தேனி, ஆக.3–
தேனி மாவட்டம் ஆண்டிபட்டி அருகே உள்ள ஜீ.உசிலம்பட்டி ஊராட்சியில் தனியார் காற்றாலை அமைக்கும் பணிகள் தீவிரமாக நடைபெற்று வருகின்றன. இதற்காக த.வெ.க. ஆட்சியில் மாநில நெடுஞ்சாலை மற்றும் நீர்நிலை களை ஒட்டி அமைக்கப்பட்டு வரும் மின்சார கம்பங்களால் பல்வேறு பாதிப்புகள் ஏற்படும் என சமூக ஆர்வலர்கள் மற்றும் பொதுமக்கள் குற்றச்சாட்டு
ஜீ.உசிலம்பட்டி பகுதியில் செல்லக்கூடிய மாநில நெடுஞ்சாலையின் மிக அருகிலேயே தனியார் காற்றாலைக்கான உயர் அழுத்த மின்சார கம்பங்கள் நடும் பணி நடைபெற்று வருகிறது. எதிர்காலத்தில் போக்குவரத்து நெரிசலைக் குறைக்கவும், சாலை மேம்பாட்டி ற்காகவும் இந்த நெடுஞ்சாலையை அகலப்படுத்தும் போது, தற்போது நடப்படும் இந்த மின்கம்பங்களை அகற்றி வேறு இடத்திற்கு மாற்ற வேண்டிய சூழல் உருவாகும். இதனால் அரசுக்கு பல லட்ச ரூபாய் வீண் விரயம் ஆகும் எனச் சமூக ஆர்வலர்கள் சுட்டிக்காட்டு கின்றனர்.
கம்மாய் நீர்வரத்து
பாதையில் அடைப்பு
அதேபோல், அப் பகுதியில்உள்ள கம்மாய்க்கு மழைக்காலத்தில் தண்ணீர் செல்லக்கூடிய முக்கிய நீர்வரத்துப் பாதையிலும் இந்தத் தனியார் காற்றாலை மின்கம்பங்கள் அமைக்கப்பட்டு வருகின்றன. இதனால் மழைக்காலங்களில் தண்ணீர் தடையின்றி கம்மாய்க்குச் செல்வதில் பெரும் சிரமம் ஏற்படும் என்றும், வெள்ளப்பெருக்கு ஏற்பட்டு சுற்றியுள்ள விளைநிலங்கள் மற்றும் குடியிருப்பு பகுதிகள் பாதிக்கப்படும் அபாயம்உள்ளதாகவும் அப்பகுதி மக்கள் வேதனை தெரிவிக்கின்றனர்.
பொதுமக்களின்
கோரிக்கை
“பொதுமக்களின் நலன் மற்றும்அரசு நிதியைக் கருத்தில் கொள்ளாமல், தனியார் நிறுவனத்திற்குச் சாதகமாக நெடுஞ்சாலை மற்றும் நீர்வரத்துப் பாதையில் மின்கம்பங்கள் அமைக்க அனுமதி அளித்தது யார்? சம்பந்தப்பட்ட மாவட்ட நிர்வாகமும், மின்சார வாரியமும் உடனடியாக இதில் தலையிட்டு, நீர்வரத்துப் பாதையிலும் சாலை ஓரத்திலும் அமைக்கப்படும் மின்கம்பங்களை மாற்று இடத்திற்கு மாற்ற தகுந்த நடவடிக்கை எடுக்க வேண்டும்” எனச்சமூக ஆர்வலர்களும் பொதுமக்களும் வலியுறுத்தியுள்ளனர்.