துபாய், ஆக. 3–
ஐக்கிய அரபு அமீரகத்தின் துபாய் நகரில், GenZ DMK UAE குழுவினரின் சிறப்பான ஏற்பாட்டில் நடைபெற்ற ‘திராவிட சங்கமம் – இளையோர் குரல்’ கொள்கை விளக்க மற்றும் கலந்தாய்வு நிகழ்ச்சி, 500-க்கும் மேற்பட்ட தி.மு.க. உடன்பிறப்புகள் மற்றும் தமிழ் குடும்பங்களின் பேரெழுச்சிமிக்க பங்கேற்புடன் கோலாகலமாக நடைபெற்றது.
இந்நிகழ்ச்சியை GenZ DMK UAE குழுவின் ஒருங்கிணைப்பாளர்களான வேலூர் மா. மணிவண்ணன், E.S. சையத், பிரவின் ஜெயக்குமார், சோனாப்பூர் முகைதீன், வினோத், நாகராஜன் மற்றும் தாரிக் ஆகியோர் சிறப்பாக ஒருங்கிணைத்தனர்.
அமீரக தி.மு.க.வின் ராஜா, இர்ஷாத், சான்யோ, செல்வகுமார் உள்ளிட்ட முக்கிய நிர்வாகிகளின் வழிகாட்டுதலுடன் நிகழ்ச்சி சிறப்பாக நடைபெற்றது.
நிகழ்வின் சிறப்பு விருந்தினராக, ஐக்கிய அரபு அமீரகத்தைச் சேர்ந்த Royal Group of Companies நிறுவனத்தின் இயக்குநர் அப்துல்லா அல் யம்மாஹி கலந்து கொண்டு நிகழ்ச்சியை சிறப்பித்தார்.
நிகழ்ச்சியில் இளம் பேச்சாளர்களான ஹரிணி தேஷ்குமார் மற்றும் குழலிசையன், மேலும் ஒருங்கிணைப்பாளர் பிரவின் ஜெயக்குமார் ஆகியோர் திராவிட இயக்கத்தின் வரலாறு, அதன் சமூகப் பங்களிப்பு மற்றும் இன்றைய தலைமுறைக்கான அவசியம் குறித்து எழுச்சியுரையாற்றினர்.
திராவிடப் பயணம்
காணொலி திரைப்படம்!
திராவிட இயக்கத்தின் வரலாற்றுப் பயணத்தையும், தி.மு.க. அரசுகளின் முக்கிய சாதனைகளையும் எடுத்துரைக்கும் வகையில் தயாரிக்கப்பட்ட “திராவிட பயணம்” காணொளி திரையிடப்பட்டு, பார்வையாளர்களின் பெரும் வரவேற்பைப் பெற்றது.
அதைத் தொடர்ந்து, தந்தை பெரியாரின் பகுத்தறிவுச் சிந்தனை, பேரறிஞர் அண்ணாவின் மாநில உரிமைக் கொள்கை, முத்தமிழறிஞர் கலைஞரின் சமூகநீதிப் பார்வை மற்றும் கழகத் தலைவர் மு.க. ஸ்டாலின் அவர்களின் திராவிட மாடல் ஆட்சியின் நோக்கங்கள் குறித்து விரிவான கலந்துரையாடல் நடைபெற்றது. இக்கொள்கைகளை இளைய தலைமுறையினரிடம், குறிப்பாக Gen Z தலைமுறையினரிடம் கொண்டு சேர்ப்பதன் அவசியமும் வலியுறுத்தப்பட்டது.
ஒருங்கிணைப்பாளர்களான வினோத், தாரிக், E.S.சையத் மற்றும் நாகராஜன் ஆகியோரின் தலைமையில், 50-க்கும் மேற்பட்ட உடன்பிறப்புகள் தன்னார்வலர்களாக நிகழ்ச்சியின் பல்வேறு பணிகளை சிறப்பாக மேற்கொண்டு, நிகழ்ச்சி வெற்றிகரமாக நடைபெற முக்கிய பங்காற்றினர்.
