#Title

ஒருங்கிணைந்த குழந்தைகள் மேம்பாட்டுத் திட்டத்தின்கீழ் தமிழ்நாட்டிற்கு கூடுதல் நிதி வழங்கப்பட்டுள்ளதா? மக்களவையில் தமிழச்சி தங்கபாண்டியன் கேள்வி!

புதுடெல்லி, ஆக. 4–

தென் சென்னை மக்களவை உறுப்பினர் டாக்டர் தமிழச்சி தங்கபாண்டியன், ஒருங்கிணைந்த குழந்தைகள் மேம்பாட்டுத் திட்டத்தின் (ICDS) கீழ் 2014 முதல் 2024 வரை மாநில வாரியாகவும், தமிழ்நாட்டிற்கான நிதி ஒதுக்கீடு, விடுவிப்பு, பயன்பாடு, அங்கன்வாடி மையங்கள் மற்றும் தமிழ்நாடு தனது பங்கிற்கு மேல் கூடுதல் நிதி வழங்கியுள்ளதா என்பது குறித்து மக்களவையில் கேள்வி எழுப்பினார்.

அதாவது, கடந்த 2014 முதல் 2024 வரையிலான காலகட்டத்தில் ஒருங்கிணைந்த குழந்தைகள் மேம்பாட்டுத் திட்டத்தின் (ICDS) கீழ் மாநில வாரியாகவும், தமிழ்நாட்டிற்குமான நிதி ஒதுக்கீடு, விடுவிப்பு மற்றும் பயன்பாட்டு விவரங்கள் என்ன? தமிழ்நாட்டில் முழுமையாக நிதியுதவி பெற்று செயல்பட்டு வரும் அங்கன்வாடி மையங்கள் மற்றும் ICDS திட்டங்களின் எண்ணிக்கை என்ன? 2015 முதல் மாநிலத்தின் கட்டாய பங்களிப்புக்கு மேலாக தமிழ்நாடு கூடுதல் நிதி வழங்கியுள்ளதா? அவ்வாறு வழங்கியிருந்தால் அதன் ஆண்டுவாரியான விவரங்கள் என்ன? என்று கேள்வி எழுப்பினார்.

இதற்கு மத்திய மகளிர் மற்றும் குழந்தைகள் மேம்பாட்டுத் துறை இணையமைச்சர் சாவித்ரி தாக்கூர் எழுத்துப்பூர்வமாக பதில் அளித்தார். அந்த பதிலில்:–

சக்ஷம் அங்கன்வாடி மற்றும் போஷன் 2.0திட்டத்தின் கீழ் மாநில வாரியாகவும், ஆண்டுவாரியாகவும் செயல்பட்டு வரும் அங்கன்வாடி மையங்கள் மற்றும் திட்டஙகளின் விவரங்கள் போஷன் டிராக்கர் பொதுத் தகவல் தளத்தில் வெளியிடப்பட்டுள்ளதாக தெரிவிக்கப்பட்டுள்ளது.

2014–15 முதல் 2024–25 வரையிலான காலகட்டத்தில், சக்ஷம் அங்கன்வாடி மற்றும் போஷன் 2.0 திட்டத்தின் கீழ் தமிழ்நாட்டுக்கு மத்திய அரசு ஆண்டுதோறும் நிதி விடுவித் துள்ளது. அதன்படி, 2023–24ஆம் ஆண்டில் ₹88,078.90 லட்சமும், 2024–25ஆம் ஆண்டில் ₹63,847.46 லட்சமும் தமிழ்நாட்டிற்கு விடுவிக்கப்பட்டுள்ளதாக இணைப்பில் தெரிவிக்கப்பட்டுள்ளது. இதேபோல், 2014–15 முதல் 2024–25 வரையிலான அனைத்து ஆண்டுகளுக்குமான மாநில வாரியான நிதி விவரங்களும் இணைப்பில் இடம்பெற்றுள்ளன.

மேலும், சக்ஷம் அங்கன்வாடி மற்றும் போஷன் 2.0 என்பது மத்திய அரசு நிதியுதவிவழங்கும் திட்ட மாகும். திட்டத்தை நடைமுறைப்படுத்துவது மாநில அரசுகள் மற்றும் யூனியன் பிரதேச நிர்வாகங்களின் பொறுப்பாகும். பயனாளிகளுக்கு சேவைகள் தடையின்றி கிடைப்பதை உறுதி செய்வதற்காக, மாநில அரசுகளுடன் தொடர்ந்து ஆலோசனைகள் மற்றும் காணொலி மாநாடுகள் நடத்தப்பட்டு வருவதாகவும் தெரிவிக்கப்பட்டுள்ளது.

மேலும், திட்டத்தின் செலவினப் பகிர்வு விகிதம் குறித்தும் மத்திய அரசு விளக்கம் அளித்துள்ளது. சட்டப்பேரவை கொண்ட மாநிலங்களில்ஊதியச் செலவுக்கு மத்திய–மாநில பங்களிப்பு விகிதம் 60:40, துணை ஊட்டச்சத்து செலவுக்கு 50:50 என்றும், வடகிழக்கு மற்றும் இமயமலை மாநிலங்களுக்கு 90:10 என்ற விகிதத்திலும், சட்டப்பேரவை இல்லாத யூனியன் பிரதேசங்களுக்கு 100% மத்திய நிதி வழங்கப்படுவதாகவும் பதில் தெரிவிக்கப்பட்டுள்ளது.