புதுடெல்லி, ஆக. 1–
சென்னையில் உலகத் தரம் வாய்ந்த விமானி பயிற்சி உட்கட்டமைப்பை நிறுவுவது, நாட்டில் விமானி பயிற்சிப் பள்ளிகளும், வர்த்தக விமானிகளின் எண்ணிக்கையும் குறைவாக உள்ளது ஆகியவை குறித்து ஒன்றிய அரசிடம் தி.மு.க. எம்.பி. கிரிராஜன் கேள்வி எழுப்பி உள்ளார்.
மழைக்கால கூட்டத்தொ டரில் கலந்து கொண்டுள்ள திமுக நாடாளுமன்ற உறுப்பினர் இரா.கிரிராஜன், இந்தியாவில் வர்த்தக விமானி பயிற்சிப் பள்ளிகளின் எண்ணிக்கை யும், விமானிகளின் எண்ணிக்கையும் போதுமானதாக உள்ளதா? போதுமான பயிற்சி வசதிகள் இல்லாததால் 50 சதவீத வர்த்தக விமானிகள் வெளிநாட்டில் பயிற்சி பெற வேண்டுமா? மேலும் பல வர்த்தக விமானிகளுக்குப் பயிற்சி அளிப்பதற்காக சென்னையில் உலகத் தரம் வாய்ந்த விமானி பயிற்சி உட்கட்டமைப்பை நிறுவ அரசாங்கம் என்ன நடவடிக்கைகள் எடுத்துள்ளது? அதிநவீன உருவகப்படுத்துதல் தொழில்நுட்பம் (Simulation Technology) மற்றும் மெய்நிகர் யதார்த்தத்தைப் (Virtual Reality) பயன்படுத்தி விமானிப் பயிற்சியின் செலவைக் குறைக்க அரசாங்கத்தால் என்ன நடவடிக்கைகள் எடுக்கப்பட்டுள்ளன? என சிவில் விமானப் போக்குவரத்துத் துறை அமைச்சரிடம் கேள்வி எழுப்பி இருந்தார்.
இதற்கு பதிலளித்துள்ள ஒன்றிய அரசின் சிவில் விமானப் போக்குவரத்து அமைச்சகத்தின் இணை அமைச்சர் முரளிதர் மோஹோல், நாடு முழுவதும் 63 தளங்களைக் கொண்ட, 400க்கும் மேற்பட்ட விமானங்களைக் கொண்ட, 41 விமானப் பயிற்சி நிறுவனங்கள் சிவில் விமானப் போக்குவரத்து இயக்குநரகத்தால் (DGCA) அங்கீகரிக்கப்பட்டுள்ளன; சிவில் விமானப் போக்குவரத்துத் தேவை என்பது 10 மாணவர்களுக்கு ஒரு விமானம் மற்றும் ஒரு பயிற்றுனர் என்கிற அடிப்படையில், ஒரு குறிப்பிட்ட நேரத்தில் 3500 மாணவர்களுக்குப் பயிற்சி அளிக்கும் திறனுக்குச் சமமாக உள்ளது என பதிலளிக்கப்பட்டுள்ளது.
கடந்த 5 ஆண்டுகளில் வர்த்தக உரிமம் பெற்றுள்ள விமானிகளின் எண்ணிக்கையை பொறுத்தவரை, இந்தியாவில் பயிற்சி பெற்றவர்கள் எண்ணிக்கை 791ஆகவும், வெளிநாட்டில் பயிற்சி பெற்ற விமானிகளின் எண்ணிக்கை 540ஆகவும் உள்ள நிலையில், உள்நாட்டில் பயிற்சி பெற்றவர்களின் எண்ணிக்கைதான் அதிகமாக உள்ளதாக ஒன்றிய அரசு பதிலளித்துள்ளது.
விமானி பயிற்சி உள்கட்டமைப்பை வலுப்படுத்தும் நோக்கில் பல்வேறு நடவடிக்கைகள் எடுக்கப்பட்டுள்ளதாகவும், விமானிப் பயிற்சியை வழங்குவதற்காக சென்னையில் உள்ள ஏஏஜி சென்டர் ஃபார் ஏவியேஷன் டிரெய்னிங் பிரைவேட் லிமிடெட் நிறுவனம் பயிற்சி நிறுவனமாக அங்கீகரிக்கப்பட்டுள்ளதாகவும் கூறப்பட்டுள்ளது.
விமானிப் பயிற்சியை மேலும் மலிவானதாக மாற்றுவதற்காக தாராளமயமாக்கப்பட்ட கொள்கை அறிமுகப்படுத்தப்பட்டதன் கீழ் விமான நிலைய உரிமத்தொகை ரத்து செய்யப்பட்டு, நில வாடகைகள் கணிசமாகக் குறைக்கப்பட்டு ள்ளன என்றும், அங்கீகரிக்கப்பட்ட விமான பயிற்சி நிறுவனங்களால் நடத்தப்படும் விமானப் பயிற்சிப் படிப்புகளுக்கு ஜிஎஸ்டியிலிருந்து விலக்கு அளிக்கப்பட்டுள்ளது.
பயிற்சித் திறனை மேம்படுத்தவும்செலவுகளைக் குறைக்கவும், சிமுலேட்டர்கள் மற்றும் பிற நவீன பயிற்சித் தொழில்நுட்பங்களைப் பயன்படுத்த அனுமதிக்கப்பட்டு உள்ளதாகவும், தி.மு.க. எம்.பி. கிரிராஜன் எழுப்பிய கேள்விக்கு ஒன்றிய அரசு பதிலளித்துள்ளது.