புதுடெல்லி, ஆக. 1
மக்களவையில் காஞ்சிபுரம் தொகுதி நாடாளுமன்ற உறுப்பினர் க.செல்வம் தமிழ்நாட்டில் சமூக அடிப்படையிலான சுற்றுலா மேம்பாடு, உள்ளூர் மக்களின் பங்களிப்பு, மகளிர் சுயஉதவிக் குழுக்கள், பழங்குடியினர் மற்றும் பாரம்பரிய கலைஞர்களுக்கு வழங்கப்பட்ட திட்டங்கள், நிதியுதவிகள் மற்றும் வேலைவாய்ப்புகள் குறித்து நட்சத்திர வினா எழுப்பினர். இதற்கு சுற்றுலாத்துறை அமைச்சர் கஜேந்திர சிங் ஷெகாவத் பதிலளித்தார்.
அதற்கு அளிக்கப்பட்ட பதிலில், சுற்றுலாத் தலங்கள் மற்றும் சுற்றுலா தயாரிப்புகளின் மேம்பாடு முதன்மையாக மாநில அரசுகளின் பொறுப்பாக இருந்தாலும், ஸ்வதேஷ் தர்ஷன், பிரசாத் (PRASHAD), மத்திய முகமைகளுக்கான சுற்றுலா உள்கட்டமைப்பு உதவித் திட்டம் உள்ளிட்ட பல்வேறு திட்டங்கள் மூலம் ஒன்றிய அரசு மாநிலங்களுக்கு நிதியுதவி வழங்கி வருவதாக தெரிவிக்கப்பட்டுள்ளது.
மேலும், SwadeshDarshan2.0 திட்டத்தின் மூலம் நிலைத்தன்மை கொண்ட சுற்றுலா, உள்ளூர் வேலைவாய்ப்பு, இளைஞர்களின் திறன் மேம்பாடு மற்றும் சமூக பங்கேற்புக்கு முன்னுரிமை அளிக்கப்படுவதாகவும் கூறப்பட்டுள்ளது.
தமிழ்நாட்டில் மேற்கண்ட திட்டங்களின் கீழ் இதுவரை ரூ.390.74 கோடி மதிப்பிலான திட்டங்கள் ஒப்புதல் பெற்றுள்ளன. இதில் காஞ்சிபுரம் PRASHAD திட்டத்திற்கு ரூ.13.99 கோடி, மாமல்லபுரம் கடற்கரை கோயில் மேம்பாட்டிற்கு ரூ.30.02 கோடி, ராமேஸ்வரம், வேளாங்கண்ணி, நவகிரக கோயில்கள், ஊட்டி, சென்னை உள்ளிட்ட பல்வேறு சுற்றுலா மேம்பாட்டுத் திட்டங்களும் இடம்பெற்றுள்ளன.
மேலும், ‘பர்யடன் மித்ரா’, ‘பர்யடன் திதி’ போன்ற திட்டங்கள் மூலம் பெண்கள் மற்றும் சமூகத்தின் பின்தங்கிய பிரிவினருக்கு பயிற்சி அளிக்கப்பட்டு வருவதாகவும், தமிழ்நாட்டில் 29,490 பேருக்கு சுற்றுலா மற்றும் விருந்தோம்பல் துறைகளில் திறன் மேம்பாட்டு பயிற்சி வழங்கப்பட்டுள்ளதாகவும் ஒன்றிய அரசு தெரிவித்துள்ளது.
காஞ்சிபுரம் எம்.பி. க. செல்வத்தின் துணைக் கேள்விகளுக்கு ஒன்றிய அரசு பதில்
இதனைத் தொடர்ந்து, க.செல்வம் எழுப்பிய துணைக் கேள்விகளில், ஸ்வதேஷ் தர்ஷன் திட்டத்தின் கீழ் தமிழ்நாட்டில் ஒப்புதல் அளிக்கப்பட்ட அனைத்து சமூக அடிப்படையிலான சுற்றுலாத் திட்டங்களும் நிர்ணயிக்க
ப்பட்ட காலக்கெடுவுக்குள் நிறைவேற்றப்பட்டுள்ளனவா? இல்லையெனில் தாமதத்திற்கான காரணங்கள் என்ன? என்று கேள்வி எழுப்பினார்.
மேலும், ஸ்வதேஷ் தர்ஷன் திட்டத்தின் கீழ் தமிழ்நாட்டிற்கு ஒதுக்கப்பட்ட நிதி முழுமையாக பயன்படுத்தப்பட்டுள்ளதா? மாவட்ட வாரியாக நிதி பயன்பாடு மற்றும் அதன் பயன்கள் குறித்து ஒன்றிய அரசு மதிப்பீடு மேற்கொண்டுள்ளதா? என்றும் அவர் வலியுறுத்திக் கேட்டார்.
இந்தக் கேள்விகளுக்குப் பதிலளித்த சுற்றுலாத்துறை அமைச்சர், மாநில அரசுகளிடமிருந்து பெறப்படும் திட்ட அறிக்கைகள் மற்றும் வழிகாட்டு தல்களின் அடிப்படையில் திட்டங்கள் செயல்படுத்தப்படுவதாகவும், நிலைத்த சுற்றுலா, உள்ளூர் வேலைவாய்ப்பு உருவாக்கம் மற்றும் சமூகப் பங்கேற்பை வலுப்படுத்தும் நோக்கில் ஸ்வதேஷ் தர்ஷன் 2.0 திட்டம் முன்னெடுக்கப்பட்டு வருவதாகவும் தெரிவித்தார்.
இவ்வாறு, தமிழ்நாட்டில் சுற்றுலா உள்கட்டமைப்பு மேம்பாடு, நிதி பயன்பாடு மற்றும் திட்டங்களின் செயலாக்கம் குறித்து காஞ்சிபுரம் எம்.பி. க.செல்வம் மக்களவையில் எழுப்பிய கேள்விகள் முக்கிய கவனம் பெற்றன.
இந்தக் கேள்வியின் மூலம் தமிழ்நாட்டில் சமூக அடிப்படையிலான சுற்றுலா மேம்பாடு, காஞ்சிபுரம் உள்ளிட்ட பகுதிகளில் செயல்படுத்தப்படும் திட்டங்கள், நிதி ஒதுக்கீடுகள் மற்றும் எதிர்கால நடவடிக்கைகள் தொடர்பான முக்கிய தகவல்கள் மக்களவையில் பதிவாகியுள்ளன.