புதுடெல்லி, ஆக. 7
தென் சென்னை மக்களவை உறுப்பினர் டாக்டர் தமிழச்சி தங்கபாண்டியன், சென்னை மெட்ரோ ரயில் இரண்டாம் கட்டத் திட்டத்தின் 3, 4 மற்றும் 5–வது வழித்தடங்களின் பணிகள், அதற்காக விடுவிக்கப்பட்ட மத்திய நிதி மற்றும் இந்தத் திட்டம் சென்னை நகரின் போக்குவரத்தில் ஏற்படுத்தும் தாக்கம் குறித்து மக்களவையில் கேள்வி எழுப்பினார்.
அதில்,சென்னை மெட்ரோ ரயில் இரண்டாம் கட்டத் திட்டத்தின் 3, 4 மற்றும் 5–வது வழித்தடங்களில் நிலுவையில் உள்ள பணிகளை மத்திய அரசு விரைவுபடுத்தி யுள்ளதா? அப்படியானால் அதன் விவரங்கள் மற்றும் அதற்காக விடுவிக்கப்பட்ட நிதி எவ்வளவு? மேலும், சென்னை மெட்ரோ ரயில் வலையமைப்பு விரிவாக்கம் நகர்ப்புற போக்குவரத்து, போக்குவரத்து நெரிசல் குறைப்பு மற்றும் கடைசி மைல் இணைப்பை எந்த அளவிற்கு மேம்படுத்தும்? என்று கேள்வி எழுப்பினார்.
இதற்கு மத்திய வீட்டுவசதி மற்றும் நகர்ப்புற விவகாரங்கள் இணையமைச்சர் தோகன் சாஹு எழுத்துப்பூர்வமாக பதில் அளித்தார். அந்த பதிலில் :
சென்னை மெட்ரோ ரயில் இரண்டாம் கட்டத் திட்டம் மொத்தம் 118.9 கிலோமீட்டர் நீளத்தில், 3 வழித்தடங்களுடன் செயல்படுத்தப்பட்டு வருகிறது. இதில், 3–வது வழித்தடம் மாதவரம்–சிப்காட் (45.8 கி.மீ.), 4–வது வழித்தடம் கலங்கரை விளக்கம்– பூந்தமல்லி பைபாஸ் (26.1 கி.மீ.), 5–வது வழித்தடம் மாதவரம்–சோழிங்கநல்லூர் (47.0 கி.மீ.) ஆகியவை அடங்கும். இந்தத் திட்டத்திற்கு ரூ.63,246 கோடி செலவில் மத்திய அரசு ஒப்புதல் வழங்கியுள்ளது.
சென்னை மெட்ரோ ரயில் நிறுவனம் வழங்கிய தகவலின்படி, இரண்டாம் கட்டத் திட்டத்தின் ஒட்டுமொத்த இயற்பியல் முன்னேற்றம் தற்போது 54.62 சதவீதமாக உள்ளது. திட்டத்தின் முன்னேற்றம் மற்றும் சிறப்பு நோக்க நிறுவனமான சென்னை மெட்ரோ ரயில் நிறுவனத்தின் நிதித் தேவையின் அடிப்படையில் மத்திய அரசு நிதி விடுவித்து வருகிறது. திட்டத்திற்கு 2024 அக்டோபரில் ஒப்புதல் அளிக்கப்பட்டதிலிருந்து இதுவரை ரூ.14,545.91 கோடி மத்திய நிதி விடுவிக்கப்பட்டுள்ளது.
மேலும், திட்டப் பணிகளை விரைவாக நிறைவு செய்வதற்காக, உயர்மட்டக் குழு, சென்னை மெட்ரோ ரயில் நிறுவனத்தின் இயக்குநர்கள் குழுமற்றும் மத்திய, மாநில அரசுகளின் பல்வேறு நிலைகளில் தொடர்ந்து கண்காணிப்பு மேற்கொள்ளப்பட்டு வருவதாக ஒன்றிய அரசு தெரிவித்துள்ளது.
சென்னை மெட்ரோ இரண்டாம் கட்ட விரிவாக்கம் மூலம், சென்னை பெருநகரப் பகுதியில் பாதுகாப்பான, தடையற்ற மற்றும் திறன்மிக்க பொது போக்குவரத்து வசதி ஏற்படும். மேலும், ரயில் நிலையங்கள், பேருந்து நிலையங்கள், விமான நிலையம் மற்றும் பிற மெட்ரோ வழித்தடங்களுடன் ஒருங்கிணைந்த இணைப்பு உருவாக்கப்படுவதால் போக்குவரத்து நெரிசல் குறையும். கடைசி மைல் இணைப்பை மேம்படுத்த தனித்துவமான ஃபீடர் சேவைகளும் ஏற்படுத்தப்படுவதால், பொதுமக்கள் தொடக்கம் முதல் இறுதி இலக்கு வரை மெட்ரோ சேவையை எளிதாக பயன்படுத்த முடியும் என்றும் பதிலில் தெரிவிக்கப்பட்டுள்ளது.