புதுடெல்லி, ஆக.4–
புதுப்பிக்கத்தக்க எரிசக்தி, நீர் மேலாண்மை மற்றும் அக்ரோகெமிக்கல்ஸ் எனப்படும் வேளாண் வேதிப்பொருட்கள் ஆகிய துறைகளில் RCF நிறுவனம் மேற்கொள்ளவிருக்கும் விரிவாக்க நடவடிக்கைகளின் விவரங்கள் என்ன என்றும், விவசாயிகளுக்கு நியாயமான விலையிலும் சரியான நேரத்திலும் உரங்கள் கிடைப்பதை உறுதி செய்ய வகுத்துள்ள திட்டங்கள் என்ன என்றும் ஒன்றிய இரசாயனம் மற்றும் உரங்கள் துறை அமைச்சர் ஜகத் பிரகாஷ் நத்தா அவர்களிடம் கழக நாடாளுமன்றக் குழுத் துணைத் தலைவரும் மத்திய சென்னை நாடாளுமன்ற உறுப்பினருமான தயாநிதி மாறன் பல கேள்விகளை எழுப்பியுள்ளார்.
அதன் விவரங்கள் பின்வருமாறு:-
‘ஃபர்தர் பப்ளிக் ஆஃபரிங் (FPO) எனப்படும் கூடுதல் பொதுப் பங்கு வெளியீடு மூலம் ரூபாய் 1,500 கோடியைத் திரட்டு வதற்கான ராஷ்ட்ரிய கெமிக்கல்ஸ் அண்ட் ஃபெர்டிலைசர்ஸ் லிமிடெட் (RCF) நிறுவனத்தின் முன்மொழிவுக்கு ஒப்புதல் அளிக்கப்பட்டுள்ளதா? அவ்வாறாயின், அதுகுறித்த விவரங்கள் என்ன? திரட்டப்படும் நிதி எவ்வாறு பயன்படுத்தப்படவுள்ளது?
முன்மொழியப்பட்ட முதலீட்டின் ஒரு பகுதியாவது தமிழ்நாட்டில் உர உற்பத்தி, சேமிப்பு வசதிகள், சரக்குக் கையாளுதல் (Logistics), ஆராய்ச்சி மற்றும் விநியோகக் கட்டமைப்பை வலுப்படுத்துவதற்குப் பயன்படுத்தப்படுமாயின், அது குறித்த விவரங்கள் என்ன?
புதுப்பிக்கத்தக்க எரிசக்தி, நீர் மேலாண்மை மற்றும் வேளாண் வேதிப்பொருட்கள் (Agrochemicals) ஆகிய துறைகளில் RCF நிறுவனம் மேற்கொள்ளவிருக்கும் விரிவாக்க நடவடிக்கைகள், விவசாயிகளுக்குக் நியாயமான விலையிலும் சரியான நேரத்திலும் உரங்கள் கிடைப்பதை உறுதி செய்யும் அதன் முக்கிய நோக்கத்தின் மீது எத்தகைய தாக்கத்தை ஏற்படுத்தும்? அதுகுறித்து ஏதேனும் ஆய்வு மேற்கொள்ளப்பட்டிருந்தால் அதன் விவரங்கள் என்ன?
தமிழ்நாட்டில் உர விநியோகச் சங்கிலியின் உறுதித்தன்மையை மேம்படுத்தவும், உரக் கிடைப்புத் தன்மையில் உள்ள பிராந்திய ஏற்றத்தாழ்வுகளைக் குறைக்கவும், உர உற்பத்தி, சேமிப்பு அல்லது சரக்குக் கையாளுதல் வசதிகளை நிறுவ அல்லது விரிவுபடுத்த திட்டமிட்டிருந்தால் அதன் விவரங்கள் என்ன?
இவ்வாறு தயாநிதி மாறன் கேள்வி எழுப்பினார்.