மதுரை, ஜூலை 30 –-
கரூரில் கூட்ட நெரிசலில் சிக்கி பலியானவர்கள் குடும்பத்தைச் சேர்ந்த 31 பேருக்கு வழங்கிய அரசு வேலையை ரத்து செய்து உயர்நீதிமன்ற மதுரைகிளை தீர்ப்பளித்துள்ளது. மேலும் த.வெ.க. அரசின் நடவடிக்கை மோசமான
முன்னுதாரணம் என்றும் நீதிபதிகள் கண்டனம் தெரிவித்துள்ளனர்.
தமிழக வெற்றிக்கழகம் சார்பில் கரூரில் கடந்த செப்டம்பர் மாதம் முதல்- அமைச்சர் விஜய் பங்கேற்ற தேர்தல் பிரச்சாரக் கூட்டத்தில் நெரிசலில் சிக்கி பெண்கள், குழந்தைகள் உள்பட 41 பேர் உயிரிழந்தனர்.
31 பேருக்கு அரசு வேலை !
இந்தச் சம்பவம் பெரும் அதிர்ச்சியை ஏற்படுத்தியது. இதுகுறித்து சி.பி.ஐ. விசாரணை நடத்தும் படி உச்சநீதிமன்றம் உத்தரவிட்டது. இந்த சம்பவம் தொடர்பாக முதல்-அமைச்சர் விஜய் உள்பட பலரிடம் சி.பி.ஐ. விசாரணை நடத்தி உள்ளது.
இந்தநிலையில் கரூர் சம்பவத்தில் பலியானவர்களின் 31 பேர் குடும்பத்திற்கு கருணை அடிப்படையில் அரசு வேலைக்கான நியமன ஆணைகளை கடந்த 10- ஆம் தேதி கரூரில் நடந்த விழாவில் முதல்- அமைச்சர் விஜய் வழங்கினார்.
இதனை எதிர்த்து நாம் தமிழர் கட்சியின் மீனவர் பாசறை நிர்வாகி தீரன் திருமுருகன், மதுரையைச் சேர்ந்த சீனி முகமது, திண்டுக்கல் மாவட்டம் வேடசந் தூரை சேர்ந்த சந்தோஷ் குமார் ஆகியோர் தனித்தனியாக மதுரை உயர்நீதிமன்ற கிளையில் வழக்கு தொடர்ந்தனர்.
இந்த வழக்குகளை ஏற்கனவே விசாரித்த உயர்நீதிமன்றம், 31 பேர் குடும்பங்களுக்கு வழங்கிய அரசு வேலை நியமனங்கள் தற்காலிகம் என றும், இந்த நீதிமன்றத்தின் இறுதி முடிவுக்கு கட்டுப்பட்டவை எனவும், இந்த பணி நியமனங்களை பெற்றவர்கள் முதல் மாத ஊதியம் பெறுவதற்குள் இந்த விவகாரத்தில் உரிய தீர்வு காணப்படும் எனவும் தெரிவித்து இருந்தது.
மேலும் இந்த வழக்குகள் குறித்து டி.என்.பி.எஸ்.சி. மற்றும் சம்பந்தப் பட்ட துறை அதிகாரிகள் பதில் மனு தாக்கல் செய்ய வேண்டும் எனவும் நீதிபதிகள் உத்தரவிட்டு இருந்தனர்.
டி.என்.பி.எஸ்.சி. தலையிட முடியாது!
இந்தநிலையில் இந்த வழக்குகள் நீதிபதிகள் சி.வி.கார்த்திகேயன், சக்திவேல் ஆகி யோர் முன்பு நேற்று முன்தினம் பிற்பகலில் விசாரணைக்கு வந்தது. அப்போது டி.என்.பி.எஸ். சி. சார்பில் தாக்கல் செய்த பதில் மனுவில் கூறியிருந்ததாவது:-–
2018-ஆம் ஆண்டு பிறப்பிக்கப் பட்ட அரசாணையின்படி கருணை அடிப்படையிலான அரசு பணிகளில் பணியாளர்களை நிரந்தரம் செய்வதற்கு டி.என்.பி.எஸ்.சி.யிடம் அனுமதி கோர தேவையில்லை. மேலும் சம்பந்தப்பட்ட பணி நியமனம் என்பது அரசின் கொள்கை சார்ந்த முடிவு என்பதால் அதில் டி.என்.பி. எஸ்.சி. தலையிட முடியாது. இவ்வாறு அதில் கூறப்பட்டு இருந்தது.
