இறந்த பின்னும்

இத்துணை கத்திகள் பாயுமெனில்

எத்துணை பெரியதுன் கொள்கை?

உன் சமாதியையும்

கொலைசெய்யும் ஒரு கூட்டமெனில்

எத்துணை வலியதுன் வாழ்வு?

உன்மீது அடித்த புயல்

மண்மீது அடித்திருந்தால்

இமயமலை சற்றே

இடம் பெயர்ந்திருக்கும்

உன்மீது அடித்த வெயில்

கடல்மீது அடித்திருந்தால்

பாதிச் சமுத்திரம்

பாலையாய்ப் போயிருக்கும்

நீயோ

புயலில் சவாரி செய்தாய்

வெயிலைச் சமாதி செய்தாய்

உன் உறுதியும் தீவிரமும்

இறுதிவரை வேண்டும்

இளைய தலைமுறைக்கு

கலைஞரய்யா!

கல்லறைக்கு

மலரேந்தி வந்தேன்

கண்ணுறக்கம் கலையுமென்று

காம்புகள் கிள்ளி

இதயத்தில் தூவுகிறேன்

இதழ்களை மட்டும்