#Title

த மிழ்நாட்டையும் தமிழ்நாட்டு மக்களையும் பல அடிமைத்தனத்திலிருந்து மீட்டு, தமிழர் வாழ்வு உயர வேண்டும் என்று எண்ணி தங்கள் கருத்துகளால் யுத்தம் செய்து, புரட்சிகளை விதைத்து, இன்றைய நவீன தமிழ்நாட்டின் உண்மையான சிற்பிகளாய் விளங்கும் வரலாற்றுக்குச் சொந்தக்காரர்கள் திராவிட முன்னேற்றக் கழக உடன்பிறப்புகள்.

தி.மு.க.வின் வலி நிறைந்த வரலாற்றில் காங்கிரசுக்கு எப்போதும் முக்கியப் பங்கு இருக்கிறது. இனவுணர்வும் , மொழியுணர்வும் கொண்ட தமிழர்களிடம், ஆதிக்கத்தைச் செலுத்தி, தாய்மொழியை இரண்டாம் நிலைக்குத் தள்ளுவதற்கு முயற்சித்த வரலாறு காங்கிரஸிற்கு எப்போதும் உண்டு.

மானமுள்ள தமிழ் மாணவர்கள் இந்தித் திணிப்பை எதிர்த்து தங்கள் உரிமைகளுக்காகக் களமாட வந்த பொழுது, குருவி சுடுவது போல் அன்றைக்கு தமிழ்நாட்டை ஆண்ட காங்கிரஸ் அரசு சுட்டுக் கொன்றது! அந்தத் துரோக வரலாறு ஞாபகம் இருக்கிறதா காங்கிரஸிற்கு?

உங்களுடைய வரலாறை சற்று கூர்ந்து நோக்கிப் பார்க்க வேண்டும். சேரன்மகா தேவியில் வ.வே.சு. ஐயர் என்பவர் காங்கிரஸ் நிதிப் பங்களிப்பில் நடத்திய குருகுலத்தில், பிராமணர்களுக்கும் பிராமணர் அல்லாதவர்களுக்கும், தனிப் பந்தி பரிமாறப்பட்டதை தந்தை பெரியார் எதிர்த்தார் என்பதை காங்கிரஸ் மறந்து விட்டதா? அல்லது 1925-ல் காங்கிரஸ் பிராமணர்களுக்கு ஆதரவாக நடந்து கொள்வதைக் கண்டித்து, காஞ்சிபுரத்தில் நடைபெற்ற மாநாட்டில் தந்தை பெரியார் காங்கிரஸிலிருந்து வெளியேறியதை காங்கிரஸ் மறந்து விட்டதா?

இந்திய ஜனநாயக வரலாற்றில் கருப்பு நாட்களாகக் கருதப்படுகின்ற நெருக்கடி காலகட்டத்தைப் பயன்படுத்தி, தமிழ்நாட்டு மக்களுக்காக அல்லும் பகலும் உழைத்து தமிழ்நாட்டு மக்களுடைய உரிமைக்காக தொடர்ந்து இன உணர்வோடும் மொழி உணர்வோடும் செயல்பட்டு வந்த திராவிட முன்னேற்றக் கழக அரசைத் தூக்கி எறிந்த அந்த வரலாறை காங்கிரஸ் மறந்துவிட்டது போலும். இன்றைக்கு எட்டப்பர் குறித்து பேசுகின்ற காங்கிரஸ், தன்னுடைய வரலாற்றைத் திரும்பிப் பார்த்து வெட்கப்பட வேண்டிய சூழல் இருக்கிறது.

இந்திய அமைதிப்படை இலங்கையிலிருந்து திரும்பி வந்த பொழுது, அதை வரவேற்கச் செல்ல மாட்டேன் என்று துணிவுடன் எடுத்த முடிவை சகித்துக் கொள்ளாமல், திமுக அரசை 1991–ல் டிஸ்மிஸ் செய்த காங்கிரசின் துரோக வரலாறைப் பற்றி பேசலாமா?

இந்திய வரலாற்றில் மாநில அரசுகளை செயல்படவிடாமல் முடக்கி தன்னுடைய அதிகார வெறிக்குத் தீனி போட்டுக் கொண்டே மாநில அரசுகளை கலைத்த வரலாறு காங்கிரஸிற்கு தான் உண்டு.

