தி
.மு.க. எப்போதெல்லாம் தேர்தலில் வெற்றி வாய்ப்பை இழக்கிறதோ, அப்போதெல்லாம் அத்தோடு அந்த இயக்கத்தை அழித்தொழித்துவிட வேண்டும் என்று ஆணவத்தின் உச்சத்தில் நின்று ஆடுபவர்களைத் தமிழ்நாட்டு வரலாறு பலமுறை பார்த்திருக்கிறது. எம்.ஜி.ஆரும், ஜெய
லலிதாவும் இதை பலமுறை செய்திருக்கிறார்கள். ஆனால், அப்போதெல்லாம் அவர்கள் விரும்பியதற்கு நேர்மாறாகத் தி.மு.க. புதிய வலிமையுடன் வீறுகொண்டு எழுந்திருக்கிறது.
தி.மு.க. போராட்டங்களின் வழியே உருவாகி வளர்ந்த இயக்கம். தனிநபர் பிம்ப வழிபாட்டிலோ அரசியல் விபத்துகள் மூலமாகவோ உருவான இயக்கம் அல்ல. ஆட்சியில்இருந்தாலும் இல்லாவிட்டாலும் அது ஜனநாயகத்திற்காகவும் தமிழ்நாட்டின் உரிமைகளுக்காகவும் களத்தில் நின்று போராடிக்கொண்டே இருந்திருக்கிறது. மக்களோடு தொடர்பே இல்லாமல் பதுங்கு குழிகளுக்குள் வாழ்ந்து அதிகாரத்தை மட்டுமே ருசிக்கும் தலைவர்கள் அல்ல தி.மு.க. தலைவர்கள். அவர்கள் அச்சமற்று எப்போதும் களத்தில் நின்றிருக்கிறார்கள்.
அண்ணாவும், கலைஞரும், கழகத் தலைவரும் காட்டிய அந்தப் போர்க்குணப் பாதைதான் சட்டமன்ற எதிர்க்கட்சித் தலைவர் உதயநிதி ஸ்டாலினுடையது. தன் சொந்தத் தொண்டர் களைச் சாகவிட்டுவிட்டுத் தப்பியோடிய கோழைகளால் உதயநிதி ஸ்டாலின் போன்ற ஒரு
தலைவரைப் புரிந்துகொள்ள முடியாது. மாறாக, அவரைக் கண்டு அஞ்சுகிறார்கள் என்பதுதான் உண்மை. ஏனெனில், த.வெ.க.வின் அரசியலுக்கு அவர்தான் இறுதி மணி அடிக்கப்போகிறார் என்று அவர்களுக்கு நன்றாகத் தெரியும்.
காவிரி உரிமைகளுக்காகத் தஞ்சை விவசாயிகள் நடத்திய போராட்டத்தில் உதயநிதி பேசாத ஒன்றை பேசியதாக நேற்று முன் தினம் ஒரு பொய்ச்செய்தி பரப்பப்பட்டது. அன்றிரவே தேசிய ஊடகங்களில் இது ஒரு விவாதப் பொருளாக மாற்றப்பட்டது. அப்போதே யூகித்தேன்–அடுத்த நாள் மிகப்பெரிய ஒரு நாடகத்திற்குத் தயாராகிறார்கள் என்று. அன்றிரவு ‘ரூட் மாஃபியா’வின் ‘வல்கர் வாரியர்ஸ்’ தங்கள் வேலையை ஆரம்பித்தார்கள். ஏராளமான பதிவுகள் உதயநிதிக்கு எதிராகப் பரப்பப்பட்டன. இது உதயநிதியின் கைதை நியாயப்படுத்தும் ஒரு உளவியலை உருவாக்கும் வழக்கமான கீழ்த்தரமான உத்தி. ஆனால், தி.மு.க. ஆதரவு சமூக வலைத்தளச் செயல்பாட்டாளர்கள் இதற்குக்கடுமையான பதிலடியை உடனடியாகக் கொடுக்க ஆரம்பித்தார்கள்.
கைது நாடகம்!
