித்து விசாரிக்க உச்சநீதிமன்ற நீதிபதி தலைமையில் சிறப்பு புலனாய்வுக் குழு அமைக்கப்படும் என்றும் உச்சநீதிமன்றம் தெரிவித்துள்ளது.