உச்ச நீதிமன்றத்தினுடைய எஸ்.ஆர்.பொம்மை வழக்கு தீர்ப்பு வந்திருக்கவில்லை என்றால், மாநில அரசுகளைக் கவிழ்க்க முயற்சித்த சூழ்ச்சியை காங்கிரஸ் தொடர்ந்து செய்திருக்கும். இதையெல்லாம் மறந்துவிட்டு காங்கிரஸ் ஆகச்சிறந்த பச்சோந்தி என்பதை மீண்டும் நிரூபிக்கிறது.

செய்யாத குற்றத்திற்கு சிலுவை சுமந்தவர்கள் யார் தெரியுமா? ராஜீவ் காந்தி படுகொலை வழக்கில் வலிகளைச் சுமந்து, ஆட்சி அமைப்பதை இழந்து, கடும் நெருக்கடிக்கு உள்ளாகி, பல வன்முறைகளை சந்தித்த திராவிட முன்னேற்ற கழகம், பீனிக்ஸ் பறவை போல உயிர் பெற்று, மீண்டு எழுந்தது! துரோகிகளைத் தூண்டிவிட்டு கட்சியைத் துண்டாட நினைத்த வரலாறு காங்கிரஸ் மறந்துவிட்டது! வரலாற்றுப் பிழையை காங்கிரஸ் செய்திருந்தாலும் செய்யாத தவறுகளுக்கு அவச்சொல்லையும் வேதனையையும் வலியையும் தாங்கிக் கொண்டு, ஒரு இயக்கம் மக்களோடு கைகோர்த்து நடந்திருக்குமேயானால் அது திராவிட முன்னேற்றக் கழக அரசுதான் என்பதை உறுதியாகச் சொல்ல முடியும்.

வெறுங்கையில் மந்திரம் போட்டது போல, எத்தனை பூஜ்ஜியம் இருக்கிறது என்பதைக் கூட புரிந்துகொள்ள முடியாத அளவிற்கு, ஒரு பெருந்தொகையை கணக்கில் காட்டி 2G என்ற ஊழலை திமுக தான் செய்தது என்று மக்களை ஏமாற்றி நம்ப வைத்து ஒரு மாயையை உருவாக்கி, ஆட்சியை பார்ப்பனர்களிடம் கொண்டு போய் கொடுத்து, அதிமுகவினருக்கு தாரை வார்த்தது யார்? இப்படி வரலாற்றில் ஒட்டுமொத்த பிழையும் செய்தது காங்கிரஸ்தான்.

கடந்த சட்டமன்றத் தேர்தலில் திராவிட முன்னேற்றக் கழகத்தின் கூட்டணியாக இருந்து கொண்டு, வாக்குகளைப் பெற்ற காங்கிரஸ், தேர்தல் முடிவின்போது, திராவிட முன்னேற்றக் கழகத்திற்குச் சாதகமாக இல்லை என்ற காரணத்தால், கூட்டணி கட்சியின் தலைவர் என்ற முறையில், கழகத் தலைவர் மு.க.ஸ்டாலின் அவர்களிடம் ஒரு வார்த்தை கூட சொல்லாமல், கூட்டணியில் இருந்து மற்றொரு கூட்டணிக்கு சோப்ஃபா மாடல் கூட்டணியாக தாவல் செய்து, தமிழ்நாட்டு மக்களுக்குப் பெரும் துரோகத்தை வழங்கிய காங்கிரஸ், எட்டப்பனைப் பற்றி எல்லாம் பேசுவது, தமிழ்நாட்டு மக்களைக் குறித்து பேச அருகதையற்ற கட்சியாகவே கருதப்படுகிறது. உள்ளபடியே தற்கால தமிழ்நாட்டு இளைஞர்களுக்குத் துரோகம் செய்வது எப்படி என்பதை கற்றுக் கொடுத்துவிட்டு, டெல்லியில் இருந்து வந்தவுடன், ‘எட்டப்பர் யார்?’ என்று வகுப்பு எடுத்துக் கொண்டிருப்பது, தமிழ்நாட்டு இளைஞர்களுக்கு துரோகத்தை விதைத்து கொண்டி ருப்பதாக தான் புரிந்து கொள்ளப்படுகிறது. உண்மையில், ‘வாழும் எட்டப்பராக’ நீங்களே முழு முதலாக வாழ்ந்து கொண்டிருக்கிறீர்கள் என்பதை தமிழ்நாட்டு மக்கள் சார்பாக ஆணித்தரமாக சொல்லிக் கொள்கி றேன்.