#Title

கோவையை வறட்சி மாவட்டமாக அறிவிக்க மாவட்ட ஆட்சியரிடம் விவசாயிகள் வலியுறுத்தல்! குறைதீர் கூட்டத்தை புறக்கணித்து போராட்டம்!

கோவை, ஆக.3–

கோவை மாவட்ட ஆட்சியர் அலுவலகத்தில் விவசாயிகள் குறைதீர்ப்பு கூட்டம் மாவட்ட ஆட்சித்தலைவர் பவன்குமார் தலைமையில் நடைபெற்றது. இக்கூட்டத்தில் மாவட்ட வருவாய் அலுவலர் சுரேந்திரன், கூட்டுறவு சங்கங்களின் இணைப்பதிவாளர் அழகிரி, வேளாண்மைத்துறை இணை இயக்குநர் தமிழ்ச்செல்வி, தோட்டக்கலைத்துறை துணை இயக்குநர் சித்தார்த்தன், தென்னை வளர்ச்சி வாரிய இயக்குநர் அறிவாழி உள்பட விவசாயிகள் பலர் கலந்து கொண்டனர்.

இக்கூட்டத்தில் தோட்டக்கலை துறையில் ஆடி பட்டத்திற்கான விதை தொகுப்பு வழங்கும் திட்டத்தினை மாவட்ட ஆட்சித்தலைவர் துவங்கி வைத்தார். பின்னர், விவசாயிகள் அனைவரும் அரசால் அறிவிக்கப்பட்ட முக்கிய பயிர்களுக்கு பயிர்காப்பீடு செய்ய கேட்டு கொண்டார்.

இதில் மாவட்டத்தில் தென்னை பிரதான பயிராக இருப்பதால் தென்னைக்கும் பயிர்காப்பீடு வேண்டும் என விவசாயிகள் கோரிக்கை வைத்தனர். விவசாயிகளுக்கு மற்ற துறையில் உள்ளது போல் ஒரு டோல் ப்ரீ நம்பர் வேண்டும் என வலியுறுத்தினர்.

தமிழ்நாடு விவசாய சங்கத்தினர் கோவை மாவட்டத்தில் நீண்ட நாள் பயிர் களான தென்னை, வாழை மஞ்சள் போன்றவைகளும், குறுகிய கால பயிர்களான தக்காளி, பீர்க்கன், புடலை, அவரை, சின்ன வெங்காயம், சுரைக்காய், முட்டைக்கோஸ், காலிப்ளவர், வெண்டைக்காய், மிளகாய், பீட்ரூட் போன்ற காய்கறி வகைகளை விவசாயிகள் பயிர் செய்து வரு கிறார்கள். இந்த சூழ்நிலையில் பருவ நிலை மாற்றத்தின் காரணமாக ஜூன், ஜூலை மாதங்களில் தென்மேற்கு பருவ மழையை முழுமையாக நம்பித்தான் விவசாயிகள் விளை பயிர்களை பயிர் செய்துள்ளோம். ஆனால், இந்த ஆண்டு கடந்த இரண்டு மாதங்களாக எதிர்பார்த்த தென்மேற்கு பருவமழை இல்லை. இதனால் மாவட்டத்தில் உள்ள அனைத்து வாய்க்கால், குளம், குட்டை, நொய்யல் ஆறு போன்றவைகளில் நீர்வரத்து இல்லாமல் நிலத்தடி நீர்மட்டம் 1,000 அடிக்கும் கீழ் சென்று விட்டது. தண்ணீர் பற்றாக்குறையினால் உற்பத்தி பாதிக்கப்பட்டு பெரும் பின்னடைவை விவசாயிகள் சந்திக்க கூடிய சூழ்நிலை உருவாகி வருகிறது.

எனவே, மாவட்ட நிர்வாகம் தொடர்ந்து நிலவி வரும் வறட்சியை கருத்தில் கொண்டு, தென்மேற்கு பருவமழை பெய்யாத காரணத்தினால், கோவை மாவட்டத்தை வறட்சி பாதித்த மாவட்டமாக அறிவிக்க வேண்டும் என வலியுறுத்தினர்.

மேலும், விவசாயிகள் கடந்த ஜூலையில் திருமலையாம்பாளையம் பகுதியில் உள்ள தனியார் குடோனில் சட்டவிரோதமாக பதுக்கி வைக்கப்பட்டு, பிடிக்கப்பட்டு பறிமுதல் செய்யப்பட்ட டன் கணக்கிலான யூரியா கடத்தலில் இதுவரை சரியான நட வடிக்கை இல்லை. இதில் தொடர்புடைய யார் மீதும் நடவடிக்கை இதுவரை எடுக்காமல் மாவட்ட நிர்வாகம் இருந்து வருகிறது என தெரிவித்து மாவட்ட ஆட்சித் தலைவருடன் வாக்குவாதத்தில் ஈடுபட்டனர். மேலும், யூரியா கடத்தலில் இது வரை யாரையும் கைது செய்யாமல் மாவட்ட நிர்வாக அதிகாரிகள் அவர்களுக்கு ஆதரவாக செயல் படுவதாக விவசாயிகள் குற்றம்சாட்டினர்.