தென்காசி, ஆக.4 –
தென்காசி மாவட்டம் சங்கரன்கோவில் ஆடித்தவசுத் திருவிழா வுக்காக விசைத்தறித் தொழிலாளர்கள் போராட்டம் தற்காலிகமாக ஒத்தி வைக்கப்பட்டது. இந்நிலையில் நேற்று முன்தினம் (2ந்தேதி ஞாயிற்றுக்கிழமை) நடைபெற்ற அனைத்துக் கட்சிக் கூட்டத்தில் மீண்டும் வருகிற 08 -08-2026 ஆம் தேதி ஆர்ப்பாட்டம் நடத்த முடிவு செய்யப்பட்டுள்ளது. இந்நிகழ்வில் தென்காசி வடக்கு மாவட்ட செயலாளர் வாசுதேவநல்லூர் சட்டமன்ற உறுப்பினர் ஈ.ராஜா பங்கேற்று உரையாற்றினார்.
தென்காசி மாவட்டம் சங்கரன்கோவில் மற்றும் சுற்றுவட்டா ரங்களில் 5000க்கும் மேற்பட்ட விசைத்தறிக்களில் சுமார் 15000 தொழி லாளர்கள் பணிபுரிந்து வருகின்றனர். இதற்காக நூலுக்கு சாயம் போடும் 20 சாயப்பட்டறைத் தொழிற்சாலைகள் உள்ளன.இதிலிருந்து வெளியேறும் சாயக்கழிவுநீரால் சுகாதாரக்கேடு ஏற்படுவதாகவும்,தொற்று நோய் பரவும் அபாயம் இருப்பதாக புகார் எழுந்ததைத் தொடர்ந்து, அங்கு ஆய்வு செய்த சுற்றுச் சூழல் மற்றும் காலநிலை மாற்றத்துறை அமைச்சர் வி.கே.ராஜீவ் சாயப்பட்டறைத் தொழிற்சாலைகள் மீது நடவடிக்கை எடுக்க உத்தரவிட்டார். அதன்படி மாசுகட்டுப்பாட்டு வாரியத்தினர் சாயப்பட்டறைத் தொழிற்சாலைகளுக்கு சீல் வைத்தனர்.மின் இணைப்பும் துண்டிக்கப்பட்டது.
இதனக் கண்டித்தும்,கழிவுநீர் சுத்திகரிப்பு வளாகத்தை அரசே ஏற்று நடத்தக்கோரியும் விசைத் தறித் தொழிற்சங்கத்தினர் மற்றும் விசைத்தறித் தொழிலாளர்கள் வேலைநிறுத்தம், ஆர்ப்பாட்டம், கஞ்சிதொட்டி திறக்கும் போராட்டம் போன்ற பல்வேறு போராட்டங்களை நடத்தினர்.கடந்த மாதம் 18 ஆம் தேதி ஆடித்தவசுத் திருவிழா தொடங்கியதால் தொழிலாளர்களின் போராட்டம் தற்காலிகமாக ஒத்தி வைக்கப்பட்டது.
இந்நிலையில் விசைத்தறித் தொழிலாளர்களின் வாழ்வாதாரத்தைப் பாதுகாக்க தமிழக அரசு எந்த நடவடிக்கையும் எடுக்காததால், போராட்டக்காரர்களின் சார்பில் (2 ம் தேதி ஞாயிற்றுக்கிழமை)அனத்துக் கட்சிக் கூட்டம் நடைபெற்றது.இந்தக் கூட்டத்தில் தி.மு.க சார்பில் தென்காசி வடக்கு மாவட்டச் செயலர் ஈ. ராஜா எம்.எல்.ஏ., நகர செயலாளர் மு.பிரகாஷ், சங்கரன்கோவில் ஊராட்சி ஒன்றியக்குழுத் தலைவர் லாலா சங்கரபாண்டியன்,அ.தி.மு.க.சார்பில் சங்கரன்கோவில் சட்டமன்ற உறுப்பினர் திலீபன்ஜெய்சங்கர்,நகர்மன்ற துணைத் தலைவர் கண்ணன்,நகராட்சி உறுப்பினர் எஸ்..டி.சங்கரசுப்பிரமணியன்,ம.தி.மு.க சார்பில் மாநில செயற்குழு உறுப்பினர் வெங்கடாசலபதி,நாம் தமிழர் கட்சி சார்பில் கார்த்திக்,பா.ஜ.க.சார்பில் நகர தலைவர் உதயகுமார், இந்து முன்னணி சார்பில் திருமலைக் குமார் உள்ளிட்டோ் பங்கேற்று தொழிலாளர்களின் போராட்டத்திற்கு ஆதரவு தெரிவித்துப் பேசினார் கள்.இந்தக் கூட்டத்தில் த.வெ.க. காங்கிரஸ் கட்சியைச் சேர்ந்தவர்கள் பங்கேற்கவில்லை.
இந்த கூட்டத்தில் விசைத்தறித் தொழிலாளர்களின் வாழ்வாதாரத்தைப் பாதுக்காக்க மீண்டும் வருகிற (8 ஆம் தேதி சனிக்கிழமை) திருவேங்கடம் சாலை பாடாப்பிள்ளையார் கோயில் முன்பு கண்டன ஆர்ப்பாட்டம் நடத்தவும்,அதில் விசைத்தறித் தொழிலாளர்கள் குடும்பத்துடன் பங்கேற்கவும் முடிவு செய்யப்பட்டது.மேலும் அந்த ஆர்ப்பாட்டத்தில் தி.மு.க., அ.தி.மு.க, பா.ஜ.க., ம.தி.மு.க., நாம் தமிழர் கட்சி உள்ளிட்ட கட்சியினர் பங்கேற்க ஆதரவு தெரிவித்துள்ளனர்.
இதனிடையே விசைத்தறி் தொழிலாளர்கள் சாயப்பட்டறை நடவடிக்கையில் சங்கரன்கோவிலுக்குத் தனிச்சட்டமா? தாங்கள் விருதுநகர் மாவட்டத்திற்கு புலம் பெயரவா?என த.வெ.க.அரசுக்கு கேள்வி கேட்டு ஒட்டப்பட்டள்ள சுவரொட்டியால் பரபரப்பு ஏற்பட்டுள்ளது.
மேலும் இந்தக் கூட்டத்தில் தென்காசி வடக்கு மாவட்ட கழக செயலாளர் ஈ.ராஜா எம்.எல்.ஏ. பேசியதாவது.
மாசுக்கட்டுப்பாட்டு வாரிய விதிமுறைகளை மீறியதாக கூறி சீல் வைக்கப்பட்ட சாயப்பட்டறைகளுக்கு மாற்று ஏற்பாடுகளை தற்போதைய த.வெ.க.அரசு செய்து தர வேண்டும். விசைத்தறி தொழிலாளர்கள் நடத்தும் அனைத்து போராட்டங்களுக்கும், நெசவாளர்களுக்கு பக்கபலமாக தி.மு.க. என்றைக்கும் இருக்கும்.வரும் 5 ஆம் தேதி (நாளை)சட்டப்பேரவை பட்ஜெட் கூட்டத் தொடரில் குரல் எழுப்புவேன் என்று பேசினார்.