திருவள்ளூர்ஆக 01;-
திருவள்ளூர் மாவட்ட ஆட்சியர் அலுவலகத்தில் நடைபெற்ற விவசாயிகள் குறைதீர்க்கும் நாள் கூட்டம், விவசாயிகளின் வேதனையையும் த.வெ.க அரசின் செயல்பாடுகள் மீதான அதிருப்தியையும் வெளிப்படுத்தும் நிகழ்வாக மாறியது. தேர்தலுக்கு முன்பு விவசாயிகளின் கூட்டுறவு பயிர்க் கடன்கள் அனைத்தும் முழுமையாக தள்ளுபடி செய்யப்படும் என்று உறுதியளித்து ஆட்சிக்கு வந்த அரசு, ஆட்சிப் பொறுப்பேற்ற பிறகு அந்த வாக்குறுதியை நிறைவேற்றத் தவறியுள்ளதாக விவசாயிகள் குற்றம்சாட்டினர்.
கூட்டத்தில் பேசிய திருத்தணி அருகே டி.சி.கண்டிகை கிராமத்தைச் சேர்ந்த விவசாயி லிங்கமூர்த்தி, “விவசாயம் செய்வதற்காக வாங்கிய கடனின் வட்டியைச் செலுத்த வீட்டில் இருந்த அனைத்து நகைகளையும் அடகு வைத்துவிட்டேன். இப்போது தாலி மட்டும்தான் மிச்சம் இருக்கிறது” என்று கூறி, தன்னுடன் கொண்டு வந்திருந்த தாலியை கையில் உயர்த்திக் காட்டினார். “இந்த தாலியையும் அடகு வைக்க வேண்டிய நிலைக்கு என்னைத் தள்ளாதீர்கள். விவசாயிகளின் பயிர்க் கடன்களை முழுமையாக தள்ளுபடி செய்யுங்கள்” என்று அவர் உருக்கமாகக் கூறியபோது, கூட்ட அரங்கமே சோகத்தில் மூழ்கியது.
இதனைத் தொடர்ந்து விவசாய சங்க பிரதிநிதிகள் மாவட்ட ஆட்சியரிடம் மனு அளித்தனர். பின்னர் கூட்டத்தை புறக்கணித்து வெளிநடப்பு செய்த அவர்கள், கண்களில் கருப்பு ரிப்பன் கட்டிக்கொண்டு அரசுக்கு எதிராக முழக்கங்களை எழுப்பி ஆர்ப்பாட்டத்தில் ஈடுபட்டனர். “விவசாயிகளின் வாக்குகளைப் பெற்று ஆட்சிக்கு வந்த அரசு, இன்று அதே விவசாயிகளை வஞ்சிக்கிறது” என்று அவர்கள் குற்றம்சாட்டினர்.
2026 சட்டமன்றத் தேர்தல் பிரசாரத்தின் போது, “த.வெ.க ஆட்சிக்கு வந்தவுடன் கூட்டுறவு பயிர்க் கடன்கள் அனைத்தும் முழுமையாக தள்ளுபடி செய்யப்படும்” என்று அளிக்கப்பட்ட வாக்குறுதியை நினைவூட்டிய விவசாயிகள், ஆட்சிக்கு வந்த பிறகு பல்வேறு நிபந்தனைகளை விதித்து பெரும்பாலான விவசாயிகளை அந்தத் திட்டத்தி லிருந்து அரசு விலக்கி விட்டதாகக் கூறினர். “தேர்தலுக்கு முன் ஒரு பேச்சு, ஆட்சிக்கு வந்த பின் வேறு பேச்சு” என்ற நிலையே தற்போதைய அரசின் செயல்பாடாக இருப்பதாகவும் அவர்கள் விமர்சித்தனர்.
உரங்கள், விதைகள், பூச்சிக் கொல்லி மருந்துகள், மின்கட்டணம், கூலி உள்ளிட்ட அனைத்து விவசாயச் செலவுகளும் பல மடங்கு உயர்ந்துள்ள நிலையில், விளைபொருட்களுக்கு உரிய விலை கிடைக்கவில்லை. இயற்கை சீற்றங்களால் பாதிக்கப்பட்ட விவசாயிகளுக்கு போதிய நிவாரண மும் கிடைக்கவில்லை. இந்தச் சூழலில் பயிர்க் கடன்களை தள்ளுபடி செய்யாமல் இருப்பது விவசாயிகளை கடன் சுமையில் இருந்து மீள முடியாத நிலைக்குத் தள்ளுவதாக விவசாயிகள் வேதனை தெரிவித்தனர்.
தேர்தல் வாக்குறுதிகளை நிறைவேற்றாமல், நிபந்தனைகளின் பெயரில் விவசாயிகளை ஏமாற்றும் த.வெ.க அரசின் செயல்பாடு கடும் கண்டனத்திற்குரியது என்றும், விவசாயிகளின் கண்ணீருக்கும் துயரத்திற்கும் இந்த அரசே பொறுப்பேற்க வேண்டும் என்றும் போராட்டத்தில் பங்கேற்றவர்கள் தெரிவித்தனர்.
மேலும், வரும் வேளாண் பட்ஜெட்டிற்குள் அனைத்து கூட்டுறவு பயிர்க் கடன்களையும் எந்த நிபந்தனையும் இன்றி முழுமையாக தள்ளுபடி செய்ய வேண்டும். இல்லையெனில் மாநிலம் முழுவதும் மாபெரும் உண்ணாவிரதப் போராட்டம் உள்ளிட்ட தொடர் ஜனநாயகப் போராட்டங்கள் நடத்தப்படும் என்று விவசாயிகள் எச்சரிக்கை விடுத்தனர்.
திருவள்ளூரில் விவசாயி ஒருவர் தாலியை கையில் ஏந்தி தனது வேதனையை வெளிப்படுத்த வேண்டிய நிலை உருவாகியிருப்பது, விவசாயி களின் வாழ்க்கை எந்த அளவுக்கு நெருக்கடியில் உள்ளது என்பதை வெளிப்படுத்துவதாகவும், தேர்தல் வாக்குறுதிகளை நிறைவேற்றத் தவறிய அரசின் செயல்பாடுகள் மீதான அதிருப்தி நாளுக்கு நாள் அதிகரித்து வருவதாகவும் அரசியல் வட்டாரங்களில் பேசப்படுகிறது.