கரூர், ஆக. 4 –
கரூரில் போக்குவரத்து மாற்றம் என்ற பெயரில் ஆயிரக்கணக்கான பொதுமக்களையும், தொழி லாளர்களையும் அலைக்கழிக்கும் சோபா மாடல் அரசின் கோமாளித்தனத்திற்கு பொதுமக்கள் கடும் கண்டனத்தை தெரிவித்துள்ளனர்.
30 ஆண்டுகளுக்கும் மேலாக கரூரில் புதிய பேருந்து நிலையம் அமைக்க வேண்டும் என்று கோரிக்கையை நிறைவேற்றியது திராவிட மாடல் அரசு. வெற்று வாக்குறுதியாக இருந்ததை அப்போதைய முதலமைச்சர் மு.க.ஸ்டாலின் அவர்கள் கரூர் திருமாநிலையூர் பகுதியில் புதிய பேருந்து நிலையத்திற்கு அனுமதி வழங்கி அடிக்கல் நாட்டி நனவாக்கினார்கள். துணை முதலமைச்சர் உதயநிதி ஸ்டாலின் அவர்கள் பொதுமக்கள் பயன்பாட்டிற்காக புதிய பேருந்து நிலையத்தை தொடங்கி வைத்தார்கள். முன்னாள் அமைச்சர், மாவட்டக் கழகச் செயலாளர் வி.செந்தில் பாலாஜி, அ.தி.மு.க. மாவட்டச் செயலாளராக இருந்தவர் காழ்ப்புணர்ச்சி காரணமாக புதிய பேருந்து நிலையம் வரவிடாமல் தடுத்ததை, உச்சநீதிமன்றம் வரை சென்று சட்டப்போராட்டம் நடத்தி வென்று காட்டினார்.
முன்னாள் அமைச்சர் செந்தில்பாலாஜி முயற்சியால் கொண்டு வரப்பட்ட புதிய பேருந்து நிலையத்தை பொதுமக்கள் பயன்படுத்துவதை, பொறுத்துக் கொள்ள முடியாமல் சோபா மாடல் ஆட்சியினர் பல்வேறு குழப்பங்களை ஏற்படுத்தி வருகின்றனர். அரசு நிகழ்ச்சிகளில் முந்தைய ஆட்சியின் பெயர்களை மறைப்பது.திட்டங்களை மறைப்பது, புகைப்படங்களை அகற்றுவது போன்ற செயலில் ஈடுபட்டு வந்த த.வெ.க. ஆட்சியின் நிர்வாகம் தற்போது பயணிகளை அலைக்கழிக்கும் போக்கில் ஈடுபட்டுள்ளது.
அனைத்து புறநகர் பேருந்துகளும் புதிய பஸ் நிலையத்தில் இருந்து தான் இயக்கப்படும் என்று ஒரு அறிவிப்பை மாவட்ட நிர்வாகம் வெளியிட்டு செயல்படுத்தி வருகிறது. யாரையும் மதிக்காமல், அனுபவம் உள்ளவர்கள் கருத்துக்களையும் கேட்காமல்,தான்தோன்றித்தனமாக மாவட்ட நிர்வாகமும், போக்குவரத்து காவல்துறை நிர்வாகமும் தொடர்ந்து செயல்பட்டு வருகிறது.
இந்நிலையில், கரூரில் இயங்கி வரும் டவுன் பஸ்கள் யாவும் இன்னும் சில நாட்களில் புதிய பஸ்நிலையத்திலிருந்துதான் இயங்கும்,திரும்பி வரும்போது சுக்காலியூர் வழியில் செல்லும் என்றும் இணையதளங்களில் தகவல்கள் பரவின.