திராவிட இயக்கத்தின் சமூகநீதிக் கொள்கைகள் மற்றும் நலத்திட்டங்களால் பயன்பெற்று, இன்று வெளிநாடுகளில் பல்வேறு துறைகளில் உயர்ந்த நிலையை அடைந்துள்ள தமிழர்கள், தங்களது வாழ்க்கைப் பயணத்தையும் நெகிழ்ச்சியான அனுபவங்களையும் மேடையில் பகிர்ந்து கொண்டனர்.
கழகத்தின் தலைமைச் செயற்குழு உறுப்பினரும், மிசா காலச் சிறைவாசியு மான தியாகி மிசா அகமது தம்பி அவர்களுக்கு மேடையில் பொன்னாடை அணிவித்து கௌரவிக்கப்பட்டது.
கலைநிகழ்ச்சிகள்!
தமிழர்களின் பண்பாட்டை வெளிப்படுத்தும் வகையில் பறையிசை மற்றும் பாரம்பரிய நடன நிகழ்ச்சி நடைபெற்றன. இந்நிகழ்ச்சிகள் பார்வையாளர்களின் பெரும் வரவேற்பைப் பெற்றன.
நிகழ்ச்சியின் தொடக்கத்தில் ஒருங்கிணைப்பாளர் வேலூர் மா. மணிவண்ணன் வரவேற்புரையாற்றி நிகழ்ச்சியை அறிமுகப்படுத்தினார்.
ஒருங்கிணைப்பாளர் சோனாப்பூர் முகைதீன் மற்றும் இளம் பேச்சாளர் ஹரிணி தேஷ்குமார் நிகழ்ச்சியை சிறப்பாக தொகுத்து வழங்கினர்.
ஒருங்கிணைப்பாளர் E.S. சையத் நன்றியுரையாற்றினார்.
மேலும் GenZ DMK Gulf ஒருங்கிணைப்பாளர் MRM நபில்ராஜா கலந்து கொண்டு நிகழ்ச்சியை சிறப்பித்தார்.
அமீரக மண்ணில் வாழும் தமிழ் இளைய தலைமுறையினரிடையே திராவிட சிந்தனைகள், சமூகநீதி, பகுத்தறிவு மற்றும் மாநில உரிமைக் கொள்கைகளை உரையாடலின் வழியாக எடுத்துச் செல்லும் நோக்கில் நடைபெற்ற ‘திராவிட சங்கமம் – இளையோர் குரல்’ நிகழ்ச்சி, அமீரகத் தமிழர்களிடையே மிகுந்த வரவேற்பைப் பெற்று, எதிர்காலத்திலும் இதுபோன்ற அறிவு சார் மற்றும் கொள்கை சார்ந்த நிகழ்வுகள் தொடர வேண்டும் என்ற எதிர்பார்ப்பை ஏற்படுத்தி வெற்றிகரமாக நிறைவடைந்தது.
சென்னை, ஆக. 3–
கிறித்துவ நல்லெண்ண இயக்கத் தலைவர் இனிகோ இருதயராஜ் சகோதரியின் மறைவுக்கு கழகத் தலைவர் மு.க.ஸ்டாலின் அவர்கள் விடுத்துள்ள இரங்கல் செய்தி வருமாறு:–
திருச்சி கிழக்கு சட்டமன்றத் தொகுதியின் முன்னாள் உறுப்பினரும், கிறித்துவ நல்லெண்ண இயக்கத்தின் தலைவருமான இனிகோ இருதயராஜ் அவர்களின் சகோதரி திருமிகு. எஸ். ஆஞ்சலோ ஆரோக்கியமேரி அவர்கள் மறைந்த செய்தியறிந்து, அன்புச் சகோதரர் இனிகோ இருதயராஜ் அவர்களைத் தொலைபேசியில் தொடர்புகொண்டு, என்னுடைய வேதனையைப் பகிர்ந்துகொண்டேன்.
உடன்பிறந்த சகோதரியின் மறைவால் வாடும் இனிகோ இருதயராஜ் அவர்களுக்கும், அவரது குடும்பத்தினருக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்.
இவ்வாறு கழகத் தலைவர் மு.க.ஸ்டாலின் தெரிவித்துள்ளார்.