புதுடெல்லி, ஆக .3–
திராவிடமுன்னேற்றக் கழக, மேலவை உறுப்பினர் எஸ்.ஆர். சிவலிங்கம் 29 ஜூலை 2026 அன்று மாநிலங்களவையில் இந்திய மாணவர்களின் வேலைத் திறனை அதிகரிக்கவும், திறன் மேம்பாட்டை உறுதிப் படுத்தவும், தொழிற் கல்வியை வளர்த்தெடுக்கவும் ஒன்றிய அரசின் பாடத்திட்டத்தில் தேவையான சீர்த்திருத்தங்கள் மேற்கொள்ளப்படுமா? என்றும் அதன் விவரங்களை உறுப்பினர்களுக்கு தெரிவிக்க இயலுமா? என்றும், ஒன்றிய அரசின் உயர்கல்வித் துறை இணையமைச்சர் டாக்டர் சுகந்தா மஜும்தார் அவர்களிடம் விரிவான கேள்வியை எழுப்பினார்.
இதற்கு ஒன்றிய அரசின் உயர்கல்வித் துறை இணையமைச்சர் அளித்த பதில் வருமாறு:–
அனைத்து பாடப்பிரிவுகளின் கீழ் மாணவர்கள் போதிய அறிவுத் திறனை பெருக்கும் வகையிலும், தொழிற்கல்வியை பள்ளிக் கல்வியின் மூலம் பெற்றிடவும், தேசிய பாடத்திட்டங்களின்படி, தேசிய கல்விக் கொள்கையில் வழிவகைசெய்யப்பட்டுள்ளது என்றும், திறன் மேம்பாட்டை உறுதி செய்யவும், தொழில் பழகுநர் முறைகளை மேம்படுத்தவும் கல்லூரிப் படிப்பின் போது தொழிற் சார்ந்த கல்வியில் ஈடுபாட்டினை ஏற்படுத்தவும் பல்கலைக் கழக மானியக் குழுவின் உதவியுடன் அரசு பல்வேறு திட்டங்களை முனைந்து வருகிறது என்றும், மும்பாய், கான்பூர், சென்னை மற்றும் கொல்கத்தாவில் அமைந்துள்ள தேசிய தொழில் பழகுநர் ஆணையத்தின் உதவியுடன் 17 இலட்சத்திற்கும் அதிகமான தொழிற் கல்வி மாணவர்கள் பயிற்சி அளிக்கப்பட்டுள்ளனர் என்றும் ஒன்றிய அரசின் இணையமைச்சர் மாநிலங்களவையில் தெரிவித்தார்.
மேலும், தொழிற் கல்வி பழகுநர் திட்டத்திற்கென இதுவரை 2892 கோடிகள் கல்வி உதவித் தொகை செலவிடப்பட்டுள்ளது என்றும், உயர்கல்வி நிறுவனங்களுடன் இதுவரை 459 புரிந்துணர்வு ஒப்பந்தங்கள் ஏற்படுத்தப்பட்டுள்ளன என்றும், அனைத்து இந்திய தொழிற் கல்வி குழுமத்தின் உதவியுடன் பாடத் திட்டங்கள் தொடர்ந்து மேம்படுத்தப்பட்டு வருகின்றன என்றும், திறன் மேம்பாட்டு பயிற்சி வகுப்பகளின் எண்ணிக்கை கல்லூரிகள் அதிகரித்துள்ளன என்றும் பல்கலைக் கழக மானிய்குழுவின் உதவியுடன் திறன் மேம்பாட்டு கல்வி அளிக்கப்பட்டு வருகிறது என்றும், ஒன்றிய அரசின் உயர்கல்வித் துறை இணையமைச்சர் டாக்டர் சுகந்தா மஜும்தார் அவர்கள் மாநிலங்களவையில் திமுக மேலவை உறுப்பினர் எஸ்.ஆர். சிவலிங்கம் எழுப்பிய கேள்விக்கு விரிவான பதிலை அளித்துள்ளார்.