கொடைக்கானல், ஆக. 2 –
கொடைக்கானல் அருகே பூம்பாறை மலைக் கிராமத்தில் ஆதிக்க சாதி யினரின் நிலத்தில் குதிரை மேய்ந்த விவகாரத்தில் ஏற்பட்ட தகராறில் தலித் இளைஞர் படுகொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது.
திண்டுக்கல் மாவட்டம் – கொடைக்கானல் அருகே உள்ள பூம்பாறை கிராமத்தைச் சேர்ந்த ரகு என்பவருக்கும், அதே பகுதியைச் சேர்ந்த ராமர், பிரசாந்த் ஆகியோருக்கும் விவசாயத் தோட்டத்தில் குதிரை மேய்ந்தது தொடர்பாக தகராறு இருந்து வந்ததாக கூறப்படுகிறது.
நேற்று தோட்டப் பகுதிக்கு ராமர் மற்றும் பிரசாந்தை அழைத்துச் சென்ற ரகு, அரிவாளால் சரமாரியாக வெட்டியுள்ளார்.
இதில் ராமர் சம்பவ இடத்திலேயே உயிரிழந்தார். பலத்த காயமடைந்த பிரசாந்த், தேனி அரசு மருத்துவமனையில் கவலைக்கிடமான நிலையில் சிகிச்சை பெற்று வருகிறார்.
இந்த கொலை சம்பவத்தில் தொடர்புடைய ரகு காவல்துறையில் சரணடைந்ததாக கூறப்படுகிறது.
இருப்பினும், இந்த கொலையில் மேலும் பலருக்கு தொடர்பு இருப்பதாக குற்றம்சாட்டிய உறவினர்கள், மறியல் போராட்டத்தில் ஈடுபட்டனர்.