புதுடெல்லி, ஆக. 6–
நாட்டில் மீன்வளத்தை உறுதி செய்யவும், மீனவர்களின் வருமானத்தை மேம்படுத்தவும் அரசு எடுத்துள்ள நடவடிக்கை குறித்து மக்களவையில் வேலூர் நாடாளுமன்ற உறுப்பினர் டி.எம். கதிர் ஆனந்த் கேள்வி எழுப்பினார்.
இது தொடர்பாக அவரது கேள்விகள் வருமாறு:
உணவுப் பாதுகாப்பு, ஏற்றுமதி மற்றும் வேலைவாய்ப்பில் மீன்வளத்துறை குறிப்பிடத்தக்க பங்களிப்பை அளித்த போதிலும், கடல் மீன் இருப்பு குறைதல், அளவுக்கு அதிகமான மீன்பிடிப்பு, பருவநிலை மாற்றம், வாழ்விடச் சீரழிவு, கடல் மாசுபாடு, அழிவை ஏற்படுத்தும் மீன்பிடி முறைகள், அதிகரிக்கும் செயல்பாட்டுச் செலவுகள் மற்றும் பாரம்பரிய மீனவ சமூகங்களிடையே வாழ்வாதாரப் பாதுகாப்பின்மை ஆகியவற்றால் நாட்டின் மீன்வளத் துறை வளர்ந்துவரும் சவால்களை எதிர்கொள்கிறது என்பது குறித்த அறிக்கைகளை அரசு கவனத்தில் கொண்டுள்ளதா?
தற்போதைய சூழலுக்குக் காரணமான முக்கிய காரணிகள் குறித்த ஒன்றிய அரசின் மதிப்பீடு என்ன?
அறிவியல் பூர்வமான மீன்வள மேலாண்மை, மீன் இருப்பு மதிப்பீடு, வாழ்விட மறுசீரமைப்பு, கடல் பாதுகாப்பு மற்றும் மீன்பிடி நடவடிக்கைகளை முறைப்படுத்துதல் ஆகியவற்றை வலுப்படுத்த அரசு எடுத்துள்ள நடவடிக்கைகள் என்ன?
பருவநிலை மாற்றத்தைத் தாங்கக்கூடிய உள்கட்டமைப்பு, காப்பீடு, மாற்று வாழ்வாதாரங்கள், நவீன மீன்பிடித் தொழில் நுட்பங்கள் மற்றும் மதிப்புச் சங்கிலி மேம்பாடு ஆகியவற்றின் மூலம் சிறு அளவிலான மீனவர்களுக்கு கூடுதல்ஆதரவை வழங்க அரசு முன்மொழிந்துள்ளதா;
அவ்வாறாயின், அடுத்த ஐந்து ஆண்டுகளில் நிலையான மீன்வளத்தை உறுதி செய்யவும், மீனவர்களின் வருமானத்தை மேம்படுத்தவும் அரசு நிர்ணயித்துள்ள இலக்கு என்ன?
இவ்வாறு அவர் கேள்விகள் கேட்டிருந்தார்.
அதற்கு ஒன்றிய அரசின் மீன்வளம், கால்நடை பராமரிப்பு மற்றும் பால்வளத் துறை அமைச்சர் ராஜீவ் ரஞ்சன் சிங் என்கிற லலன் சிங் எழுத்து பூர்வமாக அளித்த பதில் விவரம் கீழ்வருமாறு:-
ICAR-மத்திய கடல்சார் மீன்வள ஆராய்ச்சி நிறுவனம் (ICAR-CMFRI) வெளியிட்ட ‘இந்தியாவின் கடல் மீன் இருப்பு நிலை (2022)’ அறிக்கையின்படி, இந்தியக் கடல் பகுதிகளில் மீன் இருப்பு நல்ல நிலையில் உள்ளது; இந்திய பிரத்யேக பொருளாதார மண்டலத்தின் (EEZ) பல்வேறு பகுதிகளில் மதிப்பிடப்பட்ட 135 மீன் இருப்பு வகைகளில் 91.1% நிலையான அளவுகளில் இருப்பது கண்டறியப்பட்டுள்ளது. ICAR-CMFRI-இன் புள்ளிவிவர ரீதியாக சரிபார்க்கப்பட்ட அறிவியல் மாதிரித் திட்டத்தின் அடிப்படையிலும், சராசரி ஆண்டு வளர்ச்சிப் போக்குகளின் அடிப்படையிலும் 2014-2023 காலகட்டத்திற்கான இந்தியாவின் கடல் மீன் பிடிப்பு விவரங்களை ஆய்வு செய்ததில், கடல் மீன் உற்பத்தியில் தொடர்ச்சியான சரிவுக்கான எந்த ஆதாரமும் இல்லை; மாறாக, ஒட்டுமொத்தமாக நிலையான போக்குடன் கூடிய சிறிய அளவிலான அதிகரிப்பு காணப்படுகிறது.
மேலும், ICAR-CMFRI தனது ஆராய்ச்சி மையங்கள் மற்றும் கடலோர மாநிலங்கள்/யூனியன் பிரதேசங்களில் உள்ள கள நிலையங்கள் மூலம் மீன் பிடிப்பு விவரங்களைத் தொடர்ந்து கண்காணித்து வருவதாகவும், வணிக ரீதியாகவும் சூழலியல் ரீதியாகவும் முக்கியமான மீன் வளங்களின் உயிரியல் செயல்பாடுகள் குறித்துக் கவனம் செலுத்தி ஆராய்ச்சிகளை மேற்கொண்டு வருவதாகவும் ICAR தெரிவித்துள்ளது.
