புதுடெல்லி,ஆக3–
தருமபுரி மாவட்டம் வழியாக செல்லும் தேசிய நெடுஞ்சாலைகளின் பராமரிப்பு, சாலைப் பாதுகாப்பு மற்றும் புதிய உள்கட்டமைப்பு மேம்பாட்டுத்திட்டங்கள் குறித்து, தருமபுரி மக்களவைத் தொகுதி உறுப்பினர் ஆ.மணி மக்களவையில் மத்திய சாலைப் போக்குவரத்து மற்றும் நெடுஞ்சாலைகள் துறை அமைச்சர் நிதின் ஜெய்ராம் கட்கரியிடம் கேள்வி எழுப்பினார்.
கடந்த ஐந்து ஆண்டுகளில் தருமபுரி மாவட்டம் வழியாகச் செல்லும் தேசிய நெடுஞ்சாலைகளின் தற்போதைய நிலை, போக்குவரத்து அடர்த்தி மற்றும் சாலைப் பாதுகாப்புத் தர நிலைகள் குறித்து ஒன்றிய அரசு ஆய்வு மேற்கொண்டுள்ளதா?
அவ்வாறு ஆய்வு மேற்கொண்டிருந்தால், தேசிய நெடுஞ்சாலை வாரியாக அதன் விவரங்களை வெளியிடுமாறு கேட்டுள்ளார்.
மேலும், அடிக்கடி சாலை விபத்துகள் நடைபெறும் பகுதிகள், கடுமையான போக்குவரத்து நெரிசல் நிலவும் இடங்கள், சேதமடைந்த சாலைப் பகுதிகள், போதிய தெருவிளக்குகள் இல்லாத இடங்கள், பாதுகாப்பற்ற சந்திப்புகள், பழுதடைந்த பாலங்கள், பாதசாரிகள் மற்றும் சாலைப் பாதுகாப்பு வசதிகள் இல்லாத பகுதிகள் ஆகியவை அந்த ஆய்வில் கண்டறியப்பட்டுள்ளனவா என்பதையும், அவற்றைச் சீரமைப்பதற்காக மேற்கொள்ளப்பட்ட அல்லது மேற்கொள்ளப்படவுள்ள நடவடிக்கைகள் குறித்தும் விளக்கம் அளிக்குமாறு கேட்டுள்ளார்.
அத்துடன், கடந்த மூன்று ஆண்டுகளில் தருமபுரி மாவட்ட தேசிய நெடுஞ்சாலைகளில் பராமரிப்பு, சாலை அகலப்படுத்துதல், வலுப்படுத்துதல் மற்றும் சாலைப் பாதுகாப்பு மேம்பாட்டுப் பணிகளுக்காக ஒதுக்கப்பட்ட, அனுமதிக்கப்பட்ட மற்றும் செலவிடப்பட்ட நிதி விவரங்களை ஆண்டுவாரியாக வழங்குமாறும் வலியுறுத்தியுள்ளார்.
மேலும், தருமபுரி மாவட்டத்தில் சாலைகளின் போக்குவரத்து திறனை அதிகரித்தல், பயணிகளின் பாதுகாப்பை மேம்படுத்துதல் மற்றும் மாவட்டத்தின் இணைப்புத் திறனை வலுப்படுத்தும் நோக்கில் புதிய தேசியநெடுஞ்சாலைத் திட்டங்கள்அல்லது மேம்பாட்டுத் திட்டங்களை செயல்படுத்த ஒன்றிய அரசு திட்ட மிட்டுள்ளதா என்பதையும், அவ்வாறு இருந்தால் அவற்றின் விவரங்கள் மற்றும் செயல்படுத்தப்படும் கால அட்டவணையையும் வெளியிடுமாறு மக்களவையில் ஆ.மணி கேட்டுள்ளார்.