புதுடெல்லி, ஆக. 8 –
திராவிட முன்னேற்றக் கழக, அரக்கோணம் நாடாளுமன்ற உறுப்பினர், டாக்டர் எஸ். ஜெகத்ரட்சகன் அவர்கள், ஆகஸ்ட் 6, அன்று மக்களவையில், நகர்ப்புறங்களில் போதிய நடைபாதை வசதிகள் இல்லாமை, பாதுகாப்பற்ற நடைபாதைகள், போக்குவரத்து நெரிசல், தனியார் வாகனங்களை அதிகம் சார்ந்திருக்கும் நிலை, நடைபயிற்சி மற்றும் பொது போக்குவரத்தை மையமாகக் கொண்ட நகர்ப்புற வளர்ச்சி மற்றும் அனைவரையும் உள்ளடக்கிய நகர்ப்புற இயக்கத்தை மேம்படுத்த ஒன்றிய அரசு மேற்கொண்டுள்ள நடவடிக்கைகள் குறித்து கேள்வி எழுப்பினார்.
ஒன்றிய அரசின் வீட்டுவசதி மற்றும் நகர்ப்புற விவகாரங்கள் துறை இணை அமைச்சர் டோகன் சாஹு அவர்கள் அளித்த பதிலில், அரசியலமைப்பின் பன்னிரண்டாவது அட்டவணையின்படி நகரத் திட்டமிடல், சாலைகள், நடைபாதைகள் மற்றும் நகர்ப்புற போக்குவரத்து கட்டமைப்புகளை உருவாக்குதல் ஆகியவை நகர்ப்புற உள்ளாட்சி அமைப்புகள் மற்றும் நகர்ப்புற மேம்பாட்டு அதிகார அமைப்புகளின் பொறுப்பு என தெரிவித்தார். மாநில அரசுகள், ஒன்றியப் பிரதேசங்கள் மற்றும் நகர்ப்புற உள்ளாட்சி அமைப்புகளின் முயற்சி களுக்கு கொள்கைகள், வழிகாட்டுதல்கள், தொழில்நுட்ப ஆலோசனைகள் மற்றும் நிதி உதவி மூலம் ஒன்றிய அரசு ஆதரவு அளித்து வருவதாகவும் கூறினார்.
நடைபாதை வசதிகள், மிதிவண்டி போக்குவரத்து, பொது போக்குவரத்து முன்னுரிமை மற்றும் ஒருங்கிணைந்த நகர்ப்புற போக்குவரத்தை மேம்படுத்த நகர்ப்புற மற்றும் பிராந்திய மேம்பாட்டு திட்ட வடிவமைப்பு மற்றும் செயல்படுத்தல் வழிகாட்டுதல்கள், 2014, தேசிய நகர்ப்புற போக்குவரத்துக் கொள்கை, 2006 மற்றும் மெட்ரோ ரயில் கொள்கை, 2017 ஆகியவற்றை ஒன்றிய அரசு வெளியிட்டுள்ளதாக அமைச்சர் தெரிவித்தார். இவ்வழிகாட்டுதல்களில் நடைபாதைகள், மிதி வண்டிப் பாதைகள், பொது போக்குவரத்து அணுகல் மற்றும் கடைசி மைல் இணைப்பு ஆகியவற்றுக்கு முக்கியத்துவம் வழங்கப்பட்டுள்ளதாகவும் கூறினார்.
அடல் நகர்ப்புற புத்துயிரூட்டல் மற்றும் மாற்றத்திற்கான இயக்கம் திட்டத்தின் கீழ், இதுவரை 431 கி.மீ. நடைபாதைகள்/நடப்புப் பாதைகள் மற்றும் 43 கி.மீ. தனிப்பட்ட மிதிவண்டிப் பாதைகள் உருவாக்கப்பட்டுள்ளதாக அமைச்சர் தெரிவித்தார். மேலும், பிரதம மந்திரி மின்சார பேருந்து சேவைத் திட்டத்தின் கீழ், 100-க்கும் மேற்பட்ட நகரங்களில் 10,000 மின்சார பேருந்துகள் இயக்க ஒப்புதல் வழங்கப்பட்டுள்ளதாகவும்,
இது பொது போக்குவரத்து வசதியை மேம்படுத்தி, தனியார் வாகன சார்பை குறைத்து, சுற்றுச்சூழலுக்கு உகந்த நகர்ப்புற இயக்கத்தை ஊக்குவிக்கும் என்றும் தெரிவித்தார்.
மேலும், போக்குவரத்து மையப்படுத்தப்பட்ட நகர்ப்புற வளர்ச்சியை ஊக்குவிக்க, எட்டு மாநிலங்களில் 39 போக்குவரத்து மைய வளர்ச்சி வழித்தடங்கள் அறிவிக்கப் பட்டுள்ளதாகவும், இதன் மூலம் அதிக அடர்த்தி கொண்ட வளர்ச்சி, சிறந்த கடைசி மைல் இணைப்பு மற்றும் ஒருங்கிணைந்த பொது போக்குவரத்து வசதிகள் மேம்படுத்தப்பட்டு வருவதாகவும், ஒன்றிய அரசின் வீட்டுவசதி மற்றும் நகர்ப்புற விவகாரங்கள் துறை மாண்புமிகு இணை அமைச்சர் திரு. டோகன் சாஹு அவர்கள், டாக்டர் எஸ். ஜெகத்ரட்சகன்அவர்கள் எழுப்பிய கேள்விக்கு எழுத்துப்பூர்வமாக அளித்த பதிலில் தெரிவித்துள்ளார்.