சென்னை,ஆக.5–
திராவிட முன்னேற்றக் கழக இளைஞரணி செயலாளரும், தமிழ்நாடு சட்டமன்ற எதிர்க்கட்சித் தலைவருமான உதயநிதி ஸ்டாலின் கைது செய்யப்பட்டதைக் கண்டித்து, சென்னை கிழக்கு மாவட்டத்தின் பல்வேறு பகுதிகளில் கண்டன ஆர்ப்பாட்டங்கள் நடைபெற்றன.
தஞ்சாவூரில் நடைபெற்ற ஆர்ப்பாட்டக் கூட்டத்தில், பயிர் கடன் தள்ளுபடி, மேகதாது அணை விவகாரம், மேட்டூர் அணையில் ஜூன் 12ஆம் தேதி தண்ணீர் திறக்கப்படாதது,காவிரி பிரச்சினையில் அனைத் துக் கட்சிக் கூட்டம் நடத்தப்படாதது உள்ளிட்ட விவசாயிகள் தொடர்பான பல்வேறு பிரச்சினைகள் குறித்து கழகத் தலைவர் வழிகாட்டுதல் படி கழக இளைஞரணி செயலாளர் தமிழ்நாடு சட்டமன்ற எதிர்க்கட்சி தலைவர் உதயநிதி ஸ்டாலின் தலைமை ஏற்று நடத்திய
ஆர்ப்பாட்டத்தில் பேசியதை திரித்துக் காட்டி, தமிழ்நாட்டு மக்களின் கவனத்தை முக்கிய பிரச்சினைகளிலிருந்துதிசை திருப்பும் நோக்கில் அவர்மீது ஒன்பது(9) பிரிவுகளின் கீழ் வழக்குப் பதிவு செய்து கைது செய்து தஞ்சாவூருக்கு அழைத்துச் சென்றதை கண்டித்து, சென்னை கிழக்கு மாவட்டத்திற்குட்பட்ட கொளத்தூர் கிழக்கு மற்றும் மேற்கு, துறைமுகம் கிழக்கு மற்றும் மேற்கு, எழும்பூர் வடக்கு மற்றும் தெற்கு, திரு.வி.க.நகர் வடக்கு மற்றும் தெற்கு, வில்லிவாக்கம் கிழக்கு மற்றும் மேற்கு, அம்பத்தூர் வடக்கு, தெற்கு மற்றும் கிழக்கு உள்ளிட்ட பகுதிகளில் நடைபெற்ற கண்டன ஆர்ப்பாட்டங்களில் மேயர் பிரியா ராஜன்,
ஐ.சி.எப்.வ.முரளிதரன், எ.நாகராஜன், எஸ்.ராஜசேகர்,எஸ்.முரளி, சொ.வேலு,
வி. சுதாகர், செ.தமிழ்வேந்தன், எம்.சாமி கண்ணு, கூ.பீ.ஜெயின், வே.வாசு, ஜோசப் சாமுவேல், டி.எஸ்பி ராஜகோபால், எம்.டி.ஆர். நாகராஜ் மற்றும் நூற்றுக்கணக்கான கழக நிர்வாகிகள், தொண்டர்கள் மற்றும் பொதுமக்கள் பங்கேற்றனர். ஆர்ப்பாட்டத்தில் ஈடுபட்டவர்களை காவல்துறையினர் கைது செய்து, அந்தந்த பகுதிகளில் உள்ள திருமண மண்டபங்களில் தற்காலிகமாக தங்க வைக்கப்பட்டு மாலை 7.00 மணிக்கு மேல் அனைவரும் விடுவிக்கப்பட்டனர்.
விடுவிக்கப்பட்ட பின்னர், கழகத்தினர், “கழகத் தலைவர் தளபதியும், எங்கள் இளம் தலைவரும் சுட்டிக்காட்டும் பாதையில் வென்றிடுவோம், வென்றிடுவோம்”, “மீண்டு வருவோம், மீண்டும் வருவோம்”என்ற முழக்கங்களை எழுப்பி என்றென்றும் கழகத் தலைவர் பாதையில் பயணிக்க உறுதியேற்றனர்.