நேற்று காலை திட்டமிட்டபடி உதயநிதிஸ்டாலின் இல்லத்தில் காவல்துறை அவரைக்கைது செய்து தஞ்சைக்கு அழைத்துச் செல்ல முயன்றபோது, தி.மு.க. உயர் நீதி
மன்றத்தை நாடியது. குற்றச்சாட்டிற்குச் சம்பந்தமே இல்லாத 9 பிரிவுகளில் போடப்பட்ட இந்த வழக்கின் முதல் தகவல் அறிக்கையே தவறானது என்பதை நீதிமன்றத்திடம் முன்வைத்த போது, அவசர வழக்காக நீதிமன்றம் அதை ஏற்றது. பிற்பகலில் அதை விசாரிக்க இருப்பதால், அதுவரை எந்த நடவடிக்கையும் மேற்கொள்ளக் கூடாது என நீதியரசர் அரசு வழக்கறிஞருக்கு அறிவுறுத்தி, அதைக் காவல்துறைக்குத் தெரிவிக்கும்படி கூறினார். ஆனால், பழிவாங்கும் வெறியின் உச்சத்தில் இருந்த த.வெ.க. அரசு அதை யெல்லாம் கேட்பதாக இல்லை. சட்டத்திற்கோ அரசியல் மாண்புகளுக்கோ எந்தவிதத்திலும் கட்டுப்படாதவர்களிடமிருந்து வேறு எதை எதிர்பார்க்க முடியும்?
சட்டவிரோதமாக உதயநிதியைக் கைது செய்து அழைத்துச் சென்றபோது ஊடகங்களிடம் அவர், “இது ஒரு நகைச்சுவை நாடகம்” என்றார். அந்த நகைச்சுவை நாடகத்தைத் த.வெ.க. அரசு நீதி மன்றத்திலும் நடத்தியது. “நாங்கள் கைது செய்யவில்லை, சும்மா விசாரணைக்கு அழைத்துச் செல்கிறோம்” என நீதிபதி முன்பு பல்டியடித்தார்கள். நீதிபதி, உதயநிதி மாலைக்குள் விடுவிக்கப்பட வேண்டும் என்று உத்தரவிட்டார். இதுபோன்ற வழக்குகளில் நான்கு முறை அழைப்பாணை (Summons) அனுப்பி விசாரணைக்கு ஆஜராகாவிட்டால்தான் நீதிமன்ற ஆணையின் பேரில் கைது நடவடிக்கை மேற்கொள்ள முடியும்.
இந்த வழக்கு எந்த அடிப்படையிலும் நீதிமன்றத்தில் நிற்காது என்று தெரிந்தும்,
உதயநிதிக்கு உடல்ரீதியாகவும் மனரீதியாகவும் உளைச்சலை ஏற்படுத்தலாம் என்ற அற்ப ஆசைக்காகத் தஞ்சாவூர் வரை அழைத்துச் சென்றார்கள். சென்னையில் ஒரு காவல் நிலையத்திலேயே செய்திருக்க வேண்டிய ஒரு சாதாரண விசாரணையை இவ்வளவு பெரிய நாடகமாக மாற்றியதன் காரணம், “பார், நாங்கள் உதயநிதியையே கைது செய்துவிட்டோம்!” என மார்தட்டலாம் என்பதுதான். ஆனால், அவர்கள் ஆசைக்கு நேர்மாறாக எல்லாம் நடந்தது.
உதயநிதியின் வீட்டின் முன் ஆயிரக் கணக்கான தொண்டர்கள் சிறிது நேரத்தில் திரண்டனர். தமிழ்நாடு முழுக்கப் போராட்டங்களும் சாலை மறியல்களும் வெடித்தன. தி.மு.க. தொண்டர்கள் அலை அலையாகத் தெருக்களுக்கு வந்தனர். “ஒரு தேர்தல்தோல்வியால் தி.மு.க. பலவீனப்பட்டுவிட்டது”என்ற கட்டுக்கதையைப் பரப்பியவர்கள் அதிர்ந்துபோனார்கள். எந்த அறிவிப்போ திட்டமிடலோ இல்லாமல் தமிழ்நாடு முழுக்க கழகத் தொண்டர்கள் வீதிக்கு வந்தார்கள்;அராஜக அரசிற்கு எதிராக முழக்கமிட்டார்கள்.தி.மு.க. என்றால் யார் என்பதை மீண்டும் ஒருமுறை தமிழ்நாடு மட்டுமல்ல, ஒட்டுமொத்த இந்தியாவும் பார்த்தது. எமர்ஜென்சியை எதிர்த்து நின்ற, அ.தி.மு.க. ஆட்சிக்கால ஒடுக்குமுறைகளை எதிர்த்து நின்ற இயக்கத்தின் வலிமையை அதிர்ஷ்டத்தால் அதிகாரத்திற்கு வந்த கத்துக்குட்டிகள் காண ஓர் அரிய சந்தர்ப்பம் கிடைத்தது.