அதேபோல வருவாய் மற்றும் பேரிடர் மேலாண்மை துறை செயலாளர் தாக்கல் செய்த பதில் மனுவில், ‘இந்த பணி நியமனங்கள் தமிழக அரசின் கொள்கை முடிவு சார்ந்தவை. இந்த வழக்கு தொடர்ந்தவர்கள், இந்த விவகாரத்தில் எந்த வகையிலும் தொடர்பு இல்லாதவர்கள். அவர்களின் கோரிக்கை ஏற்புடையதல்ல. சட்டப்படி மட்டுமே நடவடிக்கை எடுக்கப்பட்டு வருகிறது. எனவே இந்த மனுக்களை தள்ளுபடி செய்ய வேண்டும்’ என கூறப்பட்டு
இருந்தது.
20 லட்சம் பேர் விண்ணப்பம்!
பின்னர் மனுதாரர்கள் சார்பில் வக்கீல்கள் கிளீட்டஸ், முகமது ரஷீத் உள்ளிட்டோர் ஆஜராகி வாதாடியதாவது:-
ஸ்டெர்லைட் துப்பாக்கிச் சூடு சம்பவத்தில் உயிரிழந்தவர்களின் குடும்பத்தினருக்கும், மதுரை லீலாவதி கொலை வழக்கில் அவரது குடும்பத்தில் ஒருவருக்கு அரசு பணி வழங்கப்பட்டுள்ளது என அரசு சார்பில் தெரிவிக்கப்பட்டு உள்ளது. இது ஏற்புடையதல்ல. தமிழ்நாட்டில் பல லட்சம் இளைஞர்கள் உரிய கல்வித்தகுதியுடன் இருந்தும் தகுதியான வேலை கிடைக்காமல் உள்ளனர்.
டி.என்.பி.எஸ்.சி. நடத்தும் சாதாரண குரூப்-4 காலிப்பணியிடங்களுக்குகூட சுமார் 20 லட்சம் பேர் விண்ணப்பிக்கின்றனர். அவ்வாறு இருக்கும்போது ஒரு கட்சியின் பிரச்சார கூட்டத்தில் பங்கேற்று இறந்தவர்களின் குடும்பத்தின ருக்கு கருணை அடிப்படையில் பணி வழங்குவது என்பது சட்டவிரோதம். மேலும் அரசின் இந்த நடவடிக்கையானது உச்சநீதிமன்ற, உயர்நீதிமன்றங்களின் முந்தைய தீர்ப்பு களுக்கு எதிராக அமைந்திருக்கிறது.
இவ்வாறு அவர்கள் வாதாடினர்.
மாநில அரசின் தனிப்பட்ட உரிமை!
பின்னர் தமிழக அரசின் அட்வகேட் ஜெனரல் விஜய் நாராயண் வாதாடியதாவது:- கரூர் கூட்ட நெரிசலில் சிக்கி இறந்தவர்களின் குடும்பத்தினருக்கு மாநில அரசு தலா ரூ.10 லட்சம் இழப்பீடு வழங்கியுள்ளது. காயம் அடைந்தவர்களுக்கு தலா ரூ.2 லட்சம் இழப்பீடு வழங்கப்பட்டு இருக்கிறது. கரூர் பிரசார கூட்ட நெரிசலில் சிக்கி உயிரிழந்தவர்களின் குடும்ப உறுப்பினர்களுக்கு வேலைவாய்ப்பு வழங்குவது அரசாங்கத்தால் எடுக்கப்பட்ட கொள்கை முடிவாகும். மேலும் இது அரசியலமைப்பு சட்டத்துக்கு உட்பட்டு செயல்படுத்தப்பட்டு உள்ளது. இந்த மறுவாழ்வு திட்டம், சி.பி.ஐ.யின் தற்போதைய விசாரணையையோ அல்லது கோர்ட்டில் நடக்கும் வழக்குகளையோ பாதிக்கும் என்பது ஆதாரமற்ற தகவல். கூட்ட நெரிசலை சமாளிப்பதற்கான முன்னேற்பாடுகளை அப்போதைய போலீஸ்துறையினர் எடுக்காததன் விளைவால்தான் இந்த விபத்து ஏற்பட்டு இருக்கிறது. இதில் பாதிக்கப்பட்டவர்களுக்கான நிவாரணம் வழங்கப்பட்டு உள்ளது.