இந்த முறையை அமல்படுத்தினால், கரூர் நகருக்குள் நூற்றுக் கணக்கான ஜவுளி உற்பத்தி, கொசு வலை பேருந்து கூண்டு கட்டும் நிறுவனங்களுக்கு வரும் ஆயிரக்கணக்கான தொழிலாளர்கள், கட்டுமானத் தொழிலாளர்கள், ஜவுளிக்கடை, நகைக்கடை, காய்கனி மார்க்கெட், சூப்பர் மார்கெட், சினிமா தியேட்டர் கள், மருத்துவமனைகளுக்கு வருவோர், கூலித் தொழிவாளர்கள், ரயில் நிலையத்திற்கு வந்து செல்வோர் உட்பட லட்சம் பேர் புதிய பேருந்து நிலையத்திற்கு வெளியூரில் இருந்து வந்து,
அங்கிருந்து மீண்டும் ஒரு பேருந்து பிடித்து பழைய பேருந்து நிலையத்துக்கு வந்து அவரவர் பகுதிக்கு செல்ல வேண்டிய அவல நிலை உருவாகும்.
ஈரோடு, கோவை, சேலம், மதுரை போன்ற நகரங்களுக்கு செல்லும் புறநகர் பஸ்கள் புதிய பஸ் நிலையத்திலிருந்து பயணிகளை ஏற்றிக்கொண்டு கரூரில்உள்ள பழைய பஸ் நிலையத்திலும் பயணிகளை ஏற்றிக்கொண்டு சென்று வந்த நிலைமையும் சோபா மாடல் அரசு மாற்றிவிட்டது. பயணிகள் பெரும் அவதிப்பட்டு இருக்கும்போது, இப்போது அறிவித்துள்ள கோமாளித் தன அறிவிப்பால் மேலும் அலைக்கழிக்கப்படுவார்கள் என கடும் கண்டனங்கள் எழுந்தன.
எதற்கெடுத்தாலும் முந்தைய அரசை குறை கூறிக்கொண்டு, ரீல்ஸ் மோகத்தில் இருக்கும் கையாலாகாத, த.வெ.க. அரசின் நடவடிக்கையால், இரவு நேரங்களில் பஸ் வசதி இல்லாமல் பல மணி நேரம் காத்திருந்து புதிய பஸ் நிலையம் சென்று, தங்கள் ஊருக்கான பஸ்களை பிடிக்க வேண்டிய கட்டாயத்திற்கு தள்ளப்பட்டுள்ளனர்.
திராவிட மாடல் ஆட்சியில் இருந்ததைப் போல, இரவு 8 மணிக்கு மேல் அதிகாலை 5 மணி வரை சேலம், ஈரோடு, கோவை செல்லும் பஸ்கள் யாவும் கரூர் பழைய பஸ் நிலையத்திற்கு வந்துசென்றால் வசதியாக இருக்கும் என்று பயணிகள் கோரிக்கை விடுத்துள்ளனர்.
தனியார் டவுன் பஸ் உரிமையாளர்கள் சிலரிடம் கேட்டபோது:
டவுன் பஸ்கள் 30 கி.மீ. தூரம் மட்டும் செல்ல அனுமதி உண்டு. புதிய வழித்தடத்தில் டவுன் பஸ்களை இயக்கினால் மேலும் 10 கி.மீ. துாரம் கூடுதலாகும். நேரத்தை சரியாக கடைப்பிடிக்க முடியாத நிலை ஏற்படும். கரூர் வாங்கப்பாளையம், வெங்கமேடு உட்பட பல பஸ் நிறுத்தங்களில் பயணிகளை ஏற்ற முடியாமல் போகும். ஏற்கனவே, பெட்ரோல், டீசல் விலை உயர்வினால் டவுன் பஸ்கள் நஷ்டத்தில் இயங்குகின்றன என்றனர்.
பொதுமக்கள் மத்தியில் கடும் எதிர்ப்பு எழுந்த பிறகு தற்போது இந்தத் திட்டம் யோசனையில் தான் உள்ளது என மாவட்ட நிர்வாகம் தரப்பில் ஒரு செய்தி வெளியிடப்பட்டுள்ளது. இனியாவது ஆளுங்கட்சி அரசியல் நோக்கத்தை கைவிட்டு விட்டு, யாரையும் மதிக்காத போக்கினை மாற்றிக்கொண்டு, மக்கள் பிரதிநிதிகள், அனைத்து தரப்பினரையும் கலந்து ஆலோசித்து, மாவட்ட நிர்வாக மும் காவல்துறை நிர்வாகமும் எந்த முடிவும் எடுக்க வேண்டும் என பொதுமக்கள் தரப்பில் தெரிவிக்கப்பட்டுள்ளது.