உதயநிதி ஸ்டாலின் அரசியல் பொறுப்பு களுக்கு வந்த இந்தப் பத்தாண்டில், கழகத் தலைவரின் வழியில் கடும் உழைப்பினால் தன்னை உருவாக்கிக்கொண்டவர். தமிழ்நாட்டில் அவர் செல்லாத இடம் இல்லை; சந்திக்காத களங்கள் இல்லை. அவரது இயல்பான உரைகள் மக்களிடம் அவரைத் தம்மில் ஒருவராக உணரச் செய்தன. ஊடகங்களை அச்சமின்றி சந்தித்து எப்போதும் ஆதாரத்துடன் கூடிய உரிய பதில்களை அளித்து வந்திருக்கிறார்.
அமைச்சராக, துணை முதல்வராகச் செயல் திறன்மிக்க, தொலைநோக்குப் பார்வையுள்ள தலைவராகச் செயல்பட்டார். தமிழ்நாட்டை இந்தியாவின் ‘ஸ்போர்ட்ஸ் ஹப்’பாக மாற்றிக் காட்டினார். சர்வதேச விளையாட்டுப் போட்டிகள், தொகுதிதோறும் ஸ்டேடியத்துடன் கூடிய விளையாட்டு மைதானங்கள், தி.மு.க. இளைஞரணியில் லட்சக்கணக்கான புதிய உறுப்பினர்களைச் சேர்த்தது, இளைஞரணிக்குத் திராவிடக் கொள்கை சார்ந்த தொடர் பயிற்சிகளை அளித்தது, இளம் பேச்சாளர்களை உருவாக்கியது, இளைஞரணி சார்பாகத் தொகுதிதோறும் நூலகம், அறிவுத்திருவிழா என அவர் எல்லாத் தளங்களிலும் தனிச்சிறப்புமிக்க தலைவராகத் தன்னை நிலை நிறுத்திக் கொண்டார்.
எதிர்காலத் தமிழ்நாட்டின் முகம் உதயநிதி ஸ்டாலின் என்பதைத் தெட்டத்தெளிவாக உணர்ந்துகொண்ட அரசியல் எதிரிகளால் அதை எப்படிச் சகித்துக்கொள்ள முடியும்? சட்டமன்றத்தில் அவரை எப்படி எதிர்கொள்வது என்று தெரியாமல் முதலமைச்சர் விஜய்யும் ஆளுங்கட்சியினரும் திணறி வருகின்றனர். அவரது கூர்மையான விமர்சனங்களுக்கும் ஆட்சியின் அவலங்கள் குறித்த கேலி களுக்கும் பதில் சொல்ல
முடியாமல் அவரை முடக்க இதுபோன்ற நாடகங்களில் ஈடுபடுகிறார்கள்.
த.வெ.க.வினரும் அவர்களது தலைவர்களும் பேசுகிற ஆபாசமான, வக்கிரமான பேச்சுகளை எந்த அரசியல் கட்சித் தலைவரும் பேசமாட்டார்கள். இந்தப்போலிச் செய்திகளின் ஆபாசத் தாக்குதல்களின் தொழிற்சாலையாகச் செயல்படும் இவர்கள், கடந்த காலத்தில் யாரையெல்லாம் எவ்வளவு கீழ்த்தரமாக வசைபாடியிருக்கிறார்கள்என்பதை நாடறியும். இவர்கள்தான் உதயநிதி ஸ்டாலின் பெண்களை இழிவுபடுத்திவிட்டார் என்று பொய்கூறி நீலிக்கண்ணீர் வடிக்கிறார்கள். தங்கள் கட்சியைச் சேர்ந்த பாலியல் குற்றவாளிகளைப் பாதுகாக்கும் இவர்களது கேலிக்கூத்தைப் பார்த்து மக்கள் சிரிக்கிறார்கள்.
உதயநிதி ஸ்டாலின் மீதான இந்தச் சட்டவிரோதக் கைதின் மூலமாகத் தி.மு.க. பெரும் எழுச்சி கண்டிருக்கிறது. உதயநிதி ஸ்டாலின் தன் ஆளுமைப் பண்பில் இன்னொரு உயரத்தைஅடைந்திருக்கிறார். காற்றில் உயரப் பறக்கும் சருகுகள் கோபுரங்களை மோதி உடைக்க இயலாது!