புதுடெல்லி, ஜூலை 31–
மேகதாது திட்டத்தில் உறுதியான நிலைப்பாட்டை எடுக்கத் தவறிய தவெக அரசு; தமிழ்நாட்டின் காவிரி நீர் உரிமை குறித்த கேள்விகளுக்கு ஒன்றிய அரசிடமிருந்து நேரடி பதில் இல்லை என மக்களவையில் ஈரோடு கே.இ.பிரகாஷ் குற்றம் சாட்டினார்.
ஈரோடு மக்களவை உறுப்பினர் கே.இ.பிரகாஷ், கர்நாடக அரசு காவிரி ஆற்றின் குறுக்கே முன்மொழிந்துள்ள மேகதாது அணைத் திட்டம் தொடர்பாக ஏதேனும் முன்மொழிவை ஒன்றிய அரசு பெற்றுள்ளதா, அதன் தற்போதைய நிலை என்ன என்பதைக் குறித்து ஒன்றிய ஜல் சக்தி அமைச்சரிடம் விளக்கம் கோரினார். மேலும்,காவிரி நீர்வழக்குத் தீர்ப்பாயத்தின் இறுதி தீர்ப்பு, உச்சநீதிமன்றத் தீர்ப்பு, தமிழ்நாடு அரசின் ஒப்புதல் மற்றும் ஒன்றிய அரசின் அனுமதி இன்றி இந்தத் திட்டம் முன்னெடுக்கப்படு கிறதா என்பதையும் கேட்டறிந்தார். அதோடு, மேகதாது திட்டத்திற்கு சுற்றுச்சூழல் அனுமதி உள்ளிட்ட எந்தவித அனுமதியும் வழங்கக்கூடாது என்றும், விரிவான திட்ட அறிக்கையை (DPR) மத்திய நீர்வள ஆணையம் பரிசீலிக்கக் கூடாது என்றும் தமிழ்நாடு தொடர்ந்து வலியுறுத்தி வரும் கோரிக்கையை ஒன்றிய அரசு பரிசீலித்துள்ளதா, திட்டத்தால் காவிரி படுகை பகுதிகளில் பாசனம், வேளாண்மை மற்றும் குடிநீர் கிடைப்பதில் ஏற்படக்கூடிய பாதிப்புகள் குறித்து விவசாயிகள் அமைப்புகளிடமிருந்து பெறப்பட்ட மனுக்கள், காவிரி படுகை விவசாயிகளின் நலனைப் பாதுகாக்க மேற்கொள்ளப்பட்ட ஆய்வுகள் மற்றும் தமிழ்நாட்டின் சட்டபூர்வமான காவிரி நீர் பங்கினைப் பாதுகாக்கவும், பாசனத்தை நம்பியுள்ள விவசாயிகளின் நலனை உறுதிப்படுத்தவும் ஒன்றிய அரசு எடுத்துள்ள நடவடிக்கைகள் குறித்தும் விளக்கம் கோரினார்.
இதற்குஜல் சக்தி அமைச்சகம் அளித்த பதில் வருமாறு:
(அ) கர்நாடக அரசு 2019ஆம் ஆண்டு சமர்ப்பித்த மேகதாது சமநிலை நீர்த்தேக்கம் மற்றும் குடிநீர் திட்டத்தின் விரிவான திட்ட அறிக்கை (DPR), காவிரி நீர் வழக்குத் தீர்ப்பாயத்தின் (CWDT) தீர்ப்புக்கும், தற்போதைய மத்திய நீர்வள ஆணையத்தின் (CWC) வழிகாட்டுதல்களுக்கும் ஏற்ப திருத்தம் செய்து மீண்டும் சமர்ப்பிக்குமாறு கோரி, திட்ட அதிகாரிகளிடம் திருப்பி அனுப்பப்பட்டுள்ளது.
(ஆ) முதல் (ஈ) வரை: காவிரி நீர் வழக்கு தொடர்பாக 16.02.2018 அன்று வழங்கப்பட்ட உச்சநீதிமன்றத் தீர்ப்பின்படி, காவிரி ஆற்றின் குறுக்கே எந்தவொரு கட்டுமானத்தையும் மேற்கொள்வதற்கு கர்நாடக அரசு, தமிழ்நாடு, கேரளா மற்றும் புதுச்சேரி ஆகிய கீழ்நிலை மாநிலங்களின் ஒப்புதலைப் பெற வேண்டும் என்ற எந்தவித நிபந்தனையும் இல்லை என்று அமைச்சகம் தெரிவித்துள்ளது.
மேலும், காவிரி நீர் வழக்குத் தீர்ப்பாயத்தின் (CWDT) தீர்ப்பில் இடம்பெற்றுள்ள Clause XVIII-ஐ உச்சநீதிமன்றம் ஏற்றுக்கொண்டு, அந்தத் தீர்ப்பின் அடிப்படையில் ஒவ்வொரு மாநிலமும் தீர்ப்பாயத்தின் உத்தரவுக்கு முரணாக இல்லாத வகையில், தங்கள் மாநில எல்லைக்குள் உள்ள நீரை ஒழுங்குபடுத்தவும் பயன்படுத்தவும் உரிமை கொண்டுள்ளது என்பதை மீண்டும் உறுதிப்படுத்தியுள்ளதாக அமைச்சகம் குறிப்பிட்டுள்ளது.
மேலும், மேகதாது திட்டத்தால் காவிரி டெல்டா பகுதி மற்றும் பிற மாவட்டங்களின் குடிநீர் கிடைப்பில் பாதிப்பு ஏற்படக்கூடும் என்ற அச்சத்தை வெளிப்படுத்தி தமிழ்நாடும், விவசாயிகள் அமைப்புகளும் அளித்துள்ள மனுக்களை ஒன்றிய அரசு கவனத்தில் எடுத்துள்ளதாகவும் எந்தத் திட்டம் தொடர்பாகவும் பெறப்படும் மனுக்கள், நடைமுறையில் உள்ள விதிமுறைகளின்படி திட்ட மதிப்பீட்டின்போது பரிசீலிக்கப்படும் என்றும் அமைச்சகம் தெரிவித்துள்ளது.
-(உ) மாநிலங்களுக்கு இடையேயான நதிநீர் தகராறு சட்டம், 1956-ன் பிரிவு 6A-ன் கீழ் வழங்கப்பட்ட அதிகாரத்தின் அடிப்படையில், ஒன்றிய அரசு 01.06.2018 அன்று காவிரி நீர் மேலாண்மைத் திட்டத்தை (Cauvery Water Management Scheme CWMS) அரசிதழில் அறிவித்துள்ளது. இதன் மூலம், உச்சநீதிமன்றம் 16.02.2018 அன்று மாற்றியமைத்த காவிரி நீர் வழக்குத்தீர்ப்பாயத்தின் தீர்ப்பைநடைமுறைப்படுத்தும் நோக்கில் காவிரி நீர் மேலாண்மை ஆணையம் (CWMA) மற்றும் காவிரி நீர் ஒழுங்குமுறை குழு (CWRC) அமைக்கப்பட்டுள்ளதாக அமைச்சகம் தெரிவித்துள்ளது.