புதுடெல்லி, ஆக. 1–
வந்தே மாதரம் பாடாவிட்டால் தேசத் துரோகிகளா? - மக்களவையில் கனிமொழி கருணாநிதி பேசுகையில் கடும் எதிர்ப்பு தெரிவித்தார்.
இந்திய நாடாளுமன்றத்தின் மாநிலங்களவையில் (29.7.2026) அன்று நிறைவேற்றப்பட்ட வந்தே மாதரம் தொடர்பான சட்ட மசோதா நேற்று முன்தினம் மக்களவையிலும் நிறைவேறியது
இதற்கு எதிரான விவாதங்கள் பெரும் புயலை கிளப்பியுள்ளன. கழக நாடாளுமன்றக் குழுத் தலைவர் கனிமொழி கருணாநிதி மற்றும் நீலகிரி தொகுதி நாடாளுமன்ற உறுப்பினர் ஆ.ராசா ஆகியோர் இந்த மசோதாவைக் கடுமையாக எதிர்த்துத் தங்களது கண்டன உரையை ஆற்றியுள்ளனர்.
அரசின் கொள்கைகளையும், மசோ தாக்களையும் விமர்சிப்பவர்களைத் தேசத் துரோகிகளாகச் சித்தரிக்கும் போக்கு அதிகரித்துள்ளதாக அவர்கள் தங்களது உரையில் சுட்டிக்காட்டினர்.
மக்களவையில் பேசிய தி.மு.க. நாடாளுமன்ற உறுப்பினர் கனிமொழி கருணாநிதி, மத்திய அரசின் இந்த நகர்வுக்குக் கடுமையான எதிர்ப்பு தெரிவித்தார்.
தேசபக்தி என்பது கட்டாயத்தின் பேரில் கொண்டுவரப்பட வேண்டிய ஒன்றல்ல என்று சுட்டிக்காட்டிய அவர், “வந்தே மாதரம் பாடலை ஒருவர் பாடவில்லை என்பதற்காகவே அவரைத் தேசத் துரோகி என்று முத்திரை குத்துவது எந்த விதத்தில் நியாயமாகும்? தேசபக்தியை அளவிட இத்தகைய அளவுகோல்களை நிர்ண யிப்பது ஜனநாயக முறைக்கு முற்றிலும் எதிரானது” என்று வாதிட்டார்.
மேலும், மாற்றுக் கருத்துடையவர்களை உடனே தேசத் துரோகிகள் எனக் குற்றம் சாட்டும் போக்கு அதிகரித்து வருவதைச் சுட்டிக்காட்டி, உண்மையில் ஆளும் பாஜ கட்சியின் இத்தகைய பிரிவினைவாத அணுகு முறையே நாட்டின் ஒருமைப்பாட்டிற்கு எதிரானது என்று சாடினார்.
ஜனநாயக உரிமைகள்
நாடாளுமன்ற ஜனநாயகத்தில் மசோதாக்கள் மீதான முறையான விவாதங்கள் தவிர்க்க முடியாதவை என்பதை வலியுறுத்திய கனிமொழி எம்பி, பின்வரும் முக்கியக் கருத்துக்களை முன்வைத்தார்:
விவாதமின்றி நிறைவேற்றக்கூடாது!
எந்தவொரு சட்ட மசோதாவையும் எவ்வித விரிவான விவாதமும் இன்றி அவசர அவசரமாகச் சட்டமாக்கக் கூடாது.
கருத்துச் சுதந்திரப் பாதுகாப்பு!
நாட்டின் குடிமக்கள் தங்களது ஜனநாயகக் கருத்துக்களைத் தாராளமாகத் தெரிவிக்கும் உரிமை அரசியலமைப்பால் வழங்கப்பட்டுள்ளது.
அரசியல் லாபம்!
தேசியப் பாடல்கள் மற்றும் தேசியச் சின்னங்களை வைத்துப் பொதுமக்களிடையே அரசியல் லாபம் தேடும் முயற்சிகள் கைவிடப்பட வேண்டும்.
ஆ.ராசா எம்.பி.யின் கடும் எதிர்ப்பு
கனிமொழி கருணாநிதி எம்.பி.யைத் தொடர்ந்து உரையாற்றிய ஆ.ராசா, இந்த மசோதாவின் பின்னணியில் உள்ள அரசியல் நோக்கங்களை மிகக் கடுமையாகக் கண்டித்தார்.
நாட்டின் இறையாண்மையையும், பன்முகத்தன்மையையும் பாதுகாப்பதே உண்மையான தேசபக்தி என்று குறிப்பிட்ட ஆ.ராசா, வந்தே மாதரம் பாடலின் வரலாற்றுப் பின்னணிகள் மற்றும் வரலாற்று ரீதியாகச் சமூகப் பிரிவினையை ஏற்படுத்தப் பயன்படுத்தப்பட்ட சூழல்களைச் சுட்டிக்காட்டினார். நாடாளுமன்றத்தில் எதிர்க்கட்சிகளின் குரலை நசுக்கும் வகையில் இதுபோன்ற மசோதாக்கள் கொண்டு வரப்படுவதை ஏற்றுக் கொள்ள முடியாது என்று உறுதியாகத் தெரிவித்தார்.
நாடாளுமன்றத்தில் வெடித்த
காரசார விவாதம்!
தி.மு.க. எம்பிக்களின் இந்த அதிரடி பேச்சால் அவையில் கடும் கூச்சல் குழப்பமும் காரசாரமான விவாதங்களும் நிலவின. எதிர்க்கட்சிகள் தரப்பில், தேசியச் சின்னங்கள் மற்றும் பாடல்கள் மக்களின் உணர்வுகளோடு இணைந்தவையே தவிர, அவற்றைச் சட்டத்தின் மூலமாகப் பொதுமக்கள் மீது கட்டாயப்படுத்தித் திணிக்க முடியாது என்றும், போதிய விவாதம் இல்லாமல் மசோதாக்களை நிறை
வேற்றுவது ஜனநாயக நெறிமுறைகளுக்கு விடுக்கப்படும் சவால் என்றும் குற்றம் சாட்டப்பட்டது.
வந்தே மாதரம்
தொடர்பான இந்த மசோதா!
வந்தே மாதரம் தொடர்பான இந்த மசோதா மீதான விவாதம் தற்போது தேசிய அளவில் பெரும் அரசியல் அதிர்வலைகளை ஏற்படுத்தியுள்ளது. நாடாளுமன்றத்தில் கனிமொழி கருணாநிதி மற்றும் ஆ.ராசா ஆகியோரின் உரைகள், நாட்டின் பன்முகத்தன்மை, கருத்துச் சுதந்திரம் மற்றும் ஜனநாயக உரிமைகளைப் பாதுகாப்பதன் முக்கியத்துவத்தை மீண்டும் ஒருமுறை வெளிப்படுத்தியுள்ளன. மசோதாக்களை நாடாளுமன்றத்தில் முறையான ஆய்விற்கும் விவாதத்திற்கும் உட்படுத்திய பின்னரே முடிவு செய்ய வேண்டும் என்ற எதிர்க்கட்சிகளின் கோரிக்கை மக்கள் மத்தியில் பரவலான கவனத்தைப் பெற்றுள்ளது.