மாநில அரசின் கொள்கைமுடிவு என்பது அதன் தனிப்பட்ட உரிமை என உச்சநீதிமன்றம் ஏற்கனவே அளித்த தீர்ப்புகளில் கூறியுள்ளது. அதன் அடிப்படையில் இந்த பணி நியமனங்கள் நடைபெற்றுள்ளன. அதுவும் சாதாரண பணிகள்தான் அளிக்கப்பட்டு உள்ளன. எனவே, மேற்கண்ட ரிட் மனுக்களை தள்ளுபடி செய்ய வேண்டும்.
இவ்வாறு அவர் வாதாடினார்.
நீதிபதிகள் சரமாரி கேள்வி
அப்போது குறுக்கிட்ட நீதிபதிகள், ‘அடிக்கடி நடக்கும் பட்டாசு விபத்துகளில் பலர் உயிரிழக்கிறார்களே? அவர்களின் குடும்பத்தினருக்கு இதுபோன்ற நிவாரணம் வழங்கப்படுகிறதா? அரசு பஸ் விபத்தில் உயிரிழப்பவர்கள் குடும்பத்திற்கும் இதுபோல வழங்குவீர்களா? கருணை அடிப்படையில் வேலை பெற பலர் காத்திருக்கும் நிலையில் கரூரில் உயிரிழந்தவர்கள் குடும்பத்திற்கு மட்டும் முன்னுரிமை ஏன்?. அவர்களுக்கு திறன் பயிற்சிகளை வழங்கி வாழ்வாதாரத்தை ஏற்படுத்த நடவடிக்கை எடுக்கலாமே? என சரமாரியாக கேள்விகளை எழுப்பினர்.
தீர்ப்பு!
அனைத்துத் தரப்பு வாதங்களையும் பதிவு செய்து கொண்ட நீதிபதிகள் ‘இந்த வழக்கின் தீர்ப்பை சற்று நேரத்திற்கு ஒத்திவைத்தனர். பின்பு நீதிபதிகள் நேற்று முன்தினம் மாலை 5 மணி அளவில் பிறப்பித்த தீர்ப்பில் கூறி இருந்ததாவது:-–
கரூர் சம்பவத்தில் இறந்த குடும்பத்தினருக்கு பணி நியமன ஆணைகள் வழங்கும் நிகழ்ச்சி நடந்த நாளன்று இந்த வழக்குகளை விசாரித்த நாங்கள், இந்த நியமனங்கள் தற்காலிகமானவை என கூறி இருந்தோம். இந்த வழக்கு விசாரணையின் போது அரசு தரப்பு முன் வைத்த வாதங்கள் ஏற்புடையதாக இல்லை. கரூர் சம்பவம் தொடர்பாக சி.பி.ஐ. விசா ரணை நடத்தி வருகிறது இந்த விசாரணையை உச்சநீதிமன்றம் ஏற்படுத்திய குழு கண்காணித்து வருகிறது.
ஒப்பிடுவது ஏற்புடையதல்ல!
இந்த பணி நியமனங்களை பொறுத்தவரையில் விதிமீறல்கள் உள்ளன. குடிமக்கள் அனைவரையும் அரசு சமமாக பார்க்க வேண்டும்.
ராணுவ வீரர்கள் பணியின் போது இறந்தால் அவர்களது வாரிசுக்கு கருணை அடிப்படையில் வேலை வழங்குவதை அரசு சுட்டிக்காட்டுகிறது. அதுவும் இதுவும் ஒன் றாகாது. அதேபோல் அரசு பணியில் உள்ளவர்களின் குடும்பத்தினருக்கு கருணை அடிப்படையில் பணி வழங்குவதையும், கரூர் சம்பவத்தையும் ஒப்பிடுவது ஏற்புடையதல்ல.
எதையும் யோசிக்காமல் அரசு வேலை வழங்க முடியாது. கருணை அடிப்படை யிலான வேலைகளுக்கு உச்சநீதிமன்றம் பல்வேறு விதிகளை வகுத்துள்ளது. அந்த விதி களையும் த.வெ.க. அரசு மீறி உள்ளது.
இதுபோன்று கருணை அடிப்படையில் பணி வழங்குவது என்பது ஒரு மோசமான முன்னுதாரணத்தை ஏற்படுத்திவிடும்.
அரசாணை ரத்து!
எனவே கரூர் கூட்ட நெரிசலில் உயிரிழந்தவர்களின் குடும்பத்திற்கு அரசு வேலை வழங்கிய அரசாணை ரத்து செய்யப்படுகிறது.
இவ்வாறு நீதிபதிகள் உத்தரவிட்டனர்.