புதுடெல்லி, ஜூலை 31–
பணவீக்கம் உள்ளிட்ட பிரச்சனைகளால் வர்த்தக துறையில் குறிப்பாக குறு, சிறு மற்றும் நடுத்தரத் தொழில் நிறுவனங்கள் மீது ஏற்படுத்தியுள்ள பாதிப்பு குறித்து ஒன்றிய அரசு ஆய்வு செய்துள்ளதா என்றும் தற்போது நிலவும் பொருளாதாரச் சவால்களை சமாளிக்க திட்டங்கள் ஏதும் வகுக்கப்பட்டுள்ளதா என்றும் நாடாளு மன்றத்தில் ஒன்றிய வர்த்தகம் மற்றும் தொழில்துறைஅமைச்சர் பியூஷ் கோயல் அவர்களிடம் கழக நாடாளுமன்றக் குழுத் துணைத் தலைவரும் மத்திய சென்னை நாடாளுமன்ற உறுப்பினருமான தயாநிதி மாறன் பல கேள்விகளை எழுப்பியுள்ளார்.
அதன் விவரங்கள் பின்வருமாறு:- –
தொடர்ந்து நிலவும் அதிக பணவீக்கம், மந்தமான பொருளாதாரவளர்ச்சி, வேலைவாய்ப்புச் சவால்கள் மற்றும் உலகளாவிய புவிசார் அரசியல் இடையூறுகள் ஆகியவை உற்பத்தித் துறை மற்றும் குறு, சிறு மற்றும் நடுத்தரத் தொழில் நிறுவனங்கள் மீது ஏற்படுத்தியுள்ள பாதிப்பை அரசு ஆய்வு செய்துள்ளதா? அவ்வாறெனில், அதன் விவரங்கள் என்ன?
ஒன்றிய அரசின் சமீபத்திய நிதிநிலை அறிக்கையில் அறிவிக்கப்பட்ட திட்டங் கள் திட்டங்கள் உட்பட, அரசு மேற்கொண்ட நிதி, வரி மற்றும் வேலைவாய்ப்பு தொடர்பான நடவடிக்கை களின் செயல்திறன் குறித்து ஏதேனும் ஆய்வு மேற்கொள்ளப்பட்டிருந்தால் அதன் முடிவுகள் என்ன?
அதிகரித்து வரும் உற்பத்திச் செலவுகள், உலகளாவிய எரிசக்தி விலை ஏற்ற இறக்கங்கள் மற்றும் பணவீக்கம் ஆகியவற்றின் ஒருங்கிணைந்த பாதிப்பிலிருந்து சிறு தொழில் நிறுவனங்கள், ஏற்றுமதியாளர்கள் மற்றும் புத்தொழில் நிறுவனங்களை (Start-ups) பாதுகாப்பதற்காக அரசு மேற்கொண்டுள்ள நடவடிக்கைகள் யாவை?
மூலதன வெளியேற்றம் (Capital Outflows), தனியார் முதலீட்டின் மந்தநிலை மற்றும் வெளிநாட்டு வர்த்தகத்தில் நிலவும் நிச்சயமற்ற சூழல் ஆகியவை பொருளாதார வளர்ச்சி மற்றும் வேலைவாய்ப்பில், குறிப்பாக தமிழ்நாடு போன்ற ஏற்றுமதி சார்ந்த மாநிலங்களில் ஏற்படுத்திய தாக்கத்தை அரசு மதிப்பீடு செய்திருந்தால் அதன் விவரங்கள் என்ன?
தற்போது நிலவும் பொருளாதாரச் சவால்களை எதிர்கொண்டு, முதலீட்டா ளர்களின் நம்பிக்கையை மீட்டெடுக்கவும், தரமான வேலைவாய்ப்புகளை உருவாக்கவும், உள்நாட்டு தேவையை (Domestic Demand) வலுப்படுத்தவும் அரசு முன்மொழிந்துள்ள திருத்த நடவடிக்கைகள் என்ன?
இவ்வாறு அவர் கேள்வி எழுப்பினார்.