இந்த நிறுவனம் நிகழ்நேரக் (real-time) கணக்கெடுப்புகள் மூலம் கடலோரச் சூழல் மண்டலத்தின் ஆரோக்கியத்தையும் கண்காணிக்கிறது. இதேபோன்று, இந்திய மீன்வளக் கணக்கெடுப்பு நிறுவனம் (FSI), இந்தியாவின் பிரத்யேகப் பொருளாதார மண்டலத்தில் (EEZ) முறையான ஆய்வுக் கணக்கெடுப்புகளை மேற்கொண்டு கடல்சார் மீன்வள வளங்களின் நிலையை கண்காணிக்கிறது. மீன்பிடி அழுத்தம், காலநிலை மாறுபாடு, கடல் மாசுபாடு மற்றும் வாழ்விடச் சீரழிவு ஆகியவற்றால் ஏற்படும் தாக்கங்களை மதிப்பிடுவதற்குத் தேவையான, கடலடி மற்றும் ஆழ்கடல் மீன் இனங்களின் பரவல், எண்ணிக்கை மற்றும் உயிரியல் பண்புகள் குறித்த அடிப்படைத் தரவுகளை இந்நிறுவனம் உருவாக்குகிறது.
ஒன்றிய அரசின் மீன்வளத் துறை, அறிவியல் பூர்வமான மீன்வள மேலாண்மை, கடல்சார் பாதுகாப்பு மற்றும் சிறு அளவிலான மீனவர்களின் நலன் ஆகியவற்றை வலுப்படுத்த விரிவான நடவடிக்கைகளை மேற்கொண்டுள்ளது. 2015-ஆம் ஆண்டு முதல், ‘நீலப் புரட்சித் திட்டம்’ (Blue Revolution Scheme), ‘மீன்வளம் மற்றும் மீன்வளர்ப்புஉள்கட்டமைப்பு மேம்பாட்டு நிதி’ (FIDF), ‘பிரதான் மந்திரி மத்ஸ்ய சம்பதா யோஜனா’ (PMMSY) மற்றும் ‘பிரதான் மத்ஸ்ய கிசான் சம்ரித்தி சஹ் யோஜனா’ (PM MKSSY) போன்ற முக்கியத் திட்டங்கள் மூலம் ₹39,272 கோடி நிதியை ஒதுக்கி, இத்துறையில் முதலீட்டை அரசு கணிசமாக அதிகரித்துள்ளது.
PMMSY திட்டத்தின் கீழ், மீன் இருப்புகளைப் புத்துயிர் பெறச் செய்வதற்கும் கடல்சார் வாழ்விடங்களை மீட்டெடுப்பதற்கும் இலக்கு வைக்கப்பட்ட தலையீடுகள் செயல்படுத்தப்படுகின்றன. இதில் விரிவான கடல் பண்ணைத் திட்டங்கள், செயற்கைப் பவளப்பாறைகளை நிறுவுதல், மற்றும் கடல் ஆமைகளைப் பாதுகாப்பதற்காக இழுவலைகளில் ஆமை விலக்கும் கருவிகளை (TEDs) பொருத்துதல் ஆகியவை அடங்கும். நீடித்த மீன்வளத்தை உறுதி செய்வதற்கும், சிறு மீனவர்கள் தங்கள் வருமானத்தை கணிசமாக அதிகரிக்க உதவுவதற்கும், துறையின் திட்டங்கள் வாழ்வாதாரப் பன்முகப்படுத்தலுக்கும், அளவுக்கு அதிகமாகச் சுரண்டப்படும் கடலோர நீர்நிலைகளில் மீன்பிடி அழுத்தத்தைக் குறைப்ப தற்கும் முன்னுரிமை அளிக்கின்றன.
இவ்வாறு அமைச்சர்பதிலளித்தார்.
கழக இளைஞரணிச் செயலாளர், எதிர்க்கட்சித் தலைவர் உதயநிதி ஸ்டாலின் கைது செய்யப்பட்டதை கண்டித்து சென்னை மேற்கு மாவட்டம், அண்ணாநகர் சட்டமன்றத் தொகுதி தி.மு.க. சார்பில் பெருநகர சென்னை மாநகராட்சி ஆளும் கட்சித் தலைவர், தெற்கு பகுதிச் செயலாளர் நா.இராமலிங்கம் தலைமையில் பூந்தமல்லி நெடுஞ்சாலை அண்ணா ஆர்ச் அருகில் மாபெரும் கண்டன ஆர்ப்பாட்டம் மற்றும் சாலை மறியல் போராட்டத்தில் மாவட்டச் செயலாளர் நே.சிற்றரசு, மத்திய சென்னை நாடாளுமன்ற உறுப்பினர் தயாநிதி மாறன், முன்னாள் அண்ணாநகர் சட்டமன்ற உறுப்பினர் எம்.கே.மோகன், வடக்கு பகுதிச் செயலாளர் ச.பரமசிவம், மாநில தகவல் தொழில்நுட்ப அணி துணைச் செயலாளர் கார்த்திக் மோகன், மாமன்ற உறுப்பினர்கள், வட்டக் கழகச் செயலாளர்கள், மாவட்ட, பகுதி, வட்ட அனைத்து அணிகளின் அமைப்பாளர்கள், துணை அமைப்பாளர்கள், பகுதி, வட்டக் கழக நிர்வாகிகள் மற்றும் தொண்டர்கள் பெருந்திரளாக கலந்து கொண்டனர்.