புதுடெல்லி, ஆக. 1 –
கள்ளக்குறிச்சி நாடாளுமன்ற உறுப்பினர் தே. மலையரசன் மக்களவையில் எழுப்பிய கேள்வி வருமாறு:–
தமிழ்நாட்டில், குறிப்பாக கள்ளக்குறிச்சி மக்களவைத் தொகுதியில், அடல் புஜல் யோஜனா (ABY) திட்டத்தைச் செயல்படுத்துவதன் தற்போதைய நிலை என்ன? இத்திட்டத்தின் கீழ் அடங்கும் மாவட்டங்கள், வட்டாரங்கள் மற்றும் கிராம ஊராட்சிகளின் எண்ணிக்கை எவ்வளவு?
தமிழ்நாட்டில் கடந்த ஐந்து ஆண்டுகளில் நிலத்தடி நீர் மேலாண்மை மற்றும் பாதுகாப்பு நடவடிக்கைகளுக்காக ஒதுக்கப்பட்ட, விடுவிக்கப்பட்ட மற்றும் பயன்படுத்தப்பட்ட நிதிகள் குறித்த விவரங்கள் என்ன?
அடையாளம் காணப்பட்ட பகுதிகளில் நிலத்தடி நீர் மட்டம், நீர் சேமிப்பு நடைமுறைகள் மற்றும் சமூகப் பங்கேற்பு ஆகியவற்றின் மீது ABY-யின் தாக்கத்தை அரசு மதிப்பீடு செய்துள்ளதா, அவ்வாறாயின் அதன் விவரங்கள் என்ன?
தமிழ்நாட்டில் அவசர நடவடிக்கை தேவைப்படும் வகையிலான, அளவுக்கு அதிகமாகச் சுரண்டப்பட்ட மற்றும் மிக மோசமான நிலையில் உள்ள நிலத்தடி நீர் மண்டலங்களை ஒன்றிய அரசு அடையாளம் கண்டுள்ளதா, அவ்வாறாயின் அது குறித்த விவரங்கள் என்ன?
தமிழ்நாட்டின் நீர் பற்றாக்குறை உள்ள பகுதிகளில் நிலத்தடி நீர் செறிவூட்டல், மழைநீர் சேகரிப்பு, நீரைத் திறம்படப் பயன்படுத்துதல் மற்றும் நிலையான நிலத்தடி நீர் மேலாண்மை ஆகியவற்றை ஊக்குவிக்க ஒன்றிய அரசு எடுத்து வரும் நடவடிக்கைகள் என்ன? என்று மக்களவையில் தே.மலையரசன் கேள்வி எழுப்பினார்.