சென்னை, ஆக.4–
மனிதநேய மக்கள் கட்சியின் தலைவரும் சட்டமன்ற உறுப்பினருமான பேராசிரியர் எம் எச் ஜவாஹிருல்லா வெளியிட்டுள்ள அறிக்கை வருமாறு:–
மேகதாது அணை கட்டுமானத்திற்குக் கண்டனம் தெரிவித்து டெல்லியில் போராட்டம் நடத்தச் சென்ற தமிழ்நாட்டு விவசாயிகள் மராட்டிய மாநிலம் நாக்பூரில் அம்மாநில காவல்துறையால் தடுத்து நிறுத்தப்பட்டுள்ளனர்.ரயிலில் பயணம் செய்த விவசாயிகளை நடுவழியில் இறங்கச் செய்து திருப்பிச் செல்லுமாறு கட்டாயப்படுத்தி இருக்கின்றனர்.
தங்களது வாழ்வாதாரத்தை உறுதி செய்யும் நோக்கில் ஜனநாயக ரீதியில் போராடுவதற்காக சென்ற தமிழ்நாட்டு விவசாயிகளை மராட்டியமாநில பாஜக அரசின் காவல்துறை தடுத்து நிறுத்தி இருப்பது கடும் கண்டனத்துக்குரியது.
ஒன்றிய அரசின் நீர்வளத் துறையின் செயல்பாடுகள் தொடர்ச்சியாக கர்நாடக அரசுக்கு சாதகமாக இருந்து வரும் நிலையில் தங்களது உரிமைகளை நிலைநாட்ட போராட்டத்திற்கு செல்லும் நிலைக்கு தமிழ்நாட்டின் விவசாயிகள் தள்ளப்பட்டனர். அவர்களின் போராட்டஉணர்வு என்பது இந்திய அரசியல் சாசனம் வழங்கியுள்ள உரிமையின் அடிப்படையானது.
விவசாயிகளின் உரிமை போராட்டத்திற்கு அனுமதி மறுக்கப்பட்டது கடும் கண்டனத்துக்குரியது. தமிழ்நாட்டின் உரிமைகள் படிப்படியாக பறிக்கப்படுவதை ஒருக்காலும் ஏற்றுக்கொள்ள முடியாது. தமிழ்நாடு அரசு மராட்டிய மாநிலஅரசிடம் இது குறித்து விளக்கம் கேட்க வேண்டும். காவேரி மேகதாது பிரச்சனையில் தமிழ்நாட்டின் உரிமையை நிலைநாட்ட அனைத்து கட்சி கூட்டத்தை கூட்ட தமிழ்நாடு அரசு முன்வர வேண்டும்.
இவ்வாறு அவர் தெரிவித்துள்